ލޯނު އެއްބަސްވުމެއްގެ ދަށުން ޖަރުމަންގެ ބޮރޫޝިއާ ޑޯޓްމުންޑަށް ކުޅެމުން އައި ޑިފެންޑަރު އަޝްރަފް ހަކީމީގެ ސޮއި އިންޓަ މިލާނުން ހޯދައިފިއެވެ.

ޑޯޓްމުންޑަށް ހަކީމީ ކުޅެމުން އަންނަނީ ސްޕެއިންގެ ރެއާލް މެޑްރިޑްގެ ލޯނު އެއްބަސްވުމެއްގެ ދަށުންނެވެ. އުމުރުން 21 އަހަރުގެ ހަކީމީގެ ސޮއި އިންޓައިން ހޯދިކަން ރެއާލުން ވަނީ ހާމަކޮށްފައެވެ. ހަކީމީ އިންޓަ އާއެކު ހަދާފައިވަނީ ފަސް އަހަރުގެ އެއްބަސްވުމެކެވެ. އަދި އިންޓައިން ވަނީ ހަކީމީގެ ސޮއި ހޯދުމަށް 40 މިލިއަން ޔޫރޯ ޚަރަދުކޮށްފައެވެ.

އިންޓައިން ހަކީމީގެ ސޮއި ހޯދިއިރު، ޑޯޓުމުންޑުންވެސް ވަނީ މި ސީޒަން ނިމުމުން ހަކީމީ އާއެކު ދާއިމީ އެއްބަސްވުމެއް ހެދުމަށް މަސައްކަތް ކޮށްފައެވެ.

2017 ވަނަ އަހަރު ރެއާލްގެ ސީނިއާ ޓީމުން ކެރިއަރު ފެށި ހަކީމީ ވަނީ ރެއާލަށް 17 މެޗު ކުޅެދީ ދެ ލަނޑު ކާމިޔާބުކޮށްދީފައެވެ. އަދި 2018 ވަނަ އަހަރު ޑޯޓްމުންޑަށް ހަކީމީ ބަދަލުވުމަށްފަހު، އެ ކްލަބަށް ކުޅެދިން 73 މެޗުގައި އޭނާ ވަނީ 12 ލަނޑު ކާމިޔާބުކޮށްފައެވެ.