ފްރާންސްގެ ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާއަކީ ވަރަށް ކަމުދާ ކުޅުންތެރިޔެއް ކަމަށް ސްޕެއިންގެ ރެއާލް މެޑްރިޑްގެ ކޯޗު ޒައިނުއްދީން ބުނެފިއެވެ.
ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ޕީއެސްޖީއާ ގުޅުނު ނޭމާ ހޯދުމަށް ރެއާލްއިން މަސައްކަތް ފަށާފައިވާ ކަމަށް ބައެއް މީޑިއާތަކުން ރިޕޯޓުކުރެއެވެ. އެގޮތުން އެ ޓީމުގެ އެންމެ މުހިންމު ކުޅުންތެރިޔާގެ ގޮތުގައި ގިނަ ބަޔަކު ދެކޭ ކްރިސްޓިއާނޯ ރޮނާލްޑޯއަށް މި ސީޒަނުގައި މާ އެދެވޭ ކުޅުމެއް ދެއްކެމުން ނުދިޔުމާއި ގުޅިގެން ރެއާލްއިން އޭނާގެ ބަދަލުގައި ނޭމާ ގެންނަން ބޭނުންވާ ކަމަށް ބައެއް މީޑިއާތަކުން ބުނެއެވެ. އެހެން ނަމަވެސް ޒިދާން ވަނީ މިކަމަށް ސީދާ ޖަވާބެއް ދޭން ދެކޮޅު ހަދާފައެވެ.
ނޫސްވެރިންގެ ބައްދަލުވުމެއްގައި ވާހަކަ ދައްކަމުން އޭނާ ބުނީ އަމިއްލަ ޓީމުގެ ކުޅުންތެރިން ނޫން އެހެން ޓީމުތަކުގެ ކުޅުންތެރިންގެ ވާހަކަ ދައްކަން ބޭނުންނުވާ ކަމަށާއި އެހެން ނަމަވެސް ފުޓްބޯޅައަށް ލޯބިކުރާ ކޮންމެ މީހަކަށް ވެސް ނޭމާއަކީ ކަމުދާނެ މީހެއް ކަމަށެވެ.
ބައެއް މީޑިއާތަކުން ބުނެފައިވާ ގޮތުގައި ނޭމާ ހޯދުމަށް ރެއާލްއިން ރޮނާލްޑޯ ޕީއެސްޖީއަށް ހުށަހަޅާނެއެވެ. މި ސީޒަނުގައި ރެއާލްގެ ފޯވާޑް ލައިންއަށް މާ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ސްޕެނިޝް ލަލީގާގައި އެ ޓީމުން ކުޅުނު މެޗުތަކުގައި އެ ޓީމުގެ ފޯވާޑުންނަށް ޖެހިފައިވަނީ ވަރަށް މަދު އަދަދެއްގެ ލަނޑުތަކެވެ. މިކަމާއި ގުޅިގެން އެ ޓީމުގެ ފޯވާޑް ލައިންއަށް ގިނަ ފާޑުކިޔުންތަކެއް އަމާޒުވެފައިވާއިރު ޒިދާންއަށް ވެސް ވަނީ މިކަން ހައްލުކުރުމަށް ގޮންޖެހުންތަކަކާއި ކުރިމަތިވެފައެވެ.
ރެއާލްގެ ދަށް ކުޅުމުގެ ސަބަބުން ޒިދާންގެ ވަޒީފާ ގެއްލިދާނެ ކަމަށް ބިރު ހީވެފައިވާއިރު އޭނާ ބުނީ އެއްވެސް ގޮތަކަށް ގޯސް ވިސްނުމެއް ގެންގުޅެން ބޭނުންނުވާ ކަމަށާއި އަބަދުވެސް ވިސްނަނީ ޕޮޒިޓިވްކޮށް ކަމަށެވެ. އޭނާ ބުނީ ފުޓްބޯޅައިގައި ކަންކަން ގޯސްކޮށް ހިނގާނެ ކަމަށާއި އެހެން ނަމަވެސް އޭނާއަކީ ވަޒީފާއަށް ބިރުން ފިލާނެ މީހެއް ނޫން ކަމަށެވެ. އަދި ކްލަބްގެ ސިޔާސަތުތައް ތަންފީޒު ކުރުމަށް އޭނާގެ ގާބިލިއްޔަތުކަން ތަންދިން މިންވަރަކުން މަސައްކަތް ކުރާނެ ކަމަށް ޒިދާން ބުނެފައިވެއެވެ.
ނޭމާއަށް ރެއާލްއިން ޝައުގުވެރިކަން ފާޅުކޮށްފައިވާއިރު އޭނާ ވަނީ އެ ޓީމުގެ ވާދަވެރި ބާސެލޯނާގައި ކާމިޔާބު ދުވަސްތަކެއް ވޭތުކޮށްފައެވެ. މިކަމާއި ގުޅިގެން އޭނާ ރެއާލްއާ ގުޅުމަކީ ވުމަށް ވުރެން ނުވުން ގާތްކަމެއްގެ ގޮތުގައި ގިނަ ބަޔަކު ސިފަކުރެއެވެ. ދުނިޔޭގެ ރެކޯޑު ޓްރާންސްފާ ފީއެއް ކަމަށްވާ 222 މިލިއަން ޔޫރޯއަށް ޕީއެސްޖީއަށް ބަދަލުވެ ނޭމާ އަންނަނީ އާދަޔާ ހިލާފް މޮޅު ކުޅުމެއް ދައްކަމުންނެވެ. ޕީއެސްޖީއިން އޭނާ ވިއްކާނުލާނެ ކަމަށް ބެލެވޭއިރު އަންނަ ހޫނު މޫސުމުގެ ޓްރާންސްފާގައި އޭނާ ހޯދުމަށް ރެއާލްއިން ބިޑުކުރަން ތައްޔާރުވަމުން އަންނަ ކަމަށް ގިނަ މީޑިއާތަކުން އަންނަނީ ބުނަމުންނެވެ.
