މިއުޒިކްގެ ބަދަލުގައި ޤުރުއާން އަޑުއަހާ މިންވަރު އިތުރު ކުރުމުގެ ފަހަތުގައި ހިތްގައިމު އަޑުގެ ވެރި އިމާމުން!

ރަމަޟާން މަހަކީ އެ މަހެއްގައި ކީރިތި ޤުރުއާން ބާއްވާލެއްވުނު މާތްވެގެންވާ މައްސަރެވެ. ރަމަޟާން މަހުގެ ރޭތަކާއި ދުވަސްތަކުގައި، އެމީހަކަށްވީ އެންމެ ފުރިހަމައަކަށް ކީރިތި ޤުރުއާނުން މިންވަރެއް ކިއެވުމަށް ގިނަ ބަޔަކު ސަމާލުކަން ދޭ މައްސަރެކެވެ. ރީތި އެއްޗިއްސާއި، ރީތި އަޑުތަކާއި ކަންކަމަށް ހާއްސަ ސަމާލުކަން ދިނުމަކީ އިންސާނީ ޠަބިއްޔަތުގައި ވާ ކަމަކަށް ވާ އިރު، ރީތިކޮށް ޤުރުއާން ކިއަވާ ޤާރީންނާއި އިމާމުންނަށްވެސް އެތައް ބައެއްގެ ސަމާލުކަން ހުއްޓެއެވެ. ރަމަޟާން މަހުގެ ރޭ އަޅުކަންތަކުގެ ތެރޭގައި ހިމެނޭ ތަރާވީހް ނަމާދަށް ދާނެ މިސްކިތެއް ޚިޔާރު ކުރުމުގައި، އެ މިސްކިތެއްގައި ހުންނަ އިމާމަކު، ކީރިތި ޤުރުއާން ކިޔަވަމުންދާ ގޮތަށް ބަލާ މީހުންވެސް ވަކި މަދެކޭ ނުދެންނެވޭނެއެވެ.

އޭނާ ދިރިއުޅެމުންދާ ގެއާ ދާދި ކައިރީގައި އިތުރު 5 މިސްކިތެއް ހުރިކަމުގައި ވީ ނަމަވެސް، އަހުމަދު ޢީދު، ދުރު ރާސްތާއަކަށް ދަތުރުކޮށް، ވަކި ހާއްސަ މިސްކިތަކަށް ދަނީ، ޢުރުދުންގެ އިމާމް، އަހުމަދު އަލް-ހަރާސިސްގެ ކިއެވުމާއި އެ އަޑުގެ ފުރިހަމަ ކަމުންނެވެ.

ޢުރުދުންގެ ވެރިރަށް އައްމާންގައި ހުންނަ ޢަބްދުﷲ ބިން ސަލާމް މިސްކިތުގައި، ޢީދާއެކު ނަމާދު ކުރަން ތިބި ގިނަ މީހުންނަކީ، އޭނާ ފަދައިން އިމާމްގެ ކިއެވުމުގެ އަޑު އެހުމަށްޓަކާ، ދުރު ހިސާބުތަކުން އެ މިސްކިތަށް ދަތުރު ކުރި މީހުންނެވެ.

ތަރާވީހް ނަމާދު ނިންމާލުމަށްފަހު ރޮއިޓަރޒްއާ ވާހަކަދައްކަމުން ޢީދު ފާހަގަ ކުރި ގޮތުގައި، ވަރުގަދަ އަޑެއްގެ ވެރި އިމާމެއްގެ ފަހަތުގައި ނަމާދު ކުރުން ކޮންމެހެންވެސް ބޭނުންވެއެވެ.

އެބައި މީހުންގެ ކިއެވުމުގެ ހިތްޤައިމުކަމާއި ތަފާތު ކަމުގެ ސަބަބުން، އެކި ސަރަޙައްދުތަކުން އެ އިމާމުންނަށް ސަމާލުކަން ހުއްޓެއެވެ. ސޯޝަލް މީޑިއާ ޕްލެޓްފޯމުތަކުން ލިބޭ ސަމާލުކަމުގެ އިތުރަށް، އެ އިމާމުން ނަމާދު ކުރާ މިސްކިތްތަކަށްވެސް ގިނަ ބަޔަކު ޒިޔާރަތް ކުރެއެވެ.

ޤަޠަރުގެ އެޑިއުކޭޝަން ސިޓީ މިސްކިތުގައި ނަމާދު ކުރައްވާ ޔަމަނުގެ އިމާމް ޝައިޚް ޙައިޘަމް އަލްދުޚީން ފާހަގަ ކުރެއްވި ގޮތުގައި، ޝަޢުޤުވެރިކަމާއެކު އިމާމަކު ނަމާދު ކުރާނަމަ، އޭނާގެ ފަހަތުން ދެން ނަމާދު ކުރާ މީހުންވެސް އެކަން ކުރާނީ ޝަޢުޤުވެރިކަމާ އެކުގައެވެ.

މިޞްރުގައި ދިރިއުޅެމުންދާ އިނގިރޭސި ރައްޔިތެއް ކަމަށްވާ މުޙައްމަދު ޢައްޔޫބު އާސިފްއަކީވެސް ކީރިތި ޤުރުއާން ކިއެވުމަށް ފާހަގަ ކުރެވޭ މީހެކެވެ. އޭނާ ސިފަކުރި ގޮތުގައި ރީތި ރާގުރާގަށް ކީރިތި ޤުރުއާން ކިއެވުމަކީ ކޮންމެހެންވެސް ކުރަން ޖެހޭ ކަމެކެވެ. އެއީ އަޅުތަކުންގެ ހިތްތަކުގައި، އާދަޔާ ޚިލާފު ރޫޙެއް އުފައްދަނިވި ކަމެއްކަން އޭނާ ފާހަގަ ކުރިއެވެ.

ކުރިން މިއުޒިކް އަޑު އަހަމުން ދިޔަ މީހުންވެސް، ރީތި ރާގުތަކަށް ޤުރުއާން ކިއަވާ މީހުންގެ އަޑު އަހަން ވަނީ ފަށާފައެވެ.

ވީ ވަރަކުން ކީރިތި ޤުރުއާން އަޑު އަހަން ވަޤުތު ހޭދަ ކުރުމަކީ ކޮންމެ މީހަކަށްވެސް އަދުގެ މި ޒަމާނީ ޓެކްނޮލޮޖީއާއެކު ވަރަށް ފަސޭހައިން ކުރެވިދާނެ ކަމެކެވެ. ރީތި ރާގުތަކަށް ކީރިތި ޤުރުއާން ކިޔަވާ ވިދާޅުވުމުގެ ރޮނގުން، ދުނިޔޭގެ އެކި ކަންކޮޅުތަކުން އެންމެ ގިނަ ބައެއްގެ ސަމާލުކަން ހޯއްދަވާފައިވާ މަޝްހޫރު ބައެއް ޤާރީންގެ ތެރޭގައި، ޝައިޚް ނޫރީން މުޙައްމަދު ޞާދިޤު، ޢުމަރު ހިޝާމް އަލް އަރަބީ، ޢަބްދުއްރަޙްމާން އިބްނު ޢަބްދުލްޢަޒީޒް އަލް ސުދައިސް، ޝައިޚް މިޝަރީ ރާޝިދު އަލަފަސީ އަދި ޢަބްދުލް ބާސިތު ޢަބްދުލް ޞަމަދު ފާހަގަ ކުރެވެއެވެ.