ކުޅިވަރު ކްލަބް ޖަމިއްޔާތައް ކޮމިޝަނާ އޮފް ސްޕޯޓްސް އޮފީހުގައި  ރަޖިސްޓްރީވުމުގެ މުއްދަތު ހަމަވާއިރު، ބޮޑެތި ކްލަބް ޖަމިއްޔާތައް އެ ކޮމިޝަންގައި ރަޖިސްޓްރީކޮށްފައިވާ ކަމަށް ސްޕޯޓްސް ކޮމިޝަނަރ އަހުމަދު ނަޝީދު (ޑޭވް) ވިދާޅުވެއްޖެއެވެ.

ރާއްޖެއެމްވީ އަށް ދެއްވި އިންޓަވިއުއެއްގައި ޑޭވް ވިދާޅުވީ، ރަޖިސްޓްރީވުމުގެ ފުރުސަތު އަލުން ހުޅުވާލާފައިވާއިރު، ރަޖިސްޓްރީވުމަށް އެދި މާލެއިން އަދި ރާއްޖެތެރެއިން ގިނަ އަދަދެއްގެ ކްލަބް ޖަމިއްޔާތަކުން ފޯމް ހުށަހަޅާފައިވާ ކަމަށެވެ. އެހެން ނަމަވެސް އޭނާ ވިދާޅުވީ، އަދިވެސް ބައެއް ކްލަބް ޖަމިއްޔާތަކުން ރަޖިސްޓްރީ ނުކުރާ ކަމަށާއި، އެ ކްލަބް ޖަމިއްޔާތަކުން މުއްދަތުހަމަވުމުގެ ކުރިން ރަޖިސްޓްރީ ކުރައްވާނެ ކަމަށް އުންމީ ދުކުރައްވާ ކަމަށެވެ.

ކްލަބް ޖަމިއްޔާތައް ރަޖިސްޓްރީކުރަން ތިން ފަހަރެއްގެ މަތިން ވަނީ މުއްދަތު އިތުރު ކޮށްފައެވެ. މީގެ ކުރިން ޖުލައި މަހުގެ 20 ވަނަ ދުވަހަށް ވެސް މުއްދަތެއް ކަނޑައަޅާފައިވާއިރު، އޯގަސްޓް މަހުގެ 20 ވަނަ ދުވަހުގެ ނިޔަލަށް ވެސް މުއްދަތެއް ކަނޑައެޅިއެވެ. އޯގަސްޓް މަހު ކޮމިޝަނާ އޮފް ސްޕޯޓްސް އިން ނެރުނު އިއުލާނެއްގައި ބުނެފައިވާ ގޮތުން ކްލަބް ޖަމިއްޔާތައް ރަޖިސްޓްރީކުރުމުގެ މުއްދަތު ވަނީ އަންނަ ނޮވެމްބަރު މަހުގެ 20 ވަނަ ދުވަހަށް އިތުރު ކޮށްފައެވެ.

ޔޫތު މިނިސްޓްރީން މައުލޫމާތު ދޭ ގޮތުގައި، މި ތާރީހުގެ ފަހުން ފޯމް ހުށަހަޅާ ކްލަބް ޖަމްއިއްޔާތައް ރަޖިސްޓްރީ ކޮށްދޭނީ ޖަމްއިއްޔާތަކުން ޔޫތު މިނިސްޓްރީއަށް ހުށަހަޅާފައިވާ ތާރީހުން ފެށިގެންނެވެ. އެގޮތުން މި ތާރީހުގެ ފަހުން، ކޮމިޝަނަރ އޮފް ސްޕޯޓްސް އޮފީހުގައި ރަޖިސްޓްރީ ވެގެން މެނުވީ އެއްވެސް ވާދަވެރި ކުޅިވަރު މުބާރާތެއް އިންތިޒާމުކޮށް ހިންގުމާއި، ވާދަކުރުމުގެ ފުރުސަތު ވެސް ނޯންނާނެ ކަމަށް އެ މިނިސްޓްރީން ވަނީ މި ބަޔާނުގައި ބުނެފައެވެ.

ކުޅިވަރު ކްލަބް ޖަމްއިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިދު އަދި ރަޖިސްޓްރީވުމަށް ހުށަހަޅަން ޖެހޭ ފޯމް، ޔޫތުމިނިސްޓްރީގެ ވެބްސައިޓުން ލިބެން ހުންނާނެއެވެ.

ކުޅިވަރު ކްލަބް ޖަމްއިއްޔާތައް ކޮމިޝަނަރ އޮފް ސްޕޯޓްސްގައި ރަޖިސްޓްރީކުރަން ނިންމާފައި ވަނީ، ދިވެހިރާއްޖޭގެ ކުޅިވަރު ގާނޫނުގެ 5 ވަނަ މާއްދާގައި، އެއްވެސް ކުޅިވަރެއް ނުވަތަ ކުޅިވަރު ހަރަކާތަކަށް ނިސްބަތްވާ ކްލަބް، ނުވަތަ ޓީމް، ނުވަތަ ޖަމްއިއްޔާއެއް ގާއިމްކޮށް ހިންގޭނީ އެ ގާނޫނުގެ ދަށުން، ކޮމިޝަނަރ އޮފް ސްޕޯޓްސްގައި ރަޖިސްޓްރީ ކުރެވިގެން ކަމަށް ކަނޑައެޅުމާ ގުޅިގެންނެވެ.