އެވޯޑް ސެރެމަނީ އެއްގައި ބައިވެރިވި ބައެއްގެ ތެރެއިން 12 މީހުން ހީޓް ސްޓްރޯކް ޖެހިގެން މަރުވެއްޖެ
17 އެޕްރީލު 2023 | ހޯމަ 17:14މި އެޕްރިލް މަހަކީ އިންޑިޔާ ދުށް އެންމެ ހޫނު ގަދަ އެއް މަސް ކަމަށް ވޭ
އިންޑިޔާގައި އިވެންޓް ބޭއްވި ތަން
އިންޑިޔާގެ މަހާރަޝްތުރާ ސްޓޭޓްގައި ބޭއްވި އިނާމު ދިނުމުގެ ރަސްމިއްޔާތެއްގައި ބައިވެރިވި އެތައްހާސް މީހުންގެ ތެރެއިން 12 މީހުން ހޫނު ގަދަވުމުގެ ސަބަބުން މަރުވެއްޖެއެވެ. މަރުވި މީހުންގެ އިތުރުން އެތައް ބަޔަކަށް ސިއްހީ މައްސަލަތައް ކުރިމަތިވެ ހޮސްޕިޓަލްގައި އެޑްމިޓްކޮށްފައި ވާކަމަށްވެސް ޚަބަރުތައް ބުނެއެވެ.
ސަރުކާރުން ބޭއްވި އިނާމުދިނުމުގެ ރަސްމިއްޔާތު ބާއްވާފައިވަނީ އެއްވެސް ހިޔަލެއް ނެތް، ހާމަޔަށް އޮތް ކުޅިވަރު ސްޓޭޑިއަމެއްގައެވެ. މިއީ ފާހަގަކޮށްލެވޭ ސޯޝަލް އެކްޓިވިސްޓެއްގެ މަސައްކަތްތައް ފާހަގަކޮށް އިނާމު ދިނުމަށް ބޭއްވި ރަސްމިއްޔާތެއް ކަމަށް ވެއެވެ. އާދީއްތަ ދުވަހު ބޭއްވި ރަސްމިއްޔާތުގައި އެތައްހާސް ބަޔަކު ބައިވެރިވެފައިވާއިރު، ގިނަ ބަޔަކު ވަނީ ޑީހައިޑްރޭޓް ވެގެން އެކަމުގެ ޝަކުވާކޮށްފައި ކަމަށް ވެއެވެ. އިވެންޓްގައި ބައިވެރިވި ފަރާތްތަކަށް ފެނާއި ޖޫސް އަދި ލުއިކާނާ ފޯރުކޮށްދިން ކަމަށް ސަރުކާރުން ބުނާއިރު، އިދިކޮޅު ފަރާތްތަކުން ދަނީ އިވެންޓްގެ އިންތިޒާމް ރަނގަޅު ނޫންކަމަށް ބުނެ އެކަމަށް ފާޑުކިޔަމުންނެވެ.
އިވެންޓް ބޭއްވި ސިޓީ ކަމަށްވާ ނަވީ-މުމްބާއީގެ ހޫނުމިން އާދީއްތަ ދުވަހު 38 ޑިގްރީއަށް އަރާފައި ވެއެވެ. އަދި މި އެޕްރިލް މަހަކީ އިންޑިޔާ ދުށް އެންމެ ހޫނު ގަދަ އެއް މަސް ކަމަށް ވާއިރު، ސިއްހީ މާހިރުން ދަނީ ހެނދުނު 11ން މެންދުރުފަހު 4 ޖެހުމާއި ދެމެދު ބޭރަށް ނިކުމެ ނޫޅުމަށް އާންމުންނަށް އިލްތިމާސް ކުރަމުންނެވެ.
