ކްލަބް ޖަމިއްޔާތައް ރަޖިސްޓްރީކުރުމުގެ މުއްދަތު އަނެއްކާ ވެސް އިތުރުކޮށްފި

އެޓާނީ ޖެނެރަލްގެ ލަފާގެ ލަފާގެ މަތިން ކުޅިވަރު ކްލަބް ޖަމިއްޔާތައް ކޮމިޝަނާ އޮފް ސްޕޯޓްސް އޮފީހުގައި ރަޖިސްޓްރީވުމުގެ ފުރުސަތު އަނެއްކާވެސް އިތުރުކޮށްފި އެވެ.

މިއީ ކްލަބް ޖަމިއްޔާތައް ރަޖިސްޓްރީ ކުރުމަށް މުއްދަތު އިތުރުކުރި ތިންވަނަ ފަހަރެވެ. މީގެ ކުރިން ޖުލައި މަހުގެ 20 ވަނަ ދުވަހަށްވެސް މުއްދަތެއް ކަނޑައަޅާފައިވާއިރު، މި މަހުގެ 20 ވަނަ ދުވަހުގެ ނިޔަލަށްވެސް މުއްދަތެއް ކަނޑައެޅިއެވެ.

އެހެންނަމަވެސް ކޮމިޝަނާ އޮފް ސްޕޯޓްސް އިން ނެރުނު އިއުލާނެއްގައި ބުނެފައިވާ ގޮތުން ކްލަބް ޖަމިއްޔާތައް ރަޖިސްޓްރީކުރުމުގެ މުއްދަތު ވަނީ އަންނަ ނޮވެމްބަރު މަހުގެ 20 ވަނަ ދުވަހަށް އިތުރުކޮށްފައެވެ.

ޔޫތު މިނިސްޓްރީން މައުލޫމާތު ދޭ ގޮތުގައި، މި ތާރީހުގެ ފަހުން ފޯމް ހުށަހަޅާ ކްލަބް ޖަމްއިއްޔާތައް ރަޖިސްޓްރީ ކޮށްދޭނީ ޖަމްއިއްޔާތަކުން ޔޫތު މިނިސްޓްރީއަށް ހުށަހަޅާފައިވާ ތާރީހުން ފެށިގެންނެވެ. އެގޮތުން މި ތާރީހުގެ ފަހުން، ކޮމިޝަނާ އޮފް ސްޕޯޓްސް އޮފީހުގައި ރަޖިސްޓްރީ ވެގެން މެނުވީ އެއްވެސް ވާދަވެރި ކުޅިވަރު މުބާރާތެއް އިންތިޒާމުކޮށް ހިންގުމާއި، ވާދަކުރުމުގެ ފުރުސަތު ވެސް ނޯންނާނެ ކަމަށް އެ މިނިސްޓްރީން ވަނީ މި ބަޔާނުގައި ބުނެފައެވެ.

ރާއްޖެއެމްވީ އަށް މައުލޫމާތު ދެއްވަމުން ކޮމިޝަނާ އޮފް ސްޕޯޓްސް އަހުމަދު ނަޝީދު (ޑޭވް) ވިދާޅުވީ، ކުޅިވަރު ކްލަބް ޖަމިއްޔާތައް ރަޖިސްޓްރީކުރަންޖެހޭކަން އަދިވެސް ގިނަ ފަރާތްތަކަށް ނޭގޭ ކަމަށާއި، އެގޮތުން މުއްދަތު އިތުރުކުރީ އެފަރާތްތަކަށް ރަޖިސްޓްރީކުރުމަށް ފުރުސަތު ދިނުމުގެ ގޮތުން ކަމަށެވެ.

ޑޭވް ވިދާޅުވީ، ބައެއް އެސޯސިއޭޝަންތަކުން މިހާރުވެސް އަންނަނީ ރަސްޓްރޭޝަނަށް އެދި ފޯމް ހުށަހަޅުއްވަމުން ކަމަށާއި، މިހާތަނަށް 8 އެސޯސިއޭޝަނެއްގެ އިތުރުން ނުވަ ކްލަބަކުން ވަނީ ކޮމިޝަންގައި ރަޖިސްޓްރީކޮށްފައި ކަމަށެވެ.

ކުޅިވަރު ކްލަބް ޖަމްއިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިދު އަދި ރަޖިސްޓްރީވުމަށް ހުށަހަޅަން ޖެހޭ ފޯމް، ޔޫތު މިނިސްޓްރީގެ ވެބްސައިޓުން ލިބެން ހުންނާނެއެވެ.

ކުޅިވަރު ކްލަބް ޖަމްއިއްޔާތައް ކޮމިޝަނަރ އޮފް ސްޕޯޓްސްގައި ރަޖިސްޓްރީކުރަން ނިންމާފައި ވަނީ، ދިވެހި ރާއްޖޭގެ ކުޅިވަރު ގާނޫނުގެ 5 ވަނަ މާއްދާގައި، އެއްވެސް ކުޅިވަރެއް ނުވަތަ ކުޅވަރު ހަރަކާތަކަށް ނިސްބަތްވާ ކްލަބް، ނުވަތަ ޓީމް، ނުވަތަ ޖަމްއިއްޔާއެއް ގާއިމްކޮށް ހިންގޭނީ އެ ގާނޫނުގެ ދަށުން، ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރެވިގެން ކަމަށް ކަނޑައެޅުމާ ގުޅިގެންނެވެ.