އަޝްރަފް ހަކީމީގެ ސޮއި ޕީއެސްޖީން ހޯދައިފި

އިންޓަ މިލާނަށް ކުޅެމުން އައި މޮރޮކޯގެ ޑިފެންޑަރު އަޝްރަފް ހަކީމީގެ ސޮއި ޕީއެސްޖީން ހޯދައިފިއެވެ.

އުމުރުން 22 އަހަރުގެ ޑިފެންޑަރު ޕީއެސްޖީއަށް ބަދަލުވީ ފަސް އަހަރުގެ އެއްބަސްވުމެއްގެ ދަށުންނެވެ. އެހެންކަމުން 2026 ވަނަ އަހަރުގެ ހޫނު މޫސުމުގެ ނިޔަލަށް އޭނާ ޕީއެސްޖީގައި މަޑުކުރާނެއެވެ. ރިޕޯޓުތައް ބުނާ ގޮތުން ހަކީމީގެ ސޮއި ހޯދުމަށް ޕީއެސްޖީން ވަނީ 60 މިލިޔަން ޔޫރޯ ޚަރަދުކޮށްފައެވެ. އަދި ބޯނަހުގެ ގޮތުގައި ޕީއެސްޖީން އިތުރު 11 މިލިޔަން ޔޫރޯ ޚަރަދުކުރާނެ ކަމަށްވެސް ރިޕޯޓުތައް ބުނެއެވެ.

މީގެ ކުރިން 2017 ވަނަ އަހަރު ރެއާލްގެ ސީނިއާ ޓީމުން ކެރިއަރު ފެށި ހަކީމީއަށް އެ ޓީމުގައި މާ ގިނަ ފުރުސަތުތަކެއް ލިބިފައެއް ނުވެއެވެ. އެއާއެކު 2018 ވަނަ އަހަރު ހަކީމީ ވަނީ ލޯނު އެއްބަސްވުމެއްގެ ދަށުން ބޮރޫޝިއާ ޑޯޓްމުންޑަށް ބަދަލުވެފައެވެ. އަދި އެ ޓީމުގައި ހަކީމީ ދެ ސީޒަން ހޭދަކުރިއިރު، އޭނާ ވަނީ ޑޯޓްމުންޑަށް 73 މެޗު ކުޅެދީ، އެ ޓީމާއެކު ޖަރުމަން ސުޕަ ކަޕް ކާމިޔާބުކޮށްފައެވެ.

އޭގެ ފަހުން އިންޓައަށް ހަކީމީ ބަދަލުވީ މިދިޔަ އަހަރުގެ ހޫނު މޫސުމުގައި 40 މިލިޔަން ޔޫރޯގެ ފީއަކަށެވެ. އެ ޓީމުގައި ހޭދަކުރި އެއް ސީޒަނުގައި ހަކީމީ ވަނީ މޮޅު ކުޅުމެއް ދައްކާ، އިންޓައާއެކު އިޓާލިއަން ލީގު ހޯދާފައެވެ. އަދި އިންޓައަށް ކުޅެދިން 45 މެޗުގައި ހަކީމީ ވަނީ ހަތް ލަނޑު ޖަހާފައެވެ.