މުއްދަތު ހަމަވިއިރު ޖަލްސާގެ ގާނޫނީ ކަންކަން ފުރިހަމަކުރީ 5 ކުޅިވަރަކުން
ފުޓްބޯޅަ އެސޯސިއޭޝަނުން ވަނީ އަހަރީ ޖަލްސާ ފަސްކޮށްދިނުމަށް އެދިފައި
ހޭންޑްބޯޅަ އެސޯސިއޭޝަންގެ އަހަރީ އާންމު ޖަލްސާގެ ތެރެއިން
ކޮންމެ އަހަރެއްގެ ވެސް މާޗު މަހުގެ 31ގެ ކުރިން ބާއްވަންޖެހޭ ކަމަށް ގާނޫނުގައި ބުނެފައިވާ އަހަރީ އާއްމު ޖަލްސާ މިހާތަނަށް ބާއްވައި ބަޖެޓް ފާސްކޮށްފައިވަނީ އެންމެ ފަސް ކުޅިވަރު އެސޯސިއޭޝަނުންކަން ޔަގީންވެއްޖެ އެވެ.
ރާއްޖޭގައި ރަސްމީކޮށް ހިންގާ 18 ގައުމީ ކުޅިވަރު އެސޯސިއޭޝަން އެބައޮތެވެ. މީގެ ތެރެއިން މިހާތަނަށް ގާނޫނުގައި ބުނެފައިވާ ޖަލްސާ ބާއްވައި ކަންކަން ތަރުތީބުކޮށްފައިވަނީ ބޮޑީބޯޑިން އެސޯސިއޭޝަނާއި ހޭންޑްބޯޅަ އެސޯސިއޭޝަން އަދި ބެޑްމިންޓަން އެސޯސިއޭޝަނާއި ބޮޑީބިލްޑިން އެސޯސިއޭޝަނުގެ އިތުރުން ހުރިހާ ކުޅިވަރެއްގެ ކަންކަން ބަލަހައްޓަމުން އަންނަ އެއް އިދާރާ ކަމަށްވާ މޯލްޑިވްސް އޮލިމްޕިކް ކޮމިޓީންނެވެ.
ކުޅިވަރު އެސޯސިއޭޝަންތަކުގެ ތެރެއިން އަހަރީ އާއްމު ޖަލްސާ ނުބޭއްވުމުގެ މައްސަލަ އެންމެ ބޮޑުވެފައިވަނީ ވޮލީބޯޅަ އެސޯސިއޭޝަނުގަ އެވެ. އެތަނުގެ އަހަރީ އާއްމު ޖަލްސާ ނުބާއްވައި ހިންގާތާ ތިން އަހަރުވެއްޖެކަމަށް އެކްސްކޯ މެންބަރުން ވެސް ވަނީ ބުނަން ފަށައިފަ އެވެ.
އެސޯސިއޭޝަންތަކުގެ ކަންކަން ވަރަށް ގާތުން ބަލަމުންދާ ކުޅިވަރާ ބެހޭ މިނިސްޓްރީގެ އިސް އޮފިޝަލަކު ނަން ނުޖެހުމަށް އެދެމުން މިކަންކަން ޔަގީންކޮށްދިނެވެ. އަދި ބައެއް އެސޯސިއޭޝަންތަކުން ވެސް ވަނީ މިކަން ކަށަވަރުކޮށްދީފަ އެވެ.
މާޗު މަހުގެ 31 ވަނަ ދުވަހުގެ ކުރިން އަހަރީ އާއްމު ޖަލްސާ ބާއްވައި ކުރީ އަހަރުގެ ރިޕޯޓް ހުށަހަޅައި ކުރިއަށް އޮތް އަހަރުގެ ބަޖެޓް ފާސްކުރުމަކީ ކުލަބު ޖަމިއްޔާތަކުގެ ގާނޫނުގެ ދަށުން އެސޯސިއޭޝަންތަކަށް މަޖުބޫރު ކަމެކެވެ.
ނަމަވެސް ކުޅިވަރު އެސޯސިއޭޝަންތައް ހިންގެވުމުގައި ވަރަށް އިސްދައުރެއް އަދާކުރައްވާފައިވާ އަދި މިހާރު ވެސް އެކަންކަމުގައި ޝާމިލްވެ އުޅުއްވާ އިސް ބޭފުޅަކު ވިދާޅުވީ މާޗު މަހުގެ ނިޔަލަށް އަހަރީ ރިޕޯޓް ހުށަހަޅައި ބަޖެޓް ފާސްކުރަން ޖެހުމަކީ އެސޯސިއޭޝަންތަކަށް ދިމާވާ ވަރަށް ބޮޑު ދައްޗެއް ކަމަށެވެ. ސަބަބަކީ އިންޓަ ސްކޫލް ފަދަ ގިނަ މުބާރާތްތަކައް ބާއްވަން އެސޯސިއޭޝަންތަކުން އަވަދިނެތި އުޅުމެވެ.
ރާއްޖޭގެ އެންމެ ބޮޑު އަދި އެންމެ ބުރަބޮޑު އެސޯސިއޭޝަނަކީ ފުޓްބޯޅަ އެސޯސިއޭޝަން އޮފް މޯލްޑިވްސް އެވެ. އެންމެ ގިނަ ބައެއްގެ ލޯ އަމާޒުވާ އެސޯސިއޭޝަނަކީ ވެސް އެއީ އެވެ. އެފްއޭއެމުގެ ކޮންގްރެސް އޮތީ މި މަމަހުގެ 21ގަ އެވެ. ކުރިން ވާހަކަދެއްކި ޔޫތު މިނިސްޓްރީގެ އޮފިޝަލް ވިދާޅުވީ އެފްއޭއެމުން އޮތީ އަހަރީ ޖަލްސާ ލަސްކުރުމަށް މިނިސްޓްރީގައި އެދިފައި ކަމަށެވެ. ކުރީގެ އެޑްމިނިސްޓްރޭޝަންގައި އެފްއޭއެމުގެ އަހަރީ ޖަލްސާ ނުބާއްވައި ބަޖެޓް ފާސްނުކޮށް ހިންގި ނަމަވެސް ބައްސާމް އަދީލް ޖަލީލް ރައީސް ކަމަށް ވަޑައިގެންނެވި ފަހުން އެފްއޭއެމުން މިކަން ގަވާއިދުން ކުރަމުންގެންދެ އެވެ.
