ވެސްޓް ހޭމް ބަލިކޮށް ނިއުކާސަލް އިން ތިން ވަނައިގައި ހިފަހައްޓައިފި

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މޮޅުވެ ނިއުކާސަލް ޔުނައިޓެޑުގެ ލީގު ތާވަލްގެ ތިން ވަަނައިގައި ހިފަހައްޓައިފި އެވެ.

ބުދަ ދުވަހުގެ ރޭ ވެސްޓް ހޭމްގެ ދަނޑުގައި އެ ޓީމާ ދެކޮޅަށް ނިކުތްއިރު ނިއުކާސަލް އޮތީ ވެސް ރަނގަޅު ފޯމެއްގަ އެވެ. އެއީ އެ މެޗުގެ ކުރިން ލީގުގައި މެންޗެސްޓަރ ޔުނައިޓެޑު ބަލިކޮށްފައި އޮތުމުންނެވެ. ނިއުކާސަލް އިން ވެސްޓް ހޭމްގެ މައްޗަށް ކުރި ހޯދީ 5-1 އިންނެވެ. މެޗު ފަށައިގެން ހަ ވަނަ މިނެޓުގައި އެލަން ސެއިންޓް މެކްސިމިން ތަނަވަސްކޮށްދިން ފުރުސަތެއްގައި ނިއުކާާސަލަށް ލީޑު ނަގައިދިނީ ކަލުމް ވިލްސަން އެވެ. އޭގެ ފަހުން 13 ވަނަ މިނެޓުގައި ޖޮއެލިންޓަން ވަނީ އެ ޓީމުގެ ލީޑު ފުޅާކޮށްދީފަ އެވެ. އޭނާ ލަނޑު ޖެހީ ފަބިއަން ޝާ ތަނަވަސްކޮށްދިން ފުރުސަތެއްގަ އެވެ. ފުރަތަމަ ހާފު ނިމުމުގެ ފަސް މިނެޓު ކުރިން ވެސްޓް ހޭމް އިން ވަނީ ލަނޑު ޖަހައި ފަރަގު ކުޑަކޮށްފަ އެވެ. އެ ޓީމަށް ލަނޑު ޖަހައިދިނީ ކާޓް ޒޫމާ އެވެ.

ދެ ވަނަ ހާފުގައި ނިއުކާސަލް އިން ވަނީ ތިން ލަނޑު ޖަހައިފަ އެވެ. ހާފު ފަށައިގެން ފުރަތަމަ މިނެޓުގައި އެ ޓީމުގެ ތިން ވަނަ ލަނޑު ޖެހީ ވިލްސަން އެވެ. އޭގެ ފަހުން 82 ވަނަ މިނެޓުގައި އެލެގްޒެންޑާ އިސާކް ވަނީ ނިއުކާސަލްގެ ހަތަރު ވަނަ ލަނޑު ޖަހައިފަ އެވެ. އެ ޓީމުގެ ފަހު ލަނޑު 90 ވަނަ މިނެޓުގައި ޖެހީ ޖޮއެލިންޓަން އެވެ.

މޮޅާއެކު ނިއުކާސަލް ތިން ވަނައިގައި އޮތީ ކުޅުނު 28 މެޗުން 53 ޕޮއިންޓާއެކު އެވެ. ހަތަރު ވަނައިގައި އޮތް މެންޗެސްޓަރ ޔުނައިޓެޑަށް ވެސް ލިބެނީ ހަމަ 53 ޕޮއިންޓެވެ. ލަނޑުގެ ގޮތުން ކުރި ހޯދަނީ ނިއުކާސަލް އެވެ.