އުތުރު ކޮރެއާގެ މައްސަލަށް އެމެރިކާއިން އަދިވެސް ބޭނުންވަނީ ޑިޕްލޮމެޓިކް ހައްލެއް ކަމަށް އެމެރިކާގެ ދިފާޢީ ވަޒީރު ޖޭމްސް މެޓިސް ވިދާޅުވެއްޖެއެވެ.
އުތުރު ކޮރެއާ އާއި ދެކުނު ކޮރެއާ ގުޅޭ ސަރަހައްދީ ރޮނގުގައި ޤާއިމްކޮށްފައިވާ ޑީމިލިޓަރައިޒްޑް ޒޯންގައި ދެކުނު ކޮރެއާ ފަޅީގައި ހުންނަވައިގެން މެޓިސް ވިދާޅުވީ އެމެރިކާއިން ބޭނުންވާ ހަނގުރާމަ ނޫން ކަމަށާއި، އުތުރު ކޮރެއާގެ ނިއުކްލިއަރ މައްސަލައަށް ދާއިމީ ހައްލެއް ހޯދައި، ކޮރެއާ ޕެނިންސިއުލަރ ނިއުކްލިއަރ ހަތިޔާރު ނެތް ސަރަހައްދަކަށް ހެދުން ކަމަށެވެ.
އުތުރު ކޮރެއާގެ ނިއުކްލިއަރ ޕްރޮގްރާމްގެ މަސައްކަތް އެޤައުމުން ހަލުވި ކޮށްފައިވާއިރު، އަސްކަރީ ބާރުގެ ބޭނުންކުރައްވާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދޭތެރެ ދޭތެރެއިން ދެއްވާތީ މިމައްސަލައަށް ބައިނަލްއަޤްވާމީ ސަމާލުކަންވަނީ އިތުރުވެފައެވެ. އަދި ފަހަކަށް އައިސް އުތުރު ކޮރެއާއިން ހަތިޔާރާއި ނިއުކްލިއަރ ޓެސްޓްތައް ކުރަމުން އަންނައިރު، ބިންމަތީގައި ނިއުކްލިއަރ ޓެސްޓެއް ކުރަން ޖެހިދާނެކަމުގެއިންޒާރު އުތުރު ކޮރެއާއިން ވަނީ ދީފައެވެ؛ މީގެ ކުރީގައި ނިއުކްލިއަރ ޓެސްޓްތައް ކުރަމުން އައީ ބިމު އަޑީގައެވެ.
ދެކޮރެއާ ދެމެދު ޤާއިމްކޮށްފައިވާ ޑީއެމްޒީއެއް އެމެރިކާގެ ދިފާޢީ ވަޒީރު ވަޑައިގެންނެވި އިރު އެބޭފުޅާގެ އަރިހުގައި ދެކުނު ކޮރެއާގެ ދިފާޢީ ވަޒީރު ވެސް އެސަރަހައްދަށް ޒިޔާރަތްކުރެއްވިއެވެ. މި ބޯޑަރު ސަރަހައްދުގައި ދެ ޤައުމުން ވެސް ސަލާމަތީ ފިޔަވަޅުތައް އިންތިހާއަށް ވަރުގަދަކޮށްފައިވާއިރު، ދެކުނު ކޮރެއާގެ ސަރަހައްދީ އިން ހިމާޔަތްކުރުމަށް ދެކުނު ކޮރެއާ ސިފައިންނާ އެކު ގިނަ އަދަދެއްގެ އެމެރިކާ ސިފައިން ވެސް ހަރަކާތްތެރިވެއެވެ.
ޑީއެމްޒީގެ އިތުރުން ދެކުނު ކޮރެއާގެ އޮސާންގައި ހުންނަ އެމެރިކާގެ ވައިގެ ސިފައިންގެ މަރުކަޒަކަށާއި، ވެރިރަށް ސޯލްގައި ހުންނަ އަސްކަރީ ބޭސްއަކަށް ދިފާޢީ ވަޒީރު މެޓިސް ޒިޔާރަތްކުރެއްވިއެވެ.
