ހިމަބިހި ޖެހުނު ކުއްޖާގެ 65 ކޮންޓެކްޓުން، އަލާމާތެއް ނުފެނޭ: އެޗްޕީއޭ
އައްޑޫގައި ކުޑަކުއްޖަކު ހިމަބިއްސަށް ޕޮޒިޓިވްވެފައިވާކަމަށް ރިޕޯޓުކޮށްފައިވަނީ 3 އޭޕްރިލް 2023ގައި
އައްޑޫ ސިޓީ
އައްޑޫ ސިޓީން މިދިޔަ ހަފުތާގައި ހިމަބިއްސަށް ޕޮޒިޓިވްވި ކުއްޖާގެ 65 ކޮންޓެކްޓުން ފާހަގަކުރެވިފައިވާކަމަށާއި، މިހާތަނަށް ބަލީގެ އެއްވެސް އަލާމާތެއް އެ މީހުންގެ ފަރާތުން ނުފެންނަ ކަމަށް، ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އައްޑޫގައި ކުޑަކުއްޖަކު ހިމަބިއްސަށް ޕޮޒިޓިވްވެފައިވާކަމަށް ރިޕޯޓުކޮށްފައިވަނީ 3 އޭޕްރިލް 2023ގައެވެ. މި ކޭހާގުޅިގެން އައްޑޫ އިކުއިޓޯރިއަލް ހޮސްޕިޓަލުން ވަނީ އެ ކުއްޖާއާ ކޮންޓެކްޓްވެފައިވާ މީހުން ދެނެގަތުމުގެ މަސައްކަތް ވަގުތުން ފަށާފައެވެ.
މި ކޭހާ ގުޅޭގޮތުން އެޗްޕީއޭއިން އާދީއްތަ ދުވަހު ބުނީ، ކޭސް ފެނުމާއެކު، ކަނޑައެޅިފައިވާ އުސޫލާ އެއްގޮތަށް، ކޭސް ފެނުނު ހިސާބުގައި ވަށައިގެންވާ ސަރަހައްދުގައި ދިރިއުޅޭ މީހުންގެ ކޮމިއުނިޓީ ސާރވޭ ކުރިއަށްގެންގޮސްފައިވާ ކަމަށެވެ. އަދި މީސަލްސް ވެކްސިންގެ ދެ ޑޯޒް ފުރިހަމަނުވެ ތިބި، އަދި ފުރިހަމަކޮށްފައިވާކަމުގެ ރެކޯޑު ނެތް މީހުންނަށް ވެކްސިން ދިނުމަށް ރިންގް ވެކްސިނޭޝަން ކުރިއަށްގެންދިޔަ ކަމަށްވެސް އެ އިދާރާއިން ބުނެއެވެ.
މި ކޮމިއުނިޓީ ސަރވޭގައި 41 މީހުންގެ މައުލޫމާތު ސާފުކޮށްފައިވާއިރު، މީގެ ތެރޭގައި 16 ގެއާއި ފިހާރައެއް ބަލާފައިވާކަމަށް އެޗްޕީއޭއިން ބުނެއެވެ. އަދި ވެކްސިން ފުރިހަމަ ނުކޮށް ތިބުމުން 19 މީހަކަށް ވެކްސިން ދިން ކަމަށް ވަނީ ބުނެފައެވެ.
މިހާތަނަށް ބެލިބެލުމުން ކޭހާގުޅޭ 65 ކޮންޓެކްޓުން ފާހަގަކުރެވިފައިވާކަން ފާހަގަކޮށް އެޗްޕީއޭއިން ބުނީ، އެ އެންމެންނަކީ ވެސް ވެކްސިން ފުރިހަމަކޮށްފައިވާ މީހުން ކަމަށެވެ. އަދި ޕޮޒިޓިވްވި ކުއްޖާއަކީވެސް ވެކްސިން ފުރިހަމަކޮށްފައިވާ ކުއްޖެއް ކަމަށް އެ އިދާރާގެ ބަޔާނުގައި ވަނީ ބުނެފައެވެ.
އެޗްޕީއޭއިން ބުނީ ހިމަބިއްސަކީ ރާއްޖޭން ނައްތާލެވިފައިވާ ބައްޔެއްކަމަށް ކަނޑައަޅާފައިވާތީ، އެބަލީގެ އަލާމާތްތައް ހުރެގެން ޑޮކްޓަރަށް ދައްކާ ފަރާތްތަކުގެ ސާމްޕަލް ނަގައި ޓެސްޓުކުރުމަކީ އެ އިދާރާގެ ސަރވެއިލެންސް މިންގަނޑުތަކާ އެއްގޮތަށް ރާއްޖޭގެ ހުރިހާ ސިއްހީ ޚިދުމަތްދޭ ތަނަކުންވެސް އަމަލުކުރަމުން އަންނަ އުސޫލު ކަމަށެވެ. އެހެންކަމުން ހިމަބިހީގެ އެއްވެސް އަލާމާތެއް ފެންނަނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަށް އެޗްޕީއޭއިން އިލްތިމާސްކުރެއެވެ
ހިމަބިހީގެ އަލާމާތްތަކުގެ ތެރޭގައި؛ ހުން އައުމާއި, ހަމުގައި ރަތް ބިހިތަކެއް ނެގުން ހިމެނެއެވެ. އަދި ކެއްސުމާއި، އަރިދަފުސް ފޭބުމާއި، ލޯ ރަތްވުން ފަދަ އަލާމާތްތައްވެސް ހިމަބިހި ޖެހިފައިވާ މީހެއްގެ ފަރާތުން ފެނިދާނެއެވެ.
