ދަ ގްރާންޑޭއިން މަހިބަދޫ ބަލިކޮއްފި

ދެވަނަ ޑިވިޝަން ފުޓުބޯޅަ މުބާރާތުގައި މަހިބަދޫ ސްޕޯޓްސް ކުލަބުގެ މައްޗަށް ދަ ގްރާންޑޭ އަމީގޯސް ނިއު ޖެނެރޭޝަން ސްޕޯޓްސް ކުލަބުން ކުރިހޯދައިފި އެވެ. ބުރާސްފަތި ދުވަހު ހަވީރީ މާފަންނު ޓާފް ދަނޑުގައި ކުޅުނު މެޗް ދަ ގްރާންޑެއިން ކާމިޔާބުކުރީ 4-0 ގެ ނަތީޖާއަކުންނެވެ.

ގަދަ އަވީގައި ކުޅެމުންދިޔަ ފުރަތަމަ ހާފުގެ ވަރަށް ކުރީކޮޅުގައި ދަ ގްރާންޑޭއިން ވަނީ މެޗުގެ ލީޑު ނަގާފަ އެވެ. ފުރަތަމަ ހާފުގެ 2 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ އެޓީމުގެ ބިދޭސީ ކުޅުންތެރިޔާ އޭންޖަލް ކަރަސްކޯސާ އެވެ. މި ލަނޑަށްފަހު ދަ ގްރާންޑޭއިން ވަނީ ގިނަ ވަގުތު ބޯޅަ ހިފަހައްޓައި މެޗުގެ ކޮންޓްރޯލް އަތުލާފައެވެ. އެގޮތުން އެޓިމުން، މަހިބަދޫގެ ހާފުތެރޭގައި ބޯޅަ ހިފަހައްޓައި އިތުރު ލަނޑެއް ޖެހޭތޯ މަސައްކަތްކުރިއެވެ. ނަމަވެސް ގަދަ ހޫނުގައި ކުޅެން ޖެހުމުން ދެޓީމަށްވެސް މާ އެދެވޭ ހަމަލާތަކެއް އުފެއްދިފައެއް ނުވެއެވެ. އެގޮތުން ފުރަތަމަ ހާފް ނިމިގެންދިޔައީ 1-0 ގެ ނަތީޖާއަކުން ދަ ގްރާންޑޭ ކުރީގައި އޮވެގެންނެވެ.

ފުރަތަމަ ހާފާ ހިލާފަށް ދެވަނަ ހާފުގައި ދަ ގްރާންޑޭގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން އެޓީމުން ވަނީ ކުޅުން އިތުރަށް ވަރުގަދަކޮށް އިތުރު ލަނޑުތަކެއް ކާމިޔާބުކޮށްފައެވެ. މެޗުގެ 56 ވަނަ މިނެޓުގައި ގްރާންޑޭގެ 2 ވަނަ ލަނޑު އެޓީމަށް ކާމިޔާބުކޮށްދިނީ އެޓީމުގެ ބިދޭސީ ކުޅުންތެރިޔާ ޕައުލޯ ރޮބޭރިއޯ އެވެ. މާ ގިނަ އިރުތަކެއް ނުވަނީސް އެޓީމުން ވަނީ އިތުރު ލަނޑެއް ކާމިޔާބުކޮށް ލީޑު އިތުރަށް ފުޅާކޮއްފައެވެ. 63 ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ އަޔާޒް އަހުމަދު އެވެ. މެޗުގެ ފަހު ލަނޑު 87 ވަނަ މިނެޓުގައި އެޓީމަށް ކާމިޔާބުކޮއްދިނީ ފުރަތަމަ ލަނޑުވެސް އެޓީމަށް ކާމިޔާނުކޮއްދިން ކުޅުންތެރިޔާ އޭންޖަލް ކަރަސްކޯސާ އެވެ.

މުބާރާތުގައި ދެން މެޗެއް ކުޅޭނީ އަންނަ ހޮނިހިރު ދުވަހު އެވެ. އެދުވަހު ކުޅޭ މެޗުގައި ބައްދަލުކުރާނީ ކްލަބް ޕީކޭ އާއި ބީޖީ ސްޕޯޓްސް ކުލަބެވެ.