އެހެން ކުލަބަކަށް ބަދަަލުވުމަށް އަޝްރަފް ހަކީމީ އެއްވެސް މަޝްވަރާއެއް ނުކުރޭ

ފްރާންސްގެ ޕެރިސް ސެއިންޓް ޖަރމަން (ޕީއެސްޖީ) ދޫކޮށް އެހެން އެއްވެސް ކުލަބަކަށް ބަދަލުވާން މޮރޮކޯގެ އަޝްރަފް ހަކީމީ މަޝްވަރާ ނުކުރާކަމަށް އޭނާގެ އެޖެންޓް ކަމާނޯ ބުނެފިއެވެ.

އުމުރުން 24 އަހަރުގެ ހަކީމީއަކީ ޕީއެސްޖީއާއި މޮރޮކޯގެ ގައުމީ ޓީމުގެ ޑިފެންސްގައި މުހިންމު ކުޅުންތެރިޔެކެވެ. ޚާއްސަކޮށް މި މަހު ގަތަރުގައި ނިމުނު ފީފާ ވޯލްޑް ކަޕް މުބާރާތުގައިވެސް ހަކީމީ ވަނީ މޮރޮކޯގައި މޮޅު ކުޅުމެއް ދައްކާފައެވެ. މުބާރާތުގެ ސެމީ ފައިނަލުން މޮރޮކޯ ބަލިވިނަމަވެސް، އެ ޓީމު އެހާ ހިސާބަށް ގެނައުމުގައި އޭނާ ވަނީ މުހިންމު ދައުރެއް އަދާކޮށްފައެވެ. ވޯލްޑް ކަޕްގައި ހަކީމީ ދެއްކި މޮޅު ކުޅުމުގެ ސަބަބުން ޔޫރަޕުގެ ބައެއް ކުލަބުތަކުން އޭނާ ހޯދުމަށް ޝައުގުވެރިކަން ފާޅުކޮށް، އެކަމުގެ މަޝްވަރާތައް ކުރަމުން އަންނަ ކަމަށްވެސް ބޭރުގެ ބައެއް މީޑިއާތަކުގައި ރިޕޯޓުކޮށްފައިވެއެވެ.

އެކަމާ ގުޅިގެން ހަކީމީގެ އެޖެންޓް ކަމާނޯ ބުނީ ހަކީމީ ޕީއެސްޖީގައި ހުރީ ވަރަށް އުފަލުން ކަމަށާއި، ކުލަބާއެކު 2026 ވަނަ އަހަރާ ހަމައަށް އޮތީ އެއްބަސްވުމެއް ހަދާފައި ކަމަށެވެ. ހަކީމީ ބޭނުންވަނީ ކުލަބް ފުޓުބޯޅައިގައި ޕީއެސްޖީއާއެކު ގިނަ ކާމިޔާބީތަކެއް ހޯދަން ކަމަށާއި، އެއްބަސްވުން އޮތްހާ ދުވަހަކު އެހެން ކުލަބަކާއެކު މަޝްވަރާ ނުކުރާނެ ކަމަށްވެސް އޭނާ ބުންޏެވެ. ހަމައެއާއެކު މިހާރު ހަކީމީގެ ހުރިހާ ފޯކަސްއެއް ހުރީ ސީޒަން އަލުން ފަށައިގެން، ޕީއެސްޖީއާއެކު ކުރިއަށް ދިޔުމަށް ކަމަށްވެސް ކަމާނޯ ވަނީ ބުނެފައެވެ.

އިޓަލީގެ އިންޓަރ މިލާން ދޫކޮށް ހަކީމީ ޕީއެސްޖީއަށް ބަދަލުވީ 2021 ވަނަ އަަހަރުއެވެ. އޭގެ ފަހުން އޭނާ ވަނީ އެ ކުލަބަށް މިހާތަނަށް 62 މެޗު ކުޅެދީ ހަތް ލަނޑުވެސް ޖަހާފައެވެ. މީގެ އިތުރުން އޭނާ ވަނީ ޕީއެސްޖީއާއެކު ފްރާންސް ލީގާއި، ޓްރޮފީ ޑީ ޗެމްޕިއަންވެސް ކާމިޔާބުކޮށްފައެވެ. މި ސީޒަންގެ ލީގު އެއްވަނާގައި ޕީއެސްޖީ އޮތްއިރު، ޗެމްޕިއަންސް ލީގުގެ ގަދަ 16ގައިވެސް އެ ޓީމު ވާދަކުރާނެއެވެ.