ދެވަނަ ޑިވިޝަންގައި ވާދަކުރާ "ދަ ގްރާންޑޭ" ޓީމަށް ޖާޒީ ހަވާލުކޮށްފި

މިއަހަރުގެ ދެވަނަ ޑިވިޝަން ފުޓުބޯޅަ މުބާރާތް ހޮނިހިރު ދުވަހު ފެށުމަށް ހަމަޖެހިފައިވާ އިރު، އެ މުބާރާތުގައި ވާދަކުރާ "ދަ ގްރާންޑޭ އަމީގޯސް ނިއުޖެނެރޭޝަން ސްޕޯޓްސް ކްލަބު"ގެ ކުޅުންތެރިންނަށް ޖާޒީ ހަވާލުކޮށްފި އެވެ.

ބިދޭސީ ތިން ކުޅުންތެރިންނާއި ކުރިން ފުރަތަމަ ޑިވިޝަނަށް ކުޅެފައިވާ ކުޅުންތެރިން ހިމެނޭ ގްރާންޑޭ ޓީމުގެ ކުޅުންތެރިންނަށް ޖާޒީ ހަވާލުކުރުން އޮތީ ހުކުރު ދުވަހުގެ މެންދުރުފަހު ޑޮންޑޮން ކެފޭގައި ބޭއްވި ކުރު ހަފްލާއެއްގަ އެވެ.

ފާއިތުވި ސީޒަންގެ ވެސް ދެވަނަ ޑިވިޝަންގައި ވާދަކުރި ގްރާންޑޭ ޓީމުގެ ކުޅުންތެރިންނަށް ޖާޒީ ހަވާލުކޮށްދިނީ ލިލީ އެންޓަރ ޕްރައިޒަސްގެ ބިޒްނަސް ޑިވޮލޮޕްމެންޓް މެނޭޖަރު މުހައްމަދު އަނަސް ސަނޫހާއި ޗައިނާގެ ވިޔަފާރިވެރިއެއް ކަމަށްވާ ކިމް ލީ އެވެ.

މިއަހަރުގެ ދެވަނަ ޑިވިޝަން ކާމިޔާބުކޮށް ފުރަތަމަ ޑިވިޝަނަށް ކޮލިފައިވުމުގެ އަޒުމުގައި ނުކުންނަ ދަ ގްރާންޑޭ ޓީމުގައި ފާއިތުވި ސީޒަންގައި ކްލަބު ވެލެންސިޔާ އަށް ކުޅުނު ސްޕެއިންގެ ފޯވަޑް އެންޖެލް ކަރެސްކޯ އާއި ބްރެޒިލްގެ ޑިފެންޑަރަކާއި ފޯވަޑެއް ވެސް ވަނީ ގެނެސްފަ އެވެ.

މީގެ އިތުރުން ފާއިތުވި ސީޒަންގެ ދެވަނަ ޑިވިޝަން ފުޓުބޯޅަ މުބާރާތް ކްލަބު ގްރީން ސްޓްރީޓަށް ކާމިޔާބުކޮށްދިނުމަށް މުހިންމު ދައުރެއް އަދާކުރި އަދި ކުރިން ފުރަތަމަ ޑިވިޝަންގެ ކްލަބުތަކަށް ކުޅެފައިވާ ޝިނާޒް ހިލްމީ އާއި ޓީސީ ސްޕޯޓްސް ކްލަބާއި ނިއު ރޭޑިއަންޓް އަދި ޒުވާން ގައުމީ ޓީމުގެ ގޯލު ބެލެހެއްޓުމުގައި ހަރަކާތްތެރިވެފައިވާ ކީޕަރު އަބްދުﷲ ފަޔާޒް ވެސް ވަނީ އެޓީމާ ގުޅިފަ އެވެ.

މި ޓީމުގައި ހިމެނޭ މުހިންމު ބައެއް ކުޅުންތެރިންނަށް ބަލާލާއިރު، ފާއިތުވި ދެ އަހަރުވެސް މ.ދިއްގަރުގައި ބޭއްވި އައިލެންޑާސް ފުޓްސަލް ޗެލެންޖް އެޓީމަށް ކާމިޔާބުކޮށްދިނުމުގައި އިސްދައުރެއް އަދާކުރި އަޔާޒް އަހުމަދާއި ރާއްޖޭގެ ފުޓްސަލްގެ ކީ ޕްލޭޔަރެއް ކަމަށްވާ މުހައްމަދު ރިފްއަތު (ރިއްޕެ) ހިމެނެ އެވެ.

ހޮނިހިރު ދުވަހު ދެވަނަ ޑިވިޝަންގެ ކުޅުން ފަށާއިރު، މި މުބާރާތަށް ވެފައިވާ ތައްޔާރީތަކާ ބެހޭ ގޮތުން ރާއްޖެއެމްވީ އަށް މައުލޫމާތު ދެއްވަމުން ދަ ގްރާންޑޭ ސްޕޯޓްސް ކްލަބުގެ ޗެއާމަން ނަސީހު މުހައްމަދު (ނަސީ) ވިދާޅުވީ މިއަހަރުގެ މުބާރާތަށް އެޓީމު އޮތީ ވަރަށް ފުރިހަމައަށް ތައްޔާރުވެފައި ކަމަށެވެ.

ނަސީހު ވިދާޅުވީ ފާއިތުވި ސީޒަންގެ ދެވަނަ ޑިވިޝަންގެ ސެމީ ފައިނަލުން ބަލިވި ހިސާބުން މިއަދާ ހަމައަށް ވެސް މަސައްކަތް ކުރަމުން އަންނަނީ އެޓީމަށް ރަނގަޅު ކުޅުންތެރިން ހޯދައި މިއަހަރުގެ ދެވަނަ ޑިވިޝަން ކާމިޔާބުކޮށް އަންނަ އަހަރުގެ ފުރަތަމަ ޑިވިޝަނަށް ކޮލިފައިވުމަށް ކަމަށެވެ.

ނަސީހު ވިދާޅުވީ މިހާރު ޓީމުގައި ތިބި ކުޅުންތެރިންނާއި އެކު އަމާޒަށް ވާސިލު ވެވޭނެ ކަމުގެ ވަރަށް ބޮޑު ޔަގީންކަމެއް ލިބިފައިވާ ކަމަށެވެ.