ފިތުރު އީދާ ގުޅުވައިގެން ޔޫތު މިނިސްޓްރީން ބާއްވާ ތްރީ އޮން ތްރީ ފުޓްސަލް މުބާރާތެއް ފަށައިފި

މިއަހަރުގެ ފިތުރު އީދާ ގުޅުވައިގެން ޔޫތު މިނިސްޓްރީން ކުރިއަށް ގެންދާ ތްރީ އޮން ތްރީ ފުޓްސަލް މުބާރާތް ފަށައިފި އެވެ.

އަންހެން އަދި ފިރިހެން ދެ ޑިވިޝަނަށް ހުޅުވާލައިގެން ސޯޝަލް ސެންޓަރުގަ ކުރިއަށްދާ މުބާރާތް ފަށާފައި ވަނީ ހުކުރު ދުވަހުގެ މެންދުރު އެވެ. މުބާރާތުގައި ޖުމުލަ 32 ޓީމު ވާދަކުރެ އެވެ. އެއީ ފިރިހެން ޑިވިޝަންގެ 26 ޓީމު އަދި އަންހެން ޑިވިޝަންގެ ހަ ޓީމެވެ. މުބާރާތް ކުރިއަށް ދަނީ ނިކްއައުޓް އުސޫލުންނެވެ. އެއް ދުވަހަށް ކުރިއަށްދާ މުބާރާތުގެ ފައިނަލް މެޗުތައް އޮންނާނީ ހުކުރު ދުވަހުގެ ރޭ އެވެ.

މުބާރާތުގެ ވަނަ ވަނައަށް ހޮވޭ ފަރާތްތަކަށް އިނާމު ދިނުމަށް ވަނީ ހަމަޖެހިފައެވެ. އެގޮތުން ކޮންމެ ޑިވިޝަނަކުން ޗެމްޕިއަން ޓީމު، ރަނަރަޕް ޓީމު، މުބާރާތުގެ އެންމެ މޮޅު ކުޅުންތެރިޔާ، އެންމެ ގިނަ ލަނޑު ޖެހި ކުޅުންތެރިޔާ، ފެއާ ޕްލޭ ޓީމު އަދި ފެއާ ޕްލޭ ކުޅުންތެރިޔާ ހޮވުމަށް ވެސް ވަނީ ނިންމައިފަ އެވެ. މީގެ އިތުރުން މުބާރާތް ކުރިޔަށް ދާ ވަގުތު ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ 02 ފަރާތަކަށް އިނާމް ދިނުމަށް ވަނީ ހަމަޖެހިފަ އެވެ.

މި ޕްރޮގްރާމުގެ މައިގަނޑު މަޤްސަދަކީ އެކުވެރި އެއްބައިވަންތަ މާޙައުލެއްގައި ގިނަ ޒުވާނުންތަކެއް އެކުވެ، ތަފާތު ޚިޔާލުތައް ބަދަލުކުރެވި، ޒުވާނުންގެ މެދުގައި އެކުވެރިކަމާއި އެއްބައިވަންތަކަމުގެ ރޫޙު އާލާކުރުމެވެ. އަދި ހުނަރުވެރި ޒުވާނުންތަކެއް އުފައްދައި، ޒުވާނުންނަށް ފުރަސަތުތައް ފަހިކޮށްދިނުމެވެ.