ސަޑިއޯ މާނޭއާ ދެމެދު ހިނގައިދިޔަ ހަމަނެޖެހުމާއެކު، ފުރަތަމަ ފަހަރަށް ލެރޯއީ ސާނޭ ފެނިލިއިރު އޭނާގެ ތުންފަތަށް ބޮޑު އަނިޔާއެއް ލިބިފައިވާކަން ހާމަވެއްޖެ އެވެ.

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި މެންޗެސްޓަރ ސިޓިއާ ދެކޮޅަށް ކުޅުނު މެޗުގައި އެ ދެ ކުޅުންތެރިންގެ މެެދުގައި ވަނީ ޒުވާބެއް ހިނގައިފަ އެވެ. އެ މެޗުގައި މާނޭ ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ. މާނޭ ދަނޑު މައްޗަށް އެރުމާއެކު، ސާނޭ އާއި މާނޭއާ ދެމެދު ވަނީ ޒުވާބެއްކޮށް، ހިތްހަމަ ނުޖެހުން ފާޅުކޮށްފަ އެވެ. ސިޓީއާ ދެކޮޅަށް ކުޅެ 3-0 އިން ބަޔާން ބަލިވި މެޗަށްފަހު ބަޔާންގެ ޗޭންޖިން ރޫމުގައި ދެ ކުޅުންތެރިން ތަޅައިގެނެފައިވާ ކަމަށް ރިޕޯޓުތައް ބުންޏެވެ. އަދި އެ ދެ ކުޅުންތެރިން ދުރުކޮށްފައި ވަނީ ބަޔާންގެ އެހެން ކުޅުންތެރިން ކަމަށް ވެސް ރިޕޯޓުތައް ބުންޏެވެ.

އެ މައްސަލައިގައި ބަޔާނުން ވަނީ މާނޭ އެއް މެޗަށް ސަސްޕެންޑުކޮށްފަ އެވެ. އެހެންކަމުން ޖަރުމަނު ލީގުގައި އެންމެ ފަހުން ހޮފެންހައިމާ ދެކޮޅަށް ބަޔާން ކުޅުނު މެޗުގައި މާނޭ ޓީމުގައި ހިމަނާފައެއް ނުވެ އެވެ. ނަމަވެސް އެ މެޗުގައި ސާނޭ ވަނީ ޓީމުގައި ހިމަނައިފަ އެވެ. މެޗުގެ ފުރަތަމަ 11 ގައި ހިމެނިގެން ސާނޭ ކުޅެން ނިކުތްއިރު، އޭނާގެ ތުންފަތް މަތިން ހުރީ އަނިޔާގެ އަސަރު ފެންނާށެވެ. ސާނޭގެ ތުންފަތަށް ލިބިފައިވާ އަނިޔާ އަށް ބަލާއިރު، އެއީ ތަޅައިގަނެގެން ލިބިފައިވާ އަނިޔާއެއްކަން ހާމަވަން ހުއްޓެވެ. އޭރު އޭނާގެ ތުންފަތް ހުރީ ކޮންމެވެސް ވަރަށް ދުޅަ ވެސް ވެފަ އެވެ. ނަމަވެސް އެކަމުގައި ސާނޭ މިހާތަނަށް ވަކި އެއްޗެއް ބުނެފައެއް ނުވެ އެވެ.

އެ މައްސަލައިގައި ބަޔާންގެ ކޯޗު ތޯމަސް ޓުޗެލް ވަނީ މާނޭ ދިފާއުކޮށްފަ އެވެ. ޓުޗެލް ބުނެފައި ވަނީ މާނޭ އެނގޭތާ ވަރަށް ދުވަސްވެއްޖެ ކަމަށާއި، މާނޭއަކީ ކިހާ ޕްރޮފެޝަނަލް ކުޅުންތެރިޔެއްކަންވެސް އެނގޭކަމަށެވެ. އޭނާ ބުނީ މާނޭ ކަންތައްކުރާނެ ގޮތްވެސް ވަރަށް ރަނގަޅަށް އެނގޭކަމަށާއި، މާނޭ ކުށްވެރިވާނެ ކަމެއް ނުކުރާނެކަމަށް ގަބޫލުކުރާ ކަމަށެވެ. ނަމަވެސް ހިނގައިދިޔަ ކަންތައްތަކަކީ ކޯޑް އޮފް ކޮންޑަކްޓާ ޚިލާފު ކަމެއް ކަމަށާއި، އެކަމުގައި މާނޭ މިހާރު މައާފަށްވެސް އެދިފައިވާކަމަށާއި، އެހެެންކަމުން މިހާރު އެ މައްސަލަ ނިމުނީ ކަމަށެވެ.