"މިހާރުގެ ބައެއް ކުދިންނަށް ހީނާއެއް ނޭނގޭ": ދުބާއީން ތަފާތު މަންޒަރެއް

ސަހަރާގެ ހަނަސްފަސް، ހޫނު ވެލިގަނޑުގައިވެސް ހެދޭ، ނިސްބަތުން ކުޑަކުޑަ ގަހެއް ކަމަށްވާ ހީނާ ގަހުގެ ފަތުގެ އިތުރު ތަޢާރަފަކަށް ބޭނުމެއް ނުވާނެކަން ޔަޤީނެވެ. ހީނާ ފަތް ފުނޑައިގެން، ހަށިގަނޑުގެ އެކި ގުނަވަންތަކުގައި އެކި ފަރުމާތަކަށް އަޅާ އުޅޭތާ މިހާރު މިވަނީ އެތައް ސަތޭކަ އަހަރެއް ވެފައެވެ. ދުނިޔޭގެ އެކި ކަންކޮޅުތަކަށް ފެތުރިފައިވާ އެކި ޘަޤާފަތްތަކުގައިވެސް އެކަން، ހަމަ އެގޮތަށް ކޮށް އުޅޭތާ އެތައް އަހަރެއް ވަނީ ވެފައެވެ.

ހީނާފަތުގެ އެތައް ބޭނުމެއް ކުރެއެވެ. ޒީނަތްތެރިވުމުގެ ގޮތުން، ޙަލާލް މާއްދާތައް ބޭނުންކޮށްގެން ހަށިގަނޑުގައި އެކި ކަހަލަ ކުރެހުންތައް ކުރެހުމާއި، އިސްތަށިގަނޑުގައި ކުލަ ޖެއްސުމުގެ އިތުރުން ސިއްހީ އެކިއެކި ފަރުވާގެ ގޮތުގައި ހީނަފަތް ބޭނުން ކުރެއެވެ. އަދުގެ ޒަމާނީ ދުނިޔޭގައިވެސް ހިނާފަތުގެ ބޭނުން ކުޑަވެފައި ވާތީއެއް ނުފެނެއެވެ. ހައްތަހާ ވަނީ އިތުރު ކަމުގައިވެސް ދެންނެވިދާނެއެވެ.

ދުބާއީއާއި ގާތްގަނޑަކަށް 100 އެއްހާ ކިލޯމީޓަރު ދުރުގައި އޮންނަ ރަސް އަލް ޚައިމާގައި ދިރިއުޅޭ އޭނާގެ އަންހެން ދަރިފުޅުގެ ގޭގައި ހައްދާފައި ހުރި ގަހުން ހީނާފަތް ބިންނަމުން ދިޔަ އެކަކީ މޫޒާ އަހުމަދު އަލް އަބްދުލީއެވެ.

ހީނާފަތްތައް ހިފައިގެން އޭނާގެ ގެއާ ދިމާއަށް މިޞްރާބު ޖަހާފައި ހުރި މޫޒާއަކީ އެންމެ އިހުގެ ގޮތަށް ހީނަފަތް ފުނޑައިގެން ހީނާ ޕޭސްޓް ތައްޔާރުކުރާ މަދު މީހުންގެ ތެރެއިން އެކަކެވެ.

ހިއްކާފައިވާ ހީނާފަތްތައް މުގުރާ، ފުރޭނުމަށްފަހު ދެން އެއާ އެއްކުރަނީ ލުނބޯހުތު ފެނެވެ. މިއީ ދުބާއީ ޘަޤާފަތާ ގުޅިފައިވާ އުކުޅެކެވެ. މިއީ ކައިވެނި ހަފުލާތަކާއި ޢީދު ފަދަ އުފާވެރި މުނާސަބުތަކަށް ހާއްސަ ކަމެކެވެ.

އެތައް ޖީލަކަށް ވަރުތަ ވެފައި ވާ ހީނާ އެޅުމުގެ ޘަޤާފަތުގައި ޒަމާނީ ކުލަތައް ޖައްސަމުންދާ އެކަކީ އަޒްރާ ޚާމިސާއެވެ. އަޒްރާގެ މަސައްކަތުން، ހީނާގެ ޒަމާނީ ވައްޓަފާޅި ދައްކާލައެވެ. އޭނާގެ ފަރުމާތަކުން އަދުގެ ފެޝަނަށް ހީނާ އަޅައެވެ. މިއީ ދިވެހިންގެ ދޫ ތަކަށްވެސް މިއަދު ފަރިތަވެފައިވާ ހީނާ އަރޓްއެވެ.

އަޒްރާގެ ހީނާ ފަރުމާތަކަކީ ބަލާލަން، ލޮލަށްވެސް ފަސޭހަ ފަރމާތަކެކެވެ. މީހުންގެ އަތްތިލަތަކުގަ ކުރެހުމުގެ އިތުރުން، ބޫޓޫތަކުގައިވެސް ޚާމިސާ ހީނާފަތް އަޅައެވެ. އަޒްރާ ދަނީ އެޑިޑާށްއާއި އެބެލް ވޮޗަޒްއާ ގުޅިގެން އެ ބްރޭންޑްތަކާވެސް ހީނާ އަރޓް ގުޅުވައިދެމުންނެވެ.

ޤުދުރަތީ އާލާތްތައް ބޭނުންކޮށްގެން އަޒްރާ ވަނީ އޭނާގެ އަމިއްލަ ހީނާ ބްރޭންޑެއްވެސް އުފައްދާފައެވެ. "އަޒްރާ"ގެ ނަމުގައި އުފައްދާފައިވާ މި ބްރޭންޑަކީ ޒުވާނުންގެ މެދުގައި މިއަދު އިންތިހާއަށް މަޤުބޫލުވަމުން އަންނަ ހީނާ ބްރޭންޑްއެކެވެ. މިއީ ޒަމާނީ އަދި ޘަޤާފީ ހީނާ އަރޓްގެ މެސެޖުތައް ފޯރުކޮށްދިނުމަށްވެސް މިއަދު އެންމެ އެކަށީގެންވާ އެއް އުފެއްދުމަށް ވަނީ ވެފައެވެ.