ނަޕޯލީގެ ދަނޑުގައި މިލާނުން ފެންވަރު ދައްކާލައިފި

އިޓާލިއަން ލީގުގެ އެއް ވަނައިގައި އޮތް ނަޕޯލީގެ ދަނޑުގައި އޭސީ މިލާނުން ފެންވަރު ދައްކާލައި، ބޮޑު މޮޅެއް ހޯދައިފި އެވެ.

އާދިއްތަ ދުވަހުގެ ރޭ ޑިއޭގޯ އަރްމާންޑޯ މަރަޑޯނާގައި ކުޅުނު މެޗު އޭސީ މިލާނުން ކާމިޔާބު ކުރީ 4-0 އިންނެވެ. މެޗު ފަށައިގެން 17 ވަނަ މިނެޓުގައި މިލާނަށް ލީޑު ނަގައިދިނީ ރަފައެލް ލެއާއޯ އެވެ. އެއީ އެ ޓީމުގެ ބްރަހިމް ޑިއާޒް ތަނަވަސްކޮށްދިން ފުރުސަތަކުންނެވެ. އޭގެ ފަހުން 25 ވަނަ މިނެޓުގައި ޑިއާޒް ވަނީ މިލާންގެ ދެ ވަނަ ލަނޑު ޖަހައި ލީޑު ފުޅާކޮށްފަ އެވެ. މިލާންގެ އަނެއް ދެ ލަނޑު ފެނުނީ މެޗުގެ ދެ ވަނަ ހާފުގަ އެވެ. ދެ ވަނަ ހާފު ފަށައިގެން މެޗުގެ 59 ވަނަ މިނެޓުގައި ސަންޑްރޯ ޓޮނާލީ ތަނަވަސްކޮށްދިން ފުރުސަތެއްގައި މިލާންގެ ތިން ވަނަ ލަނޑު ޖެހީ ލެއާއޯ އެވެ. އެ ޓީމުގެ ފަހު ލަނޑު 67 ވަނަ މިނެޓުގައި ޑޭވިޑް ކަލަބްރިއާ ތަނަވަސްކޮށްދިން ފުރުސަތެއްގައި އެ ޓީމުގެ ހަތަރު ވަނަ ލަނޑު ޖެހީ އަލެކްސިސް ސަލަމޭކާ އެވެ.

މިއީ މި ސީޒަންގައި މޮޅު ކުޅުމެއް ދައްކަމުން އަންނަ ނަޕޯލީގެ ތިން ވަނަ ބައްޔެވެ. މެޗުން ބަލިވި ނަމަވެސް ލީގު ތާވަލްގެ އެއް ވަނައިގައި ނަޕޯލީ އޮތީ ކުޅުނު 28 މެޗުން 71 ޕޮއިންޓާއެކު އެވެ. ނަޕޯލީ އަތުން ހޯދި މޮޅާއެކު މިލާން ވަނީ 28 މެޗުން 51 ޕޮއިންޓު ހޯދައިގެން ތިން ވަނަ އަށް ޖެހިލައިފަ އެވެ. މި ސީޒަންގެ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ވެސް މި ދެ ޓީމު ބައްދަލު ކުރާނެ އެވެ.