ސަރުކާރުން އިމާރާތްކުރާ 4،000 ސޯޝަލްގެ ޕްރޮގްރެސް ނުވަތަ ކުރިއެރުން ރަނގަޅުކަމަށާއި، މާލެ ސަރަހައްދުން ދޫކުރާ ގޯއްޗަށް އެދި ކުރިމަތިލާފައިވާ މީހުންގެ ފޯމްތައް އިވެލުއޭޓް ކުރުމުގެ މަސައްކަތް ކުރިއަށް އޮތް ޖޫން މަހުގެ ކުރީކޮޅު ނިންމާލެވޭނެ ކަމަށް ހައުސިން މިނިސްޓްރީން ބުނެފިއެވެ.

އަންގާރަ ދުވަހު މަޖިލީހުގައި މާލޭގެ މީހުންނަށް ދޫކުރާ ގޯއްޗާ ބެހޭ ގޮތުން ހޯރަފުށީ ދާއިރާގެ އެމްޑީޕީގެ މެމްބަރު އަހުމަދު ސަލީމް ކުރެއްވި ސުވާލަށް ޖަވާބުދެއްވަމުން ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މިނިސްޓަރު މުހައްމަދު އަސްލަމް ވިދާޅުވީ މާލެ ސަރަހައްދުގެ ގޯއްޗަށް އެދި ހުށަހެޅި ފޯމުތައް ބެލުމުގެ މަސައްކަތް ކުރަނީ ވަކި ކޮމިޓީއަކުން ކަމަށެވެ. އަދި އެވަލުއޭޝަންގެ މަސައްކަތް ނިމުމުން ކޮމިޓީން އެކަން އަންގާނެކަމަށެވެ. އެ މަސައްކަތް މޭއިގެ ނިޔަލަށް ނިންމާ، އޭގެ މައުލޫމާތު ޖޫން މަހުގެ ކުރީކޮޅު އެމަނިކުފާނަށް ފޯރުކޮށްދެވޭނެކަމަށް އަންދާޒާކުރައްވާ ކަމަށް ވިދާޅުވިއެވެ.

މީގެ އިތުރުން މާފަންނު އުތުރު ދާއިރާގެ އެމްޑީޕީގެ މެމްބަރު އިމްތިޔާޒް ފަހުމީ ވަނީ ސަރުކާރުން އިމާރާތްކުރާ 4،000 ސޯޝަލް ހައުސިން ޔުނިޓުގެ މަސައްކަތް ކުރިއަށްދާ ގޮތާއި މެދު ސުވާލުކުރައްވާފައެވެ. އެ މަސައްކަތުގެ ތެރެއިން ނިމުނީ ކިތައް ފްލެޓްތޯ އޭނާ ސުވާލުކުރެއްވިއެވެ.

ޖަވާބުގައި މިނިސްޓަރ ވިދާޅުވީ އެ މަސައްކަތް ކުރިއަށް ގެންދަނީ އިންޑިއާގެ ދެ ކުންފުންޏަކާއި ހަވާލުކޮށްގެން ކަމަށެވެ. އަދި އެ މަސައްކަތުގެ ސްޕީޑު ރަނގަޅުކަމަށާއި ބައެއް ފްލެޓްތަކުގެ ފިނިޝިންގެ މަސައްކަތް ކުރިއަށް ދާ ކަމަށް ވަނީ ވިދާޅުވެފައެވެ. އަދި މަސައްކަތް ކުރިއަށް ދާ ގޮތް ރަނގަޅު ކަމަށް ފާހަގަކުރެއްވިއެވެ.

މާލެ ސަރަހައްދުން ދޫކުރަން ހަމަޖެހިފައިވާ 3،000 ގޯއްޗަށް 15،000 އަށް ވުރެ ގިނަ މީހުން ކުރިމަތިލިއެވެ. އަދި އެ ހުށަހެޅުންތައް އިވެލުއޭޓްކޮށް ނިންމާ ދައުރު ނިމުމުގެ ކުރިން ގޯއްޗާއި ފްލެޓުތައް ހަވާލު ކުރާނެ ކަމަށް ސަރުކާރުން ވަނީ ބުނެފައެވެ.