ވޮޝިންގްޓަންގެ ބައްދަލުވުންތަކަށްފަހު އިތުރު ފަސް ބިލިއަން ޑޮލަރު ހަމަޖެހިއްޖެ: ޔޫކްރޭން
15 އެޕްރީލު 2023 | ހޮނިހިރު 02:10ލަންޑަނުގެ ކޮންފަރެންސަށްފަހު އިތުރު އެހީތެރިކަން ލިބޭނެކަމަށް ވިދާޅުވި
ޔޫކްރޭނުގެ ބޮޑުވަޒީރު ޑެނީސް ޝްމޭހަލް
އެމެރިކާގެ ވޮޝިންގޓަންގައި ކުރިއަށްދިޔަ ބައްދަލުވުންތަކަށްފަހު އިތުރު ފަސް ބިލިއަން ޑޮލަރުގެ އެހީ ހަމަޖެހިފައިވާ ކަމަށް, ޔޫކްރޭނުގެ ބޮޑުވަޒީރު ޑެނީސް ޝްމޭހަލް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ބައްދަލުވުންތަކަށްފަހު މީޑިއާތަކާ ބައްދަލުކުރައްވަމުންނެވެ. އެ ބައްދަލުވުންތައް ޝްމޭހަަލް ސިފަކުރެއްވީ ފޮނި ނަތީޖާ ފެނިގެންދިޔަ ބައްދަލުވުންތަކެއްގެ ގޮތުގައެވެ. މި އެހީއަކީ އެ ގައުމުން ރަޝިޔާއާ ދެކޮޅަށް ހަނގުރާމަ ކުރުމަށް ދޭ އެހީއެވެ.
ވޮޝިންގޓަންގައި ޔޫކްރޭނުގެ ބޮޑުވަޒީރު ކުރިއަށްގެންދެވި މި ބައްދަލުކުރެއްވުންތަކަކީ އެކި ގައުމުތަކަށް އެހީތެރިކަން ފޯރުކޮށްދޭ ބައިނަލްއަގުވާމީ އެކި އިންސްޓިޓިއުޓްތަކާއެކު ބޭއްވެވި ބައްދަލުކުރެއްވުންތަކެކެވެ. އެގޮތުން، އިންޓަރނޭޝަނަލް މަނިޓަރީ ފަންޑް (އައިއެމްއެފް)އާއި، ވޯލްޑް ބޭންކާއި، ޔޫރަޕިއަން އިންވެސްޓްމަންޓް ބޭންކުގެ އިސް ބޭފުޅުންނާ ވަނީ ބައްދަލުކުރައްވާފައެވެ.
މީގެ އިތުރުން އެމެރިކާގެ އިސް ބޭފުޅުންތަކަކާވެސް ބައްދަލުކުރައްވާފައި ވާކަމަށް ބޭރުގެ މީޑިއާތަކުން ރިޕޯޓް ކުރެއެވެ.
މި ބައްދަލުކުރެއްވުންތަކަށްފަހު ޝްމޭހަލް ވިދާޅުވީ، އިތުރު އެހީ ލިބޭނެކަމުގެ ޔަގީންކަން އޮތީ، ސްވިޒަލެންޑާއި ޑެންމާކު ހިމެނޭހެން ބައެއް ގައުމުތަކުން ކަމަށެވެ. އަދި ލަންޑަނުގައި އޮންނަ ކޮންފަރެންސަށްފަހު އިތުރު އެހީތައްވެސް ޔޫކްރޭނަށް ލިބޭނެކަމަށް އެމަނިކުފާނު ވިދާޅުވިއެވެ.
