މިހިނގާ އޭޕްރީލް މަހު ސީރިޔާ އަށް ދެވުނު ކެމިކަލް ހަމަލާ އާއި ގުޅިގެން ސީރިޔާ ސަރުކާރަށް އަޅާ އާންމުވެގެންވާ ދަތިކުރުމުގެ ފިޔަވަޅެއްގެ ގޮތުން ސީރިޔާ ސަރުކާރުގެ އެޖެންސީއެއްގެ 271 މުވައްޒަފަކަށް އެމެެރިކާ އިން ދަތިކުރުމުގެ ފިޔަވަޅު އަޅައިފިއެވެ.

ކެމިކަލް ހަމަލާއާއި ގުޅިގެން އެމެރިކާ ސަރުކާރުން ދަތިކުރުމުގެ ފިޔަވަޅު އެޅީ ކެމިކަަލް ހަތިޔާރާއި އަދި ބެލިސްޓިކް މިސައިލް އުފައްދާ އެޖެންސީއަކަށްވާއިރު، އެ އެޖެންސީ އަކީ ސީރިޔަން ސައިންޓިފިކް ސްޓަޑީސް އެންޑް ރިސާޗް ސެންޓާ (އެސްއެސްއާރްސީ) އެވެ.

އެސްއެސްއާރްސީ ގެ 271 މުވައްޒަފުންގެ އެސެޓްތައް އެމެރިކާ އިން ފްރީޒް ކުރިއިރު، އެެމެރިކާ އިން ގަބޫލުކުރާ ގޮތުން މިމަހު ކުރީކޮޅު ސީރިޔާގައި ދިން ކެމިކަލް ހަަމަލާ ގައި ބޭނުން ކުރި "ނާވް އެޖެންޓް" އުފައްދާފައި ވަނީ އެސްއެސްއާރްސީ އިންނެވެ.

އެމެރިކާ އިން އެސްއެސްއާރްސީ ގެ 271 މުވައްޒަފެއްގެ އެސެޓްތައް ތައް ފްރީޒް ކުރުމުގެ ސަބަބުން އެ މުވައްޒަފުންނާ އެމެރިކާގެ އެއްވެސް ރައްޔިތަކަށް މުއާމަލާތު ކުރުންެވެސް މަނާވާނެއެވެ.

ސީރިޔާގެ އިދްލީބަށް އޭޕްރީލް ކުރީކޮޅު ދިން ކެމިކަލް ހަމަލާ އާއި ގުޅިގެން މަދުވެގެން 80 މީހުން މަރުވެ 557 މީހުންނަށް ފަރުވާ ދޭންޖެހިފައި ވެއެވެ. މިހަމަލާއާ ގުޅިގެން ބައިނަލްއަގްވާމީ މުޖުތަމައުއިން އިނގިލި ދިއްކުރަނީ ރައީސް ބައްޝާރުލް އަސަދުގެ ސަރުކާރަށެވެ. ނަމަވެސް އަސަދުގެ ސަރުކާރުން ބުނަމުން ދަނީ އެފަދަ ހަމަލާއެއް ނުދޭ ކަމަށެވެ.