ކުށްވެރިންނަކީ ދަނޑުމަތީގައި ތިބި ކުޅުންތެރިން: ޓެންހާގް

މެންޗެސްޓާ ޔުނައިޓެޑް ޔޫރޮޕާ ލީގުން ކެޓުމުގައި ކުށްވެރިންނަކީ ދަނޑުމަތީގައި ތިބި ކުޅުންތެރިން ކަމަށް ކޯޗު އެރިކް ޓެންހާގް ބުނެފި އެވެ.

ސެވިއްޔާ އަތުން 3-0އިން ބަލިވެ، ޖުމުލަ ނަތީޖާ 5-2އިން މުބާރާތުން ކެޓުމުން ކޯޗު ބުނީ މި މެޗުގައި ނުކުޅޭ ކުޅުންތެރިއަކާ މި ނަތީޖާއާ ގުޅުމެއް ނެތް ކަމަށެވެ.

ކުޅުންތެރިންނަށް އަދިވެސް އިތުބާރުކުރާނަންތޯ ތަކުރާރުކޮށް އެހުމުން އެކަމަށް ކޯޗު ވަނީ އާނ ބަސް ބުނެފަ އެވެ.

މި ސީޒަނުގައި ޓީމާ ހަވާލުވި ކޯޗު ބުނީ ޔޫރޮޕާ ލީގުގެ ކުއާޓާ ފައިނަލް މެޗަކީ ކަންތައްތަކެއް ރަނގަޅު ކުރެވިއްޖެކަން ސާބިތުކުރަން ލިބުނު ވަރަށް ރަނގަޅު ފުރުސަތެއް ކަމަށާއި ނަމަވެސް ދެން ވެސް އޮތީ މަސައްކަތް ކުރުން ކަމަށެވެ.

ޓެން ހާގް ބުނީ މި މެޗުގައި ބަލިވީ ހަދައިގެން ނުވާނެވަރުގެ މިސްޓޭކްތަކެއް ހަދައިގެން ކަމަށެވެ.

މި މެޗުގައި ޖެހި ފުރަތަމަ ގޯލަކީ މެންޗެސްޓާ ޔުނައިޓެޑްގެ ކެޕްޓަން ހެރީ މެގުއާ ހެދި ބޮޑު މިސްޓޭކެކެވެ. ފަހަތުން ކީޕަރު ޑޭވިޑް ޑެހެޔާ، އޭނާ އަށް ދިން ބޯޅަ ޕެނަލްޓީ އޭރިޔާގެ ބޭރުން އަރިމައްޗަށް ޕާސްކުރަން އުޅެނިކޮށް މެގުއާއަށް ބޯޅަ ދެވުނީ އޭރިޔާ ތެރޭގައި ހުރި ސެވިއްޔާގެ ނަސީރީގެ ފަޔަށެވެ. އޭނާ ގޯލަށް ބޯޅަ ފޮނުވާލީ އެއްވެސް ހުރަހެއްނެތި އެވެ. މި ބޯޅަ ޑެހެޔާއަށް ލިބުނުއިރު އޭނާ ވަށައިގެން ކަހަލަ ގޮތަކަށް ސެވިއްޔާގެ ތިން ކުޅުންތެރިން ތިއްބެވެ.