ޠާލިބާން ސަރުކާރުގެ "ދިފާޢީ ކެތްތެރިކަން" ކޮޅުންލީތަ؟

ހަތިޔާރު އެޅި ހަނގުރާމަވެރި ޠާލިބާން ޖަމާޢަތުން ކޮންޓްރޯލް ނަގާފައިވާ އަފްޣާނިސްތާނަށް ލިބިފައި އޮތް ކުޑަ ބަޖެޓުގެ ބޮޑު އިންސައްތައެއް ޚަރަދު ކުރަމުން ދަނީ އެ ޤައުމުގެ ޠާލިބާން ސަރުކާރުގެ ދިފާޢީ ވުޒާރާއަށެވެ. ބައިނަލްއަޤުވާމީ މުޖުތަމަޢުގެ އެއްވެސް ބައިވެރިއަކު މިހާތަނަށް ރަސްމީ ސިފައެއްގައި ބަލައިގެންފައި ނުވާ ޠާލިބާން ސަރުކާރުން އަމާޒު ހިފާފައި ވަނީ އަސްކަރީ ފައުޖު ވަރުގަދަކޮށް، ވައިގެ މަގުން އަމާޒުވާ ހަމަލާތައް ދިފާޢު ކުރާނެ ނިޒާމު ޤާއިމު ކުރުމަށް ކަމަށް އަފްޣާން އަސްކަރިއްޔާގެ އިސްވެރިޔާ ވަނީ ހާމަކޮށްފައެވެ.

އޯގަސްޓް 2021 ގައި އަފްޣާނިސްޠާނުގެ ކޮންޓްރޯލް ނެގި ޠާލިބާން ސަރުކާރުގެ ދިފާޢީ އަމާޒުތައް ހާމަ ކޮށްފައި ވާ މި ދަނޑިވަޅަކީ، އެ ސަރުކާރުގެ ހައިސިއްޔަތު ބަލައިގަތުމަށް ބައިނަލްއަޤުވާމީ ޑިޕްލޮމެޓިކް ވެއްޓަށް ދަތި ކުރުވާ އެތައް ސިޔާސަތެއް ތަންފީޒު ކުރަމުންދާ ދަނޑިވަޅެކެވެ. އެގޮތުން އަންހެނުންނާއި އަންހެން ކުދިންގެ މަތީ ތަޢުލީމަށް ހުރަސް އެޅުމާއި، އަންހެނުން ވަޒީފާ އަދާ ކުރުމަށް އޮންނަ މިނިވަން ކަމަށް ހުރަސް އެޅުން ފަދަ ކިތަންމެ ސިޔާސަތަކަށް ބައިނަލްއަޤުވާމީ އަދި ދޭސީ ފެންވަރުގައި ދަނީ ފާޑުކިއުންތައް އަމާޒު ވަމުންނެވެ.

އަފްޣާނިސްތާނުގެ އުތުރުގެ ސަރަޙައްދެއް ކަމަށްވާ ބަދަޚްޝާންގެ ޠާލިބާން ކޮމާންޑަރު އަދި ޗީފް އޮފް އަރމީ ސްޓާފްގެ މަޤާމުގައި ހުރި ޤާރީ ފަސީހުއްދީން ފިޠުރަތު ވަނީ، އަފްޣާނިސްތާނުގެ ވައިގެ ސަރަޙައްދުގައި ބިދޭސީ ޑްރޯންތައް އުދުއްސާ އުދުއްސުން ކުށްވެރި ކޮށްފައެވެ.

އަފްޣާނިސްތާނުގެ އަސްކަރީ ފައުޖުގައި މިވަގުތު 150000 އެއްހާ ސިފައިން ތިބި އިރު، އިތުރު ބައިލައްކައެއްހާ ސިފައިން ރެކްރޫޓު ކުރުމަށް މަސައްކަތް ކުރަމުން ދާކަން ޤާރީ ފަސީހުއްދީން ފިޠުރަތު ވަނީ ފާހަގަ ކޮށްފައެވެ.

އަފްޣާނިސްތާނުގެ ބަޖެޓުގެ އެންމެ ބޮޑު އިންސައްތައެއް، ދިފާޢީ ކަންކަމަށް ކަނޑައެޅި ނަމަވެސް، އެއީ ކިހާ ޢަދަދެއްގެ ފައިސާއެއްކަން، އޭނާ ތަފްސީލުކޮށްދީފައެއް ނުވެއެވެ. ދިފާޢީ ކަންކަމަށް ބޭނުންވާ ފައިސާ ހޯދުމަށް ދަތިތަކާ ކުރިމަތިލާން ނުޖެހޭ ކަމަށާ، ދަޢުލަތުގެ ބަޖެޓުގެ އެންމެ ބޮޑު އިސްކަމެއް ދީފައިވާ ދާއިރާއަކީވެސް ދިފާޢީ ދާއިރާކަން ޤާރީ ފަސީހުއްދީން ފިޠުރަތު ފާހަގަ ކުރިއެވެ. އަފްޣާނިސްތާނުގެ ދަޢުލަތުގެ ބަޖެޓަށް ފައިސާ ވަންނަ މައިގަނޑު މަސްދަރަކީ ޓެކުހާއި ކަސްޓަމްސް ޑިއުޓީއެވެ.

އަފްޣާނިސްތާނުގައި މަދަނީ ސަރުކާރެއް ޤާއިމުކޮށް، ހަތިޔާރު އެޅި ހަނގުރާމަވެރި ޖަމާޢަތެއްގެ ތެރެއިން ޤައުމީ އަސްކަރިއްޔާއެއް އެކުލަވާލުމަށް ޠާލިބާނުން މަސައްކަތް ކުރާތާ މިހާރު ދޮޅު އަހަރެއްހާ ދުވަސް ވަނީ ފާއިތުވެފައެވެ.

ބައިނަލްއަޤުވާމީ އެއްވެސް ސަރުކާރަކުން ރަސްމީ ސިފައެއްގައި ޠާލިބާން ސަރުކާރު ބަލައިގެންފައި ނުވާ ކަމީ، އެ ޤައުމުގެ އިޤްތިޞާދީ މަސްރަޙު އިންތިހާއަށް ނުތަނަވަސް ކުރުވާފައި އޮންނަ މައިގަނޑު އެއް ސަބަބެވެ. އޭގެ އިތުރުން، އަފްޣާނިސްތާނާ ދެކޮޅަށް ތަންފީޒު ކުރަމުންދާ ދަތި ކުރުމުގެ ފިޔަވަޅުތަކުގެ ސަބަބުން ބޭންކިންގް ސެކްޓަރަށް ގޮންޖެހުންތައް ކުރިމަތިވެފައި ވާ އިރު، ތަރައްޤީގެ ނަމުގައި އަފްޣާނިސްތާނަށް ދެމުންދިޔަ އެހީތައްވެސް ވަނީ މަޑުޖައްސާލާފައެވެ.

ޤާރީ ފަސީހުއްދީން ފިޠުރަތު ފާހަގަ ކުރި ގޮތުގައި ދިފާޢީ ކަންކަމަށް ހާއްސަ ސަމާލުކަން ދެނީ، އަފްޣާނިސްތާނުގެ ވައިގެ ސަރަޙައްދު، ޑްރޯންތަކާއި އެނޫންވެސް އެފަދަ ކަންކަމުން ސަލާމަތް ކުރުމަށް ކަމަށެވެ. ނަމަވެސް، އަފްޣާނިސްތާނަށް ވައިގެ ދިފާޢީ ނިޒާމު ގަންނަނީ ކޮން ބައެއް މެދުވެރިކޮށް ކަމެއް ޤާރީ ފަސީހުއްދީން ފިޠުރަތު، ތަފްސީލު ކޮށްދީފައެއް ނުވެއެވެ.

ކަން މިހެން އޮތް އިރު، އަފްޣާނިސްތާނުގެ ސަލާމަތީ ފައުޖުތަކުގައި މީގެ ކުރިން މަސައްކަތް ކޮށްފައި ވާ މީހުންނަށްވެސް، ޠާލިބާން ހަނގުރާމަވެރިންނެކޭ އެއްގޮތަށް އާމްދަނީ ލިބެމުން ދާނެ ކަމަށާ، އެމީހުންނާ މެދުވެސް ކަން ކުރަނީ ޠާލިބާން ހަނގުރާމަވެރިންނާ އެއްގޮތަށް ކަމަށް ޤާރީ ފަސީހުއްދީން ފިޠުރަތު ވަނީ ބުނެފައެވެ. ނަމަވެސް، އދއާއި އިންސާނީ ޙައްޤުތަކަށް މަސައްކަތް ކުރާ ޖަމާޢަތްތަކުން ވަނީ، އަފްޣާނިސްތާނުގައި ކުރިން އޮތް ސަލާމަތީ ބާރުގެ މެންބަރުންނަށް އަމާޒުކޮށްގެން އެމީހުން މަރަމުން ދާކަމުގެ ތުހުމަތުތަކެއް ފެންމަތި ކޮށްފައެވެ.