އިސްރާއީލް އާއި ސީރިއާ އިން ހަނގުރާމަ ހުއްޓާލަން އެއްބަސްވެއްޖެ

އިސްރާއީލާއި ސީރިއާއާ ދެމެދު ހިނގަމުން އައި ހަނގުރާމަ ހުއްޓާލަން ދެ ޤައުމުން ވެސް އެއްބަސްވެފައިވާ ކަމަށް، އެމެރިކާ އިން ސީރިއާ އަށް ކަނޑައަޅާފައި ހުންނަވާ ޚާއްސަ މަންދޫބު ޓޮމް ބަރަކް ވިދާޅުވެއްޖެ އެވެ.

ބަރަކް ހުކުރު ދުވަހު ވިދާޅުވީ، އިސްރާއީލް އާއި ސީރިއާ އިން ވެސް ވަނީ ހަނގުރާމަ ހުއްޓާލުމަށް އެއްބަސްވެފައި ކަމަށެވެ. އަދި އެ އެއްބަސްވުމަށް ތުރުކީ އާއި ޖޯޑަންގެ އިތުރުން، ބައެއް އަވަށްޓެރި އެހެން ޤައުމު ތަކުގެ ތާާއީދު ލިބިފައިވާ ކަމަށް ވަނީ ބުނެފަ އެވެ. 

ބުދަ ދުވަހު ވެސް އިސްރާއީލް އިން ވަނީ ސީރިއާގެ ދަމަސްކަސް އަށް ވައިގެ ހަމަލާ ތަކެއް ދީފަ އެވެ. އަދި ދެކުނުގައި ހުރި ސަރުކާރުގެ ބާރުތަކަށް އަމާޒުކޮށް ވެސް ވަނީ ހަމަލާ ދީފަ އެވެ. މި ހަމަލާތައް ދީފައި ވަނީ ޑްރޫޒް މައިނޯރިޓީ ރައްކާތެރި ކުރުމަށް ކަމަށް އިސްރާއީލް އިން ބުނެފައިވެ އެވެ. 

ބަރަކް އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، ޑްރޫޒް، ބަދަވިން އަދި ސުންނީން ހަތިޔާރު ބަހައްޓައި، އެހެން މައިނޯރިޓީންއާ ގުޅިގެން ސީރިއާގައި އެއްބައިވަންތަ އައިޑެންޓިޓީ އެއް އުފެއްދުމަށް އިލްތިމާސް ކުރާ ކަމަށެެވެ. 

އެ ޕޯސްޓެއްގައި ބަރަކް ވިދާޅުވެފައި ވަނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއި، ސީރިއާގެ ރައީސް އަޙުމަދު އަލް ޝަރާ ހަނގުރާމަ ހުއްޓާލުމަށް އެއްބަސްވެފައިވާ ކަމަށެވެ. އަދި އެއީ އެމެރިކާގެ އެހީތެރިކަމާ އެކު ހުށަހެޅި ހުށަހެޅުމެއް ކަމަށް ވެސް ވިދާޅުވެފައިވެ އެވެ. 

މީގެ އިތުރުން އެ ޕޯސްޓުގައި ބަރަކް ވިދާޅުވީ، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ތުރުކީ އާއި ޖޯޑަންގެ އިތުރުން އަވަށްޓެރި އެހެން ޤައުމު ތަކުގެ ތާއީދު އޮތް ހުށަހެޅުން ޤަބޫލު ކުރައްވާފައި ކަމަށް ވެސް ބަރަކް ވިދާޅުވި އެވެ. 

ސީރިއާގެ ސުވައިދާ ޕްރޮވިންސްގައި ބަދަވީންގެ ޤަބީލާތަކާއި، ޑްރޫޒް ފެކްޝަނާ މެދު ހިނގި ހަމަ ނުޖެހުންތަކާ ގުޅިގެން ސަރަހައްދުގައި ހަފުތާއެއްގެ މުއްދަތަކަށް ވަނީ ހަމަލާތައް ބަދަލު ކުރުމާއި، އަނިޔާވެރިކަން އިތުރުވެފަ އެވެ. 

ހުކުރު ދުވަހު ސީރިއާގެ އޮފިޝަލަކު ބުނެފައި ވަނީ، ސީރިއާގެ ބާރުތަަކަށް ސުވައިދާ ސަރަހައްދަށް ވަނުމުގެ ހުއްދަ ދިނުމަށް އެއްބަސްވެފައިވާ ކަމަށެވެ. އަދި އެ ހުއްދަ ދީފައި ވަނީ 48 ގަޑިއިރުގެ މުއްދަތަކަށް ކަމަށް ވެސް ބުނެފައިވެ އެވެ. 

ހުކުރު ދުވަހުގެ ރޭ ސީރިއާގެ ސީރިއާގެ ސަރުކާރުން ވަނީ ދެކުނުގައި ހިނގަމުންދާ ކަންކަން ހުއްޓުުވުމަށް ބާރުތައް ފޮނުވާނެ ކަމަށް ބުނެފަ އެވެ. އަދި ސިޔާސީ ސަލާމަތައި ފިޔަވަޅުތަކާ އެކު، އަލުން އަނިޔާވެރިކަން އިއާދަވުން ހުއްޓުވާނެ ކަމަށް ވެސް ބުނެފައިވެ އެވެ.