ބެލިންހަމްގެ ސުވާލު ކުރުމުން ގާޑިއޯލާ: "ތިޔަށްވުރެ ރަނގަޅަށް ތައްޔާރުވާން ޖެހޭ"

ބޮރޫޝިއާ ޑޯޓްމަންޑަށް ކުޅެމުން އަންނަ އިނގިރޭސި މިޑްފީލްޑަރު, ޖޫޑް ބެލިންހަމް ހޯދުމަށް މެންޗެސްޓަރ ސިޓީން ބޭނުންވޭތޯ ސުވާލު ކުރުމުން ގާޑިއޯލާ ހިތްހަމަނުޖެހިއްޖެއެވެ.

އިނގިޜޭސި ޕްރިމިއަރ ލީގުގައި ސިޓީން ލެއިސްޓަރ ސިޓީއާ ދެކޮޅަށް ކުޅޭ މެޗުގެ ކުރިން އޮތް ޕްރެސް ކޮންފަރެންސްގައި ނޫސްވެރިޔަކު ވަނީ އެ ސުވާލު ގާޑިއޯލާއަށް އަމާޒުކޮށްފައެވެ. އެ ސުވާލާ ގުޅިގެން ގާޑިއޯލާ ފުރަތަމަ ބުނީ އޭނާ އެކަމުގައި ކޮމެންޓެއް ކުރަން ބޭނުންނުވާކަމަށާއި، ދޭނެ ކޮމެންޓެއް ނެތްކަމަށެވެ. އެއަށްފަހު ގާޑިއޯލާ ވަނީ ނޫސްވެރިޔާ ގާތު ސުވާލެއްކޮށްފައެވެ. އެއީ މިހާތަނަށް އައިއިރު ކިތައް ޕްރެސް ކޮންފަރެންސަށް އެ ނޫސްވެރިޔާ ހާޒިރުވެފައިވޭތޯއެވެ. އެއަށްފަހު އޭނާ ބުނީ އެ ސުވާލަށްވުރެ ބޮޑަށް ތައްޔާރުވާންޖެހޭނެ ކަމަށާއި، އެއަށްވުރެ ރަނގަޅު ސުވާލުވެސް ކުރެވޭނެކަމަށެވެ. ގާޑިއޯލާ ވަނީ އެހެން ސުވާލަކަށް ފުރުސަތު ދީފައެވެ.

އެ ޕްރެސްގައި އޭނާ ބުނީ ސިޓީން މަސައްކަތްކުރަނީ ތަށި ދިފާއުކުރަން ކަމަށާއި، އެ މަސައްކަތުގައި ކުރިއަށް އޮތީ މުހިންމު މެޗެއް ކަމަށެެވެ. އޭނާ ބުނީ ލީގުގައި ބާކީ އޮތް ތަނުގައި ޕޮއިންޓެއް ގެއްލުވާލައިގެން ހަމަޖެހުމެއް ނެތްކަމަށެވެ. މީގެ އިތުރުން އެންމެ ފަހުން ބަޔާން މިއުނިކާ ދެކޮޅަށް ކުޅުނު މެޗުން ލިބުނު ފުރިހަމަ މޮޅާއެކު ސިޓީ އޮތީ ރަނގަޅު ރޫހެއްގައި ކަމަށާއި، ޓީމާމެދު އޭނާއަށް އިތުބާރު އެބައޮތް ކަމަށެވެ. ގާޑިއޯލާ ބުނީ، ޓީމުގައި އޮތް ރޫހު ކުޅުންތެރިން ދައްކަންޖެހޭނީ ދަނޑުމަތިން ކަމަށާއި، ޓީމުގެ ޓާގެޓަށް ވާސިލްވުމަށް ކުރިއަށް އޮތީ މުހިންމު ދުވަސްތަކެއް ކަމަށެވެ.

ޕްރިމިއަރ ލީގުގައި ސިޓީގެ އިއްތިހާދު ސްޓޭޑިއަމްގައި ލެއިސްޓަރއާ ދެކޮޅަށް ނިކުންނާނީ ހޮނިހިރު ދުވަހުގެ ރޭ 21:30ގައެވެ.