އިސްކުރާނީ ނިއު، ސިޔާސީ ކަންކަން އަންނާނީ އެއަށްފަހު: މޮސްޓާ

އެންމެ ފުރަތަމަ އިސްކުރާނީ ނިއުރޭޑިއަންޓްގެ ކަންކަން ކަމަށާއި އެހެން ކަންކަން އަންނާނީ ނިއުއަށް ފަހުގައި ކަމަށް ނިއުރޭޑިއަންޓް ސްޕޯޓްސް ކްލަބްގެ ޗެއާމަން ކަމާއި ދާދިފަހުން ހަވާލުވި ރައްޔިތުންގެ މަޖިލީހުގެ ނޮޅިވަރަމު ދާއިރާގެ މެމްބަދު މުހައްމަދު ނަޝީދު އަބްދުﷲ (މޮސްޓާ) ވިދާޅުވެއްޖެއެވެ.

ރާއްޖެއެމް.ވީ އަށް ދިން އިންޓަރވިއުއެއްގައި މޮސްޓާ ވިދާޅުވީ ނިއުރޭޑިއަންޓް އަކީ އޭނާ އަބަދުވެސް ސަޕޯޓުކުރި ކްލަބް ކަމަށާއި އެކަން ނިއުގެ ސަޕޯޓަރުންނަށް އިނގޭނެ ކަމަށެވެ. ރާއްޖޭގައި ސިޔާސީ ކަންކަން އެންމެ ބޮޑުވީ 2005 ވަނަ އަހަރުގެ ފަހުން ކަމަށާއި އޭގެ މާކުރިން ވެސް އޭނާ ވާނީ ދަނޑަށް ގޮސް ނިއުގެ ކަންކަމުގައި އުޅެފައި ކަމަށާއި އޭނާގެ އަމާޒަކީ ނިއު ވެއްޓިފައިވާ އަނދަވަޅުން އަރައިގަނެ އަލުން ނިއު، ނިއުގެ އަސްލު މަގާމަށް (ރަސްކަމަށް) ގެނައުން ކަމަށެވެ.

ނިއު ރޭޑިއަންޓުގެ ކުރީގެ ޗެއާމަން އަދި މިހާރުގެ ޓުއަރިޒަމް މިނިސްޓަރ އަލީ ވަހީދަށް ތައުރީފު ކުރައްވަމުން މޮސްޓާ ވިދާޅުވީ އަލީ ވަހީދު ޗެއާމަން ކަމުގައި ހުންނެވިއިރު އަލީ ވަހީދާއެކު ނިއުގެ ކަންކަމުގައި މަސައްކަތް ކުރެވުމަކީ ލިބުނު ވަރަށް ބޮޑު ފަހުރެއް ކަމަށެވެ. އަދި އަލީ ވަހީދުގެ ޗެއާމަން ކަމުގެ ދަށުން ނިއުއިން ވަނީ އެއްވެސް މެޗަކުން ބަލިނުވެ، ދިވެހި ލީގު ކާމިޔާބުކޮށްފައި ކަމަށާއި، އޭއެފްސީ ކަޕްގެ ދެވަނަ ބުރަށް ދެވަނަ ފަހަރަށް ނިއުއިން ދަތުރު ކޮށްފައިވާކަން މޮސްޓާ ފާހަގަކުރެއްވިއެވެ.

އޭރުގެ ނިއުރޭޑިއަންޓް އަކީ ރާއްޖޭގެ ފުޓުބޯޅައިގެ ރަސްގެފާނު ކަމަށް ވެސް އެންމެ ކުޑަ އިރުއްސުރެ ނިއުއަށް ސަޕޯޓުކުރަމުން އަންނަ މޮސްޓާ ވިދާޅުވިއެވެ.

މޮސްޓާގެ ނަޒަރުގައި އަލީ ވަހީދާއި އެކު ވެސް މަސައްކަތް ކުރެވުނީ ސިޔާސީ ވާދަވެރިކަން އެކަހެރިކޮށް ކުޅިވަރަށް ސަމާލުކަންދީގެން ކަމަށެވެ. މޮސްޓާ ވިދާޅުވީ ސިޔާސީ ކަންކަމަކީ ވަކި އެއްޗެއް ކަމަށާއި ކުޅިވަރަކީ ވަކި އެއްޗެއް ކަމަށްވެސް ވިދާޅުވެފައެވެ.

ނިއުގައި މިހާރު މިއޮތް ބޯޑަކީ ނިއުގެ ހުރިހާ ހިތާމައެއްގައި ބައިވެރިވާނެ ބޯޑެއް ކަމަށާއި ނިއު އަށް މޮޅެއް ލިބިއްޖެނަމަ މިހާރުގެ ބޯޑު މެމްބަރުންގެ ލޮލުން އުފަލުން ކަރުނަ ފާއްދާލާނެ ކަމަށާއި ނިއުއަށް ދެރަ ގޮތެއް ވެއްޖެނަމަ ބޯޑު މެމްބަރުން އެކަމާއި ހިތާމަކޮށް ހަދާނެ މެމްބަރުންތަކެއް ކަމަށެވެ.

ފުޓްބޯޅައިގެ ހުރިހާ ކަމަކުން މިދިޔަ އަހަރު ނިއުރޭޑިއަންޓް ސަސްޕެންޑު ކުރިއިރު، ނިއުރޭޑިއަންޓުން ދިވެހި ކުޅުންތެރިންނަށް މުސާރައިގެ ގޮތުގައި 2.4 މިލިއަން ރުފިޔާ ދޭން އޭރު ޖެހުނެވެ. އެކަމަކު އެފްއޭއެމްގައި ހުރި ނިއުރޭޑިއަންޓުގެ ފައިސާއިން ދިވެހި ކުޅުންތެރިންނަށް ވަނީ މިހާރު މުސާރަ ދީފައެވެ.

ނަމަވެސް އަފްޣާނިސްތާނުގެ ޑިފެންޑަރު ހާރޫން އަމީރީ އަށް މުސާރައިގެ ގޮތުގައި އަދި އުސޫލުން ބޭރުން އެއްބަސްވުން ބާތިލުކޮށްފައިވާތީ 703،707 (ހަތްލައްކަ ތިންހާސް ހަތްސަތޭކަ ހަތް ރުފިޔާ) ދޭން ފީފާއިން ވަނީ ނިއުރޭޑިއަންޓަށް އަންގާފައެވެ. އަދި ކުރީގެ ކޯޗު ބެނާޑޯ ޓަވަރޭޒް އަށް 511،342 (ފަސްލައްކަ އެގާރަހާސް ތިންސަތޭކަ ސާޅީސްދެ ރުފިޔާ) ދޭންވެސް ވަނީ އަންގާފައެވެ.