އަޝްރަފް ހަކީމީގެ މުދާ މަންމަގެ ނަންމަތީގައި، ކުރީގެ އަނބިމީހާއަށް ލަނޑުދީފި

ޕީއެސްޖީ އަށް ކުޅޭ މޮރޮކޯގެ ޑިފެންޑަރު އަޝްރަފް ހަކީމީގެ މުދާ އޭނާގެ މަންމަގެ ނަންމަތީގައި ހުރުމުން ކުރީގެ އަނބިމީހާ، އޭނާގެ މުދަލުގެ ދެބައިކުޅަ އެއްބައި ހޯދަން ކުރި މަސައްކަތް ނާކާމިޔާބުވެއްޖެ އެވެ.

ތަޖުރިބާކާރު ޑިފެންޑަރުގެ ކުރީގެ އަންހެނުން ހިބާ އަބޫކް އޭނާ ގާތުން ވަރިވީ މިދިޔަ ޑިސެމްބަރު މަހު ނިމުނު ވޯލްޑްކަޕަށްފަހު އަންހެން ކުއްޖަކު ހަކީމީ އަށް ރޭޕްގެ ތުހުމަތު ކުރި ހިސާބުންނެވެ. މިކަމާމެދު ހަކީމީ ވަކިއެއްޗެއް ނުބުނެ އެވެ.

މިއާއެކު އޭނާގެ އަންހެނުން ހިބާ، މަސައްކަތް ފެށީ ހަކީމީގެ މުދަލުން ދެބައިކުޅަ އެއްބައި ހޯދުމަށެވެ. ނަމަވެސް ޝަރުއީ މަރުހަލާއިން މިކަން ނާކާމިޔާބުވުމުން ހިބާ ވަނީ ދިގު ބަޔާނެއް ސޯޝަލް މީޑިއާ އަށް ދޫކޮށްލާފަ އެވެ.

އޭނާ ބުނެފައިވަނީ މުއްސަނދި ފިރިމީހާގެ ހުރިހާ މުދަލަކާއި ފައިސާއެއް ހުރީ އޭނާގެ މަންމަ ފާތިމާގެ ނަންމަތީގައި ކަމަށެވެ. މަންމަގެ ނަމަށް މުދާ ބަދަލު ކުރުމަށް ހެދި އެގްރީމަންޓްގައިވާ ގޮތުގެ މަތީން ހަކީމީ ކަމަކަށް އެދި ބުނަންޖެހެނީ މަންމަ ގާތުގައި ކަމަށާއި އެއްޗެއް ގަންނަން ބޭނުންވިޔަސް އެކަން ކޮށްދެނީ މަންމަ ފާތިމާ ކަމަށެވެ. ހަކީމީ އަކީ ޕީއެސްޖީގައި މަހަކު މިލިއަނެއްހާ ޑޮލަރު ލިބޭ ކުޅުންތެރިއެކެވެ. ނަމަވެސް އޭނާގެ އެކައުންޓްގައި ފައިސާ ނުބަހައްޓައި މަންމަގެ އެކައުންޓްގައި ފައިސާ ބެހެއްޓި ސަބަބެއް ސާފެއްނުވެ އެވެ.

ރިޕޯޓްތައް ބުނާ ގޮތުން ހަކީމީ އަށް މަހަކު އެއް މިލިއަން ޔޫރޯ ލިބެ އެވެ. އަދި މި ފައިސާގެ ތެރެއިން 80 ޕަސެންޓް ފައިސާ ރައްކާކޮށްފައިވަނީ އޭނާގެ މަންމަގެ އެކައުންޓްގަ އެވެ. އަދި އޭނާގެ ނަމުގައި ގެއެއް، ކާރެއް، ގަހަނާއެއްގެ އިތުރުން އަންނައުނެއްހާ ހިސާބު ވެސް ނެތް ކަމަށެވެ.

އުމުރުން މިހާރު 36 އަހަރުގެ އަބޫކް އާއި 24 އަހަރުގެ ހަކީމީ ލޯބީގެ ގޮތުން ކުޅުނީ 2018 ވަނަ އަހަރު އެވެ. އަދި ހަކީމީގެ 70 މިލިއަން ޔޫރޯގެ މިލްކިއްޔާތުގައި އަބޫކް ބުނަނީ އޭނާގެ ދައުރު ވަރަށް ބޮޑުވާނެ ކަމަށެވެ. ނަމަވެސް ހަކީމީގެ ނަމުގައި މިހާރު އެއްވެސް މުދަލެއް ނެތުމުން އެތަކެތި ހޯދުމަށް ދައުވާކުރެވޭނެ އެއްވެސް ހައިސިއްޔަތެއް އަބޫކަށް ނެތްކަމަށް ޝަރުއީ މަރުހަލާގައި ވަނީ ނިންމާފަ އެވެ. ނަމަވެސް ހަކީމީގެ މިއަމަލަކީ އަބޫކް ވަރިވާން އެދުމުން ގަސްތުގައި ކޮށްފައިވާ ކަމެއް ކަމަށް ގިނަ ބަޔަކު ވަނީ ޝައްކުކުރަން ފަށައިފަ އެވެ.