ހުޅުމާލޭގައި ދެ ސައިކަލެއް ޖެހި ހިނގި އެކްސިޑެންޓްގައި އެކަކުގެ ހާލު ސީރިއަސް

ހުޅުމާލެ ފޭސް-2 ގައި ނުރައްކާތެރި އެކްސިޑެންޓެއް ހިނގައި އެކަކަށް ސީރިއަސް އަނިޔާތަކެއް ލިބިއްޖެއެވެ.

ފުލުހުން ބުނީ ހުޅުމާލެ ފޭސް-2ގެ ޖޭއެމްސީ ސައިޓް ކައިރީގައި ދެ ސައިކަލެއް ޖެހި އެކްސިޑެންޓެއް ހިނގާފައިވާ ކަމަށެވެ. މިއެކްސިޑެންޓްގެ މައުލޫމާތު އާދިއްތަ ދުވަހުގެ ރޭ 1:20 ހާއިރު ލިބިފައިވާ ކަމަށް ފުލުހުން ބުނެއެވެ.

މިއެކްސިޑެންޓްގައި 19 އަހަރުގެ ފިރިހެނަކާއި، 56 އަހަރުގެ ފިރިހެނެކަށް އަނިޔާވެފައިވާއިރު، 56 އަހަރުގެ މީހާގެ ހާލު ސީރިއަސް ކަމަށް މައުލޫމާތު ލިބޭ ކަމަށް ފުލުހުން ބުނެއެވެ.

ފުލުހުން ބުނީ މިއެކްސިޑެންޓާއި ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.

މިއެކްސިޑެންޓްގައި އަނިޔާވި ދެމީހުންނަށް ފުރަތަމަ ފަރުވާ ދީފައިވަނީ ހުޅުމާލެ ހޮސްޕިޓަލްގައެވެ. މިހާރު ފަރުވާ ދެމުން ގެންދަނީ އޭޑީކޭގައެވެ.

އެކްސިޑެންޓާއި ގުޅިގެން 56 އަހަރުގެ މީހެއް ހާލު ސީރިއަސްވެފައިވާއިރު، ހޯމަ ދުވަހުގެ ހެނދުނު ފޭސް-2 ގައި ހިނގި އެކްސިޑެންޓްގައި 59 އަހަރުގެ ފިރިހެނެއް ވަނީ މަރުވެފައެވެ.