އިސްރާއީލުން ފަލަސްތީނަށް ދެމުންދާ ހަމަލާތައް އޯއައިސީން ކުށްވެރިކޮށްފި
މި ބައްދަލުވުމުގައި މި މައްސަލައާ ގުޅޭގޮތުން ގަރާރެއް ފާސްކޮށްފައިވޭ
އިސްރާއީލުން ފަލަސްތީނުގެ ރައްޔިތަކަށް އަނިޔާކުރަނީ
އިސްރާއީލުން މި ރަމަޟާންމަހު ފަލަސްތީނަށް ދެމުންދާ ގެއްލުންތައް، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ މެންބަރު ގައުމުތަކުން ކުށްވެރިކޮށް މި މައްސަލައާ ގުޅޭ ގަރާރެއް ފާސްކޮށްފިއެވެ.
ރަމަޟާން މަހު އަލް-އަޤްސާ މިސްކިތުގައި އަޅުކަންކުރަމުންދާ ފަރާތްތަކަށް އިސްރާއީލުން މެދުކެނޑުމެއްނެތި ކުރަމުންދާ އަނިޔާތަކާ ގުޅޭގޮތުން މަޝްވަރާކުރުމަށްޓަކައި އަންގާރަ ދުވަހު ވަނީ އޯއައިސީގެ އެގްޒެކެޓިވް ކޮމިޓީގެ އޯޕަން- އެންޑެޑް ކުއްލި ބައްދަލުވުމެއް ބާއްވާފައެވެ.
މި ބައްދަލުވުމުގައި ދިވެހިރާއްޖޭގެ ފަރާތުންވެސް ބައިވެރިވެފައިވެއެވެ. ރާއްޖެއަކީވެސް އޯއައިސީގެ މެންބަރު ގައުމެކެވެ. މި ބައްދަލުވުމުގައި ކުއްލި ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވެވަޑައިގެންނެވީ އޯއައިސީއަށް ކަނޑައަޅުއްވާފައި ހުންނަވާ ދާއިމީ މަންދޫބު އަދި ދިވެހިރާއްޖޭގެ ފަރާތުން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު މުހައްމަދު ޚަލީލްއެވެ.
މި ބައްދަލުވުމުގައި އަންގާރަ ދުވަހުގެ ރޭ އިސްރާއީލުގެ ސިފައިން އަލްއަޤްސާ މިސްކިތަށް ވަދެ، އެތަނުގައި އަޅުކަންކުރަމުން ދިޔަ ފަލަސްތީނުގެ ރައްޔިތުންނަށް ދިން ހަމަލާއާއި، މި މާތްވެގެންވާ ރަމަޟާން މަހު އަޅުކަންކުރާ ފަރާތްތަކަށް އަނިޔާވެ، އަލް-އަޤްސާ މިސްކިތަށް ގެއްލުންދިނުމާއި ގުޅޭގޮތުން މަޝްވަރާކޮށްފައިވެއެވެ.
މިބައްދަލުވުމުގައި އޯއައިސީގެ މެންބަރު ޤައުމުތަކުން ވަނީ އެ ޢަމަލުތައް ހަރުކަށި އިބާރާތުން ކުށްވެރިކޮށް، ފަލަސްތީނުގެ ރައްޔިތުންނަށް ދެމުންގެންދާ އެހީތެރިކަމާއި އެއްބާރުލުން އިތުރުކޮށްދިނުމަށް އެދި، މި މައްސަލައާ ގުޅޭ ޤަރާރެއް ފާސްކޮށްފައެވެ.
ދިވެހިރާއްޖެއިން އަބަދުވެސް ގޮވާލަމުންދަނީ ފަލަސްތީނުގެ ބިންތަކަށް އިސްރާއީލުން ވެރިވެގަތުން ނިމުމަކަށް ގެނެސް، ފަލަސްތީނުގެ މިނިވަން ދައުލަތެއް ޤާއިމްކޮށް، 1967 ވަނަ އަހަރުގެ ކުރީގެ ބޯޑަރާ ހިސާބަށް އިސްރާއީލުން ފަހަތަށް ޖެހުމަށް ބާރުއަޅާ، ފަލަސްތީނުގެ ދައުލަތުގެ ވެރިރަށުގެ ގޮތުގައި އިރުމަތީ ޤުދުސް އޮންނަން ޖެހޭ ކަމަށެވެ.
