ރައީސް މައުމޫން ސިންގަޕޫރަށް ވަޑައިގަންނަވަނީ
ގާތްގަނޑަކަށް 10 ދުވަހުގެ ދަތުރުފުޅެއް
ރައީސް މައުމޫން
އާއިލީ ބޭނުމެއްގައި ޤައުމުން ބޭރަށް ވަޑައިގަންނަވާތީ، އެންޓި ކޮރަޕްޝަން ކޮމިޝަނަށް ހާޒިރުވެ ވޭނީ އެ ދަތުރުފުޅަށް ފަހުގައި ކަމަށް ރައީސް މައުމޫނު އަބްދުލް ޤައްޔޫމް އަންގަވައިފި އެވެ.
އެންޓި ކޮރަޕްޝަންސް ކޮމިޝަންގެ ރައީސް ހަސަން ލުތުފީއަށް ރައީސް މައުމޫނު އަބްދުއް ޤައްޔޫމް ފޮނުއްވާފައިވާ ސިޓީގައި އެމަނިކުފާނު ވިދާޅުވެފައި ވަނީ، މުހިންމު އާއިލީ ބޭނުމެއްގައި ޖުލައި 8 ގައި ރާއްޖެއިން ބޭރަށް ވަޑައިގަތުމަށް ގަސްދުކުރައްވާތީވެ، އެ ދަތުރު ނިންމަވާލެއްވުމަށް ފަހު މާލެ ވަޑައިގެން ކޮމިޝަނުން ނިންމަވާ ގޮތެއްގެ މަތިން ކޮމިޝަނަށް ބަޔާން ދެއްވުމަށް ތައްޔާރަށް ހުންނެވި ކަމަށެވެ. އަދި އެ ދަތުރުފުޅުގައި ގާތްގަނޑަކަށް 10 ދުވަހު ޤައުމުން ބޭރުގައި ހުންނަވަންޖެހޭނެ ކަމަށް ލަފާކުރެއްވޭ ކަމަށް ރައީސް މައުމޫނު ވިދާޅުވެފައި ވެއެވެ.
ރާއްޖެޓީވީއަށް އެނގިފައިވާ ގޮތުގައި ރައީސް މައުމޫނު ވަޑައިގަންނަވަނީ ސިންގަޕޫރަށެވެ. އަދި އެ ޤައުމުގައި އެމަނިކުފާނު، އާއިލާއާ އެކު ދުވަސްކޮޅަކު މަޑުކުރައްވާ ގޮތަށް ވަނީ ހަމަޖެހިފަ އެވެ.
އޭސީސީން އަންގާ ގޮތެއްގެ މަތިން ބަޔާން ދެއްވުމަށް ތައްޔާރަށް ހުންނެވި ކަމަށް ރައީސް މައުމޫނު ވިދާޅުވިއިރު، ރައީސް މައުމޫނު މީގެ ކުރިން ވަނީ އޭސީސީއަށް ވަޑައިގެން ބަޔާން ދެއްވުމަށް ތައްޔާރަށް ހުންނެވިކަމަށް ވިދާޅުވެފަ އެވެ. ނަމަވެސް އޭސީސީން ބުނެފައިވަނީ ރައީސް މައުމޫނު އޭސީސީއަށް ވަޑައިގެންނެވުމަކީ އެ ކޮމިޝަންގެ އުސޫލާ ހިލާފު ކަމަކަށް ވާތީ، ރައީސް މައުމޫނުގެ ބަޔާން ނަގާނެ ގޮތެއް ކޮމިޝަންގައި މަޝްވަރާކުރުމަށް ފަހުގައި ނިންމާނެ ކަމަށެވެ. ކޮމިޝަނުން މިކަމާ ބެހޭ ގޮތުން އިތުރު މައުލޫމާތެއް ނުދެއެވެ.
އޭސީސީން ރައީސް މައުމޫނުގެ ބަޔާނެއް ނެގުމަށް މަސައްކަތްކުރަނީ ތީމުގޭގެ 2007 އަދި 2008 ވަނަ އަހަރު އޮޑިޓް ރިޕޯޓާއި ގުޅިގެންނެވެ.
