ރިޟްވާން ރަހީނު ކުރުމަށްފަހު ހިނގި އެއްވެސް ކަމެއް އެނގިފައި ނުވާކަމަށް ފުލުހުން ބުނެފި
އާއިލާއިން ހުށަހެޅި މައްސަލައިގެ އަޑުއެހުމެއް މިއަދު ބޭއްވީ 7 މަސް ފަހުން
ގެއްލިފައިވާ ނޫސްވެރިޔާ ރިޟްވާން އޭނާގެ މަންމައާއެކު
ގެއްލުވާލާފައިވާ ނޫސްވެރިޔާ އަޙުމަދު ރިޟްވާން ޢަބްދުﷲ ރަހީނު ކުރުމަށްފަހު ހިނގި އެއްވެސް ކަމެއް މިހާތަނަށް އެނގިފައި ނުވާކަމަށް ފުލުހުން ބުނެފިއެވެ.
ފުލުހުން މިހެން ބުނީ މިދިޔަ އަހަރުގެ ޑިސެމްބަރު މަހު ރިޟްވާންގެ އާއިލާއިން ސިވިލް ކޯޓަށް ހުށަހެޅި މައްސަލައިގައި 7 މަސްފަހުން ބޭއްވި އާޑުއެހުމުގައި ދައުލަތުގެ ފަރާތުން ޖަވާބުދާރީވަމުންނެވެ.
ރިޟްވާންގެ އާއިލާއިން ބުނީ 8 އޯގަސްޓް 2014 ދުވަހު ބަޔަކު އަޙްމަދު ރިޟްވާން ވަގަށްނަގިފަހުން އޭނާއަށް ވީގޮތެއް ނޭނގި ގިނަ ދުވަސްތަކެއްވެގެން ދިޔައިރު، ރިޟްވާނަށް ވީގޮތެއް ހޯދުމުގެ މަސައްކަތް އޭނާގެ ޢާއިލާއާއި އެކުވެރިން ކެނޑިނޭޅި ކުރަމުން ދިޔަ ކަމަށާއި ފުލުހުން ކޮށްފައިވާ ތަޙުޤީޤުގެ އަލީގައި ރިޟްވާނަށް ވީގޮތް ބުނެދިނުމަށް ޢާއިލާގެ ފަރާތުން ތަކުރާރުކޮށް އެދުމުންވެސް އެމަޢުލޫމާތު ޢާއިލާއަށް ހާމަކުރަން ފުލުހުން އުޟުރުވެރިވެފައިވާ ކަމަށެވެ.
އަދި މަޢުލޫމާތު ލިބިގަތުމުގެ ޙައްޤަކީ ޤާނޫނުއަސާސީގެ 29 ވަނަ މާއްދާއިން ކަށަވަރުކޮށްދީފައިވާ އަސާސީ ޙައްޤަކަށްވެފައި، މަޢުލޫމާތު ހޯދުމުގެ އަމުރަކަށް އެދުމުގެ ޤާނޫނީ ޙައްޤު މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުން ލިބިދީފައިވާތީ، މޯލްޑިވްސް ޕޮލިސް ސަރވިސްގެ މައްޗަށް އެފަދަ އަމުރެއް ކޮށްދިނުމަށް އެދި ސިވިލް ކޯޓަށްމައްސަލަ ހުށަހަޅާފައިވަނީ 2016 ވަނަ އަހަރުގެ ޑިސެމްބަރު މަހުގައެވެ.
ޢާއިލާގެ ފަރާތުން އެފަދަ އަމުރަކަށްއެދި ކޯޓަށް މައްސަލަ ހުށަހެޅި މައިގަނޑު ސަބަބަކީ، މިމައްސަލައިގައި ކަން ހިނގާފައިވާގޮތަށް ބަލާއިރު، މައްސަލައާއި ގުޅިގެން ފުލުހުންނަށް ލިބިފައިވާ މަޢުލޫމާތު އާއިލާއަށް ފުލުހުން ހާމަނުކުރަނީ ފުލުހުންގެ މައްޗަށް އޮތް އެހެން ނުފޫޛުތަކެއްގެ ސަބަބުންކަމަށް ޢާއިލާއަށް ޤަބޫލު ކުރެވޭތީ، ރިޟްވާނަށް ވީގޮތުގެ މަޢުލޫމާތު ޢާއިލާއަށް ލިބެން އޮތް ހަމައެކަނި ފުރުޞަތަކީ ޝަރުޢީ ކޯޓަކުން އެމަޢުލޫމާތު ޢާއިލާއަށް ހާމަކުރުމަށް ފުލުހުންގެ މައްޗަށް އަމުރުކުރުންކަމަށް ވާތީކަމަށް އެއާއިލާއިން ވަނީ ބުނެފައެވެ.
އާއިލާއިން ބުނީ މިމައްސަލަ ހުށަހެޅި، 7 މަސް ދުވަސް ފާއިތުވިފަހުން، 5 ޖުލައި 2017 ދުވަހު ބޭއްވުނު އަޑުއެހުމުގައި ދަޢުވާއަށް ފުރަތަމަ ފަހަރަށް ޖަވާބުދާރީ ވަމުން، ބަޔަކު ރިޟްވާން ވަގަށްނެގިފަހުން އޭނާއަށް ވީނުވީގޮތެއް މިހާތަނަށް ފުލުހުންނަށް ހޯދިފައިނުވާކަމަށް މޯލްޑިވްސް ޕޮލިސް ސަރވިސްގެ ފަރާތުން ބުނެފައިވާ ކަމަށެވެ. އަދި ރިޟްވާން ހޯދުމަށް ކެޑިނޭޅި ގިނަ މަސައްކަތްތަކެއް ކުރަމުންދާކަމަށް ތަކުރާރުކޮށް ފުލުހުން ބުނަމުން ދާއިރު، ފުލުހުން ކޯޓުގައި ދީފައިވާ އެޖަވާބަކީ ޢާއިލާއަށް ޤަބޫލުކުރަން ދަތި ޖަވާބެއް ކަމަށެވެ.
އާއިލާއިން ބުނީ ޝަރީޢަތުގައިވެސް ދަންނަވާފައިވާނެ ފަދައިން، ޢާއިލާގެ ފަރާތުން ވަރަށް އިޚްލާސްތެރިކަމާއެކު ދިވެހި ދަޢުލަތުގެ ކިބައިން، މިމައްސަލައާ ގުޅިގެން ފުލުހުން ހާމަކުރާ މަޢުލޫމާތު ސިއްރުކުރަން ޝަރުޠުކޮށް ނަމަވެސް، އެހާދިސާގެ ޙަޤީޤަތް ޢާއިލާއާ ޙިއްޞާކޮށް، އެކަމުގެ ސަބަބުން ޢާއިލާއަށް ލިބިފައިވާ ހިތްދަތިކަމަށް ލުޔެއް ހޯދައިދިނުމަށް އެދޭ ކަމަށެވެ.
ރިޟްވާންގެ އާއިލާއިން ބުނީ ރިޟްވާން ވަގަށްނެގިތާ 3 އަހަރުވާން ގާތްވަމުންދާއިރު، ސިވިލް ކޯޓަށް ހުށަހަޅާފައިވާ ރިޟްވާންގެ މައްސަލައަކީ ރިޟްވާންގެ ޢާއިލާއަށް އިންސާފު ހޯދައިދިނުމަށް މަސައްކަތް ކުރަމުންދަނިކޮށް މަރާލާފައިވާ ޔާމީން ރަޝީދު ކުރަމުން ދިޔަ މަސައްކަތްތަކުގެ ތެރެއިން މަސަތްކަތެއް ކަމަށެވެ. ނަމަވެސް ހިތާމައަކީ، ބުދަދުވަހުގެ 11:00 އަށް ސިވިލް ކޯޓުގައި ރިޟްވާންގެ މައްސަލަ ތާވަލުކޮށްފައި އޮތް އިރު، ހަމަ ބުދަދުވަހުގެ 10:30 ގައި އެކޯޓުގައި ތާވަލުކޮށްފައި އޮތީ ޔާމީން ރަޝީދުގެ މަރާގުޅިގެން ޢާއިލާއިން މޯލްޑިވްސް ޕޮލިސް ސަރވިސްގެ މައްޗަށް ދަޢުވާކޮށްފައިވާ މައްސަލައަކަށް ވުން ކަމަށް އެއާއިލާއިން ބުނެއެވެ.
އެދެއާއިލާއިން މިއަދު ނެރުނު ބަޔާނެއްގައި ބުނެފައިވަނީ ރިޟްވާނާއި ޔާމީންގެ ޢައިލާއަށް އިންސާފު ލިބޭނީ މައްސަލައިގައި ކަން ހިނގާ ދިޔަގޮތުގެ ޙަޤީޤަތާއި އެކަން ހިނގަން މެދުވެރިވި ސަބަބުތައް ހާމަވެގެން ކަމަށެވެ. އަދި ރިޟްވާން އާއި ޔާމީންގެ ޢާއިލާގެ ދުޢާއަކީ މިފަދަ އަނިޔާވެރިކަމާއި ހިތްދަތިކަން އެހެން އެއްވެސް ޢާއިލާއަކަށް ތަޙައްމަލުކުރަން ނުޖެހުން ކަމަށެވެ.
