ސާފް ޗެމްޕިއަންޝިޕް ބާއްވާނެ ފައިނަލް ތާރީޚެއް ކަނޑައަޅައި، ފޯމެޓު ބަދަލުކުރުމުގެ މަޝްވަރާތައްކޮށްފި
2 އެޕްރީލު 2023 | އާދީއްތަ 03:00އިންޑިއާގައި މުބާރާތް ކުރިއަށް ދާނީ މިއަހަރުގެ ޖޫން މަހުގެ 21 ވަނަ ދުވަހުން ފެށިގެން ޖުލައި މަހުގެ ތިން ވަނަ ދުވަހާ ހަމައަށް ބެންގަލޫރުގައި
ސާފް ޗެމްޕިއަންޝިޕްގެ ތަައްޓާއެކު އިންޑިޔާ ކުޅުންތެރިން، މި އަހަރު މުބާރާތް އޮންނާނީ އިންޑިޔާގައި
މިއަހަރުގެ ސާފް ޗެމްޕިއަންޝިޕް ބާއްވާނެ ފައިނަލް ތާރީޚެއް ފާސްކޮށް، މުބާރާތުގެ ފޯމެޓަށް ބަދަލު ގެންނާނެ ގޮތުގެ މަޝްވަރާތައް ކުރިއަށް ގެންގޮސްފި އެވެ.
މިއަހަރުގެ މުބާރާތް ބޭއްވުމަށް ނިންމާފައި ވަނީ އަވައްޓެރި އިންޑިއާގަ އެވެ. އިންޑިއާގައި މުބާރާތް ކުރިއަށް ދާނީ މިއަހަރުގެ ޖޫން މަހުގެ 21 ވަނަ ދުވަހުން ފެށިގެން ޖުލައި މަހުގެ ތިން ވަނަ ދުވަހާ ހަމައަށް ބެންގަލޫރުގަ އެވެ. ހުކުރު ދުވަހު ކުރިއަށް ދިޔަ ސައުރު އޭޝިއަން ފުޓުބޯޅަ ފެޑެރޭޝަން (ސާފް)ގެ ވާޗުއަލް އެކްސްކޯ ބައްދަލުވުމުގައި ވަނީ އެވާހަކަތައް ދައްކައިފަ އެވެ. އެ ބައްދަލުވުމުގައި ވަނީ މުބާރާތް އިތުރަށް ވަރުގަދަ ކުރުމުގެ ގޮތުން ޖުމުލަ އަށް ޓީމަށް ވާދަ ކުރެވޭ ގޮތަށް ފޯމެޓު ބަދަލުކުރުމަށް މަޝްވަރާކޮށްފަ އެވެ. އެގޮތުން ސާފް ސަރަހައްދަށް ނިސްބަތް ނުވާ އެއް ޓީމު ނުވަތަ ދެ ޓީމަކަށް ފުރުސަތު ދިނުމާ ގުޅޭ ގޮތުން މަޝްވަރާތައް ކުރިއަށް ގެންދިޔަ އެވެ. މިއީ އިންޑިއާ އިން ހުށަހަޅާފައިވާ ޚިޔާލެކެވެ. ސާފް ޗެމްޕިއަންޝިޕާ ގުޅޭ ގޮތުން ބޭއްވި ޕްރެސްއެއް ގައި އޯލް އިންޑިއަން ފުޓުބޯޅަ ފެޑެރޭޝަން (އޭއައިއެފްއެފް)ގެ ރައީސް ކަލްޔަން ޗޯބޭ ވަނީ އެ ވާހަކަ ދައްކަވައިފަ އެވެ. އޭނާ އޭރު ވިދާޅުވީ ސަރަހައްދުން ބޭރުގެ ޤައުމަކަށް މުބާރާތުގައި ބައިވެރިވުމަށް ފުރުސަތު ދީފި ނަމަ، މިހާރަށް ވުރެ ހުރިހާ ގޮތަކުން ވެސް މުބާރާތް ފޯރި ގަދަވާނެ ކަމަށެވެ.
އެންމެ ފަހުން ސާފް ޗެމްޕިއަންޝިޕް ބާއްވާފައި ވަނީ 2021 ވަނަ އަހަރު ރާއްޖޭގަ އެވެ. އެ އަހަރުގެ މުބާރާތުގައި ފަސް ޤައުމަކުން ވާދަކޮށްފައިވާއިރު، މުބާރާތް ކާމިޔާބުކޮށްފައި ވަނީ އިންޑިއާ އިންނެވެ.
