ރަށްރަށުގައި މަސްތުވާތަކެތީގެ ޝިކާރައަކަށްވެފައިވާ މީހުންނަށް ފަރުވާ ދިނުމުގެ ޕްރޮގްރާމްތައް ކުރިއަށްގެންދެވޭ: އެންޑީއޭ

އަތޮޅުތެރޭގެ ރަށްރަށުގައި މަސްތުވާތަކެތީގެ ޝިކާރައަކަށްވެފައިވާ މީހުންނަށް ފަރުވާ ދިނުމަށް އެކިއެކި ޕްރޮގްރާމްތައް ކުރިއަށް ގެންދާ ކަމަށް، ނޭޝަނަލް ޑްރަގް އެޖެންސީ (އެންޑީއޭ)އިން ބުނެފިއެވެ.

އެންޑީއޭއިން ކުރަމުން ގެންދާ މަސައްކަތްތަކާ ގުޅޭގޮތުން ރާއްޖެޓީވީގައި ވާހަކަފުޅުދައްކަވަމުން، އެންޑީއޭގެ ސީއީއޯ އިމާދު ސާލިހު ވިދާޅުވީ، ޑްރަގް ޓްރީޓްމެންޓް އެންޑް ރިހެބިލިޓޭޝަންގެ ޚިދުމަތް ފޯރުކޮށްދިނުމުގެ މަސައްކަތްތައް ވަރަށް ފުޅާކުރެވިފައިވާކަމަށެވެ. މާލެ ސިޓީގެ އިތުރުން އަތޮޅުތެރޭގައިވެސް މީހުންނަށް ފަރުވާދިނުމުގެ މަސައްކަތްތައް ކުރާކަމަށް އިމާދު ވިދާޅުވިއެވެ.

އިމާދު ވިދާޅުވީ އެންޑީއޭގެ އަމާޒަކީ މަސްތުގެ ޝިކަރާއަށްވެފައިވާ މީހުންނަށް ފަރުވާދިނުމަށްފަހު، އެމީހުން އަނބުރާ މުޖުތަމައަށް ނެރުން ކަމަށެވެ. އެގޮތުން މިހާރުވެސް އައްޑޫ ސިޓީ، ގދ. ތިނަދޫ، ފުވައްމުލައް ސިޓީ، އަދި ގއ. ވިލިނގިލީގައި ކޮމިއުނިޓީ ފަރުވާގެ ޕްރޮގްރާމް ކުރިއަށް ގެންދާ ކަމަށެވެ. އަދި މި ކުރެވޭ މަސައްކަތުން ޑިޓޮކްސިފައި ކުރެވޭ ކަމަށް އިމާދު ވިދާޅުވިއެވެ.

މީގެ އިތުރުން އިމާދު ވިދާޅުވީ، ކުޅުދުއްފުށި ސިޓީގައި މެތަޑޯން ޕްރޮގްރާމެއް ފަށައިގެން ކުރިއަށްދާކަމަށެވެ. ކުޅުދުއްފުށީ ރީޖަނަލް ހޮސްޕިޓަލާއި ކައުންސިލް ގުޅިގެން ކުރިއަށްގެންދާ މި ޕްރޮގްރާމްގައި މިހާރުވެސް 10 ކްލައިންޓުން ފަރުވާ ހޯދަމުންދާކަމަށް އޭނާ ވިދާޅުވިއެވެ.

އިމާދު ވިދާޅުވީ، ފަރުވާ ދިނުމުގައި ރަނގަޅުކުރަންޖެހޭ ވަރަށް ގިނަ ކަންކަން އެބަހުރިކަމަށެވެ. އަތޮޅުތެރޭގައި ވަރަށް ގިނަ ޕްރޮގްރާމްތައް ކުރިއަށްގެންދާއިރު، ރަނގަޅު ނަތިީޖާއެއް ހާސިލްކުރުމަކީވެސް އުދަނގޫ، އެހާމެ ބުރަ މަސައްކަތެއްކަމަށް އޭނާ ވިދާޅުވިއެވެ. އަދި ވިދާޅުވީ އެންޑީއޭގެ ފަރާތުން ހަރުދަނާ ކޮލިޓީ ސަރވިސްއެއް ދިނުމަށް ކުރަންޖެހޭ މަސައްކަތްތައް ހުއްޓުމެއްނެތި ކުރަމުންދާ ކަަމަށެވެ.