އެމްއެންޑީއެފްގައި ހިމަބިހި ނައްތާލުމުގެ ކެމްޕޭން "މަވެސް ޖަހައިފިން" ނަމުގައި ފަށައިފި
މިއީ ރާއްޖެއިން ހިމަބިހި ނައްތާލުމަށް ފެށި ކެމްޕެއިނެއް
ސިފައިންގެ މީހަކަށް ވެކްސިން ދެނީ
ދިވެހިރާއްޖެއިން ހިމަބިހި ނައްތާލުމަށް ސަރުކާރުން ފަށާފައިވާ ގައުމީ ކެމްޕޭން "މަވެސް ޖަހައިފިން" އެމްއެންޑީއެފްގައި ފަށައިފިއެވެ.
މިކެމްޕޭން އެމްއެންޑީއެފްގައި ފެށުމަށް އާދިއްތަ ދުވަހު ހެނދުނު ބަންޑާރަކޮށީގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވާ ކެމްޕޭން ރަސްމީކޮށް ފައްޓަވައި ދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރެވެ.
އެމްއެންޑީއެފުން ބުނީ އެމްއެންޑީއެފްގައި މި ކެމްޕޭން ފެއްޓުމުގެ ގޮތުން އޮފިސަރަކަށާއި އެންލިސްޓެޑް ރޭންކުގެ ސިފައިންގެ މީހަަކަށާއި ސިފައިންގެ އަންހެނަކަށް ވަނީ ވެކްސިން ޖަހާފައެވެ. މި ރަސްމިއްޔާތުގައި ޑިފެންސް މިނިސްޓަރ ވަނީ ވާހަކަފުޅު ދައްކަވާފައިވާއިރު، ވެކްސިން ޖެހި ފަރާތްތަކަށް ވެކްސިން ކާޑު ހަވާލުކޮށްދެއްވާފައިވެއެވެ.
ޑިފެންސް މިނިސްޓަރު ޝަރީފް، ވެކްސިން ޖެހި ފަރާތްތަކަށް ވެކްސިން ކާޑު ހަވާލުކޮށްދެއްވަނީ
މި ކެމްޕޭނަކީ 2020 ވަނަ އަހަރުގެ ކުރިން ސައުތު އޭޝިއާ ސަރަހައްދުން ހިމަބިހި ނައްތާލުމަށް ކުރަމުންދާ ކެމްޕޭނުގައި ދިވެހިރާއްޖެއިން މިއަހަރު ހިމަބިހި ނައްތާލުމަށް ސަރުކާރުން ކުރަމުންދާ ކެމްޕޭނުގައި ބައިވެރި ވުމުގެ ގޮތުން ސިފައިން ފެށި ކެމްޕޭނެއް ކަމަށް އެމްއެންޑީއެފުން ބުނެއެވެ. އެމްއެންޑީއެފްގައި މި ކެމްޕޭނު ކުރިއަށްގެންދަނީ އެމްއެންޑީއެފް މެޑިކަލް ސަރވިސް އާއި ސެނެހިޔަ ހޮސްޕިޓަލް ގުޅިގެންނެވެ. މިކެމްޕޭން ހިނގަމުންދާ ދުވަސްވަރު އާންމުންނަށާއި ސިފައިންނާއި ސިފައިންގެ އާއިލާތަކަށް ވެސް ސެނެހިޔަ ހޮސްޕިޓަލުން ވެކްސިން ޖެހުމުގެ އިންތިޒާމް ހަމަޖެހިފައިވާ ކަމަށް އެމްއެންޑީއެފުން ބުނެއެވެ.
