އުދައްޔުގެ ބޭބެ ތަކުރާރުކޮށް ބުނަމުން ދިޔައީ އޭނާއަށް ފަރުވާ ނުދީ އުދައްޔުއަށް ފަރުވާ ދިނުމަށް: ހެކިވެރިޔާ
6 އެޕްރީލު 2023 | ބުރާސްފަތި 09:55މައްސަލައާ ގުޅިގެން ނެގިފައިވާ މާއްދީ ހެކިތަކާއި ގުޅޭ ހެކިބަސް ނެގި
ގއ މާމެންދޫގައި ހިނގި މާރާމާރީ- މި މާރަމާރީގައި އުދައްޔު ވަނީ މަރުވެފައި
ގއ. މާމެންދޫގައި ހިންގި ގްރޫޕް މާރާމާރީއެއްގައި ލިބުނު ޒަޚަމްތަކުގެ ސަބަބުން މަރުވި 17 އަހަރުގެ އަހުމަދު އުދައްޔުގެ މަރުގެ މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުޙަލާއެވެ.
ބުރާސްފަތި ދުވަހުގެ އަޑުއެހުމުގައި ވަނީ ގއ އަތޮޅު ހޮސްޕިޓަލުގައި މަސައްކަތް ކުރައްވަމުން ގެންދަވާ ޑޮކްޓަރެއްގެ ހެކިބަސްވެސް ނަގާފައެވެ. މީގެ ކުރިންވެސް މި މައްސަލައާ ގުޅޭ ރިޕޯޓަކާއި ގުޅިގެން އޭނާގެ ހެކިބަސް ނަގާފައިވެއެވެ.
ހެކިވެރިޔާ ވިދާޅުވީ، އުދައްޔު ގެނައިރުވެސް އޭނާގެ ވިންދެއް ނެތް ކަމަށެވެ. އެގޮތުން ހިތުގެ ވިންދުގެ އެއްވެސް ކަހަލަ ނިޝާނެއް ފެންނަން ނެތްކަން ހެކިވެރިޔާ ފާހަގަ ކުރެއްވިއެވެ.
އުދައްޔު މަރުވީ ލިބުނު އަނިޔާތަކުގެ ސަބަބުން ލޭ ހޮޅިތައް ފަޅައިގެން ގޮސް، ހިތުގެ ވިންދު ހުއްޓި ނޭވާ ހުއްޓިގެން ކަމަށް އޭނާ ވިދާޅުވިއެވެ.
ދެން ހާޒިރުކުރީ އެކްސިޑެންޓު ހިނގިއިރު އެ ރަށު ހެލްތު ސެންޓަރުގައި މަސައްކަތް ކުރަމުން ދިޔަ ނަރުހެކެވެ. އޭނާވެސް ވަނީ އުދައްޔު ހޮސްޕިޓަލަށް ގެނައިރު އޮތް ޙާލަތާއި ގުޅޭގޮތުން ހެކިބަސް ދީފައެވެ.
އޭނާ ވަނީ މި މައްސަަލައިގައި ދެން އަނިޔާވި އުދައްޔުގެ ބޭބެ ކަމަށްވާ ފިރުޝާންއަށް ދިން ފަރުވާއާ ގުޅޭގޮތުންވެސް ވާހަކަ ދައްކާފައެވެ. އެގޮތުން އޭނާއަށް ފަރުވާ ނުދީ އޭނަގެ ކޮށްކޮ އުދައްޔުއަށް ފަރުވާ ދިނުމަށް އޭނާ ތަކުރާރުކޮށް ބުނަމުން ދިޔަކަމަށް ހެކިވެރިޔާ ބުންޏެވެ.
ހަތަރުވަނައަށް ހާޒިރުކޮށްފައިވަނީ ފުލުހުންގެ ފިޒިކަލް އެވިޑެންސް ލެބޯޓެރީގެ ހެޑްގެ ގޮތުގައި މަސައްކަތް ކުރައްވަމުން ގެންދަވާ އޮފިސަރެވެ. އޭނާ ވަނީ މި މައްސަލައާ ގުޅިގެން ނެގިފައިވާ މާއްދީ ހެކިތަކާއި ގުޅޭ ރިޕޯޓާއި ގުޅިގެން ހެކިބަސް ދެއްވާފައެވެ.
އޭގެ ތެރޭގައި 3 މާއްދީ ހެކި ހިމެނެއެވެ. އެއީ ވަޅި ތިލައަކާއި، ވަޅި މުއްގަނޑެއްގެ އިތުރުން ކިވީ ބްރޭންޑުގެ ވަޅިއެކެވެ.
އެ ހެކިވެރިޔާ ވަނީ ހޮސްޕިޓަލުގެ ވޯރޑުން ނެގި ތިލައާއި، މި މައްސަލައިގެ ސީންއިން ފެނުނު މުއްގަނޑަކީ އެއް ވަޅިއެއްގެ ބައިތަކެއްކަން ޔަގީންވާކަމަށް ވިދާޅުވެ، ޝަރީއަތުގައި އެކަން ދައްކުވައިދެއްވާފައެވެ. އެގޮތުން އެ ތިލައާއި މުއްގަނޑުގެ ބައިވެފައިވާ ބައި ގުޅިގެންދާ ގޮތަށް ބަލާއިރު، އެއީ އެއް ވަޅިއެއްކަން އެނގޭކަމަށް އަމަލީ ގޮތުން ދައްކުވައިދެއްވަމުން އޭނާ ވިދާޅުވިއެވެ.
މި މައްސަލައިގެ ދައުލަތުގެ 3 ސިއްރު ހެއްކެއްގެ ހެކިބަސް ނެގުން އަދި އެބައޮތެވެ. އެގޮތުން އޭޕްރީލް މަހުގެ 12 ވަނަ ދުވަހު އެ އަޑުއެހުން ބޭއްވެވުމަށް ގާޒީ އަލީ ނަދީމް ވަނީ ނިންމަވާފައެވެ.
އެއަށްފަހު ދެން އޮންނާނީ ދިފާއީ ހެކިންގެ ހެކިބަސް ނެގުމެވެ.
