ފައިނަލްގައި ހުޅުމާލެ ވެޓަރެންސްއާއި ދަ ގްރާންޑޭ

އެފްއޭއެމް ވެޓަރެންސް ލީގުގެ ފައިނަލުން ހުޅުމާލެ ވެޓަރެންސްއާއި ދަ ގްރާންޑޭ ޖާގަ ހޯދައިފިއެވެ.

ހުޅުމާލެ ވެޓަރެންސް ފައިނަލްގެ ޖާގަހޯދީ ސެމީފައިނަލްގައި 1-0 ން އެމްއެސް މޭޓްސް ވެޓަރެންސް ބަލިކޮށްގެންނެވެ. ވާދަވެރި ދެޓީމްގެ މެޗުގައި ހަމައެކަނި ލަނޑުޖެހީ އަބުދުލްމަޖީދު އިބްރާހީމް (މަޖިއްޓެ)އެވެ. މެޗުގެ މޮޅު ކުޅުންތެރިއަކީވެސް އޭނާއެވެ.

ފައިނަލްގައި ހުޅުމާލެ ވެޓަރެންސް ވާދަކުރާނީ ދަ ގްރާންޑޭއާއެވެ. ދަ ގްރާންޑޭ ފައިނަލުން ޖާގަހޯދީ ސެމީފައިނަލްގައި ހުއްރިއްޔާ ވެޓަރެންސް ބަލިކޮށްގެންނެވެ. ސެމީފައިނަލް މެޗު ދަ ގްރާންޑޭއިން ކާމިޔާބުކުރީ 3-2 ނެވެ. މެޗުގައި ފުރަތަމަ ލަނޑުޖަހާ ކުރިހޯދީވެސް ދަ ގްރާންޑޭއިންނެވެ. އެޓީމަށް ލީޑް ނަގައިދިނީ އިބްރާހީމް ޝަރީފްއެވެ. ފުރަތަމަ ހާފްގައި މައުސޫމް އަބުދުލްޣަފޫރު (މާސޭ) ލަނޑުޖަހާ ހުރައަށް އެއްވަރުކޮށްދިނުމުން ފުރަތަމަ ހާފް ނިމުނީ 1-1 ނެވެ. ދެވަނަ ހާފްގައި ދަ ގްރާންޑޭއިން ދެ ލަނޑު ޖަހާ ލީޑެއް ނެގިއެވެ. އެއީ އަލީ ނާޝިދުއާއި, ހުސައިން ޝަރީފްގެ ލަނޑުތަކުންނެވެ. ހުރައަށް ފަރަގު ކުޑަކޮށްދިނީ މެޗުގެ އިތުރުވަގުތުގައި ހުސެއިން ނަސީރެވެ.

ހުޅުމާލެ ވެޓަރެންސްއާއި ދަ ގްރާންޑޭ ވާދަކުރާ ފައިނަލް މެޗު ކުޅޭނީ އަންނަ ބުރާސްފަތި ދުވަހު ހަވީރުއެވެ.