ޕާކިސްތާނުގެ ކަރާޗީގައި ހުކުރު ދުވަހު ބެހި ކާބޯތަކެތި ހޯދަން އުޅުމުގެ ތެރޭގައި ފިތިގެން 11 މީހުން މަރުވެއްޖެއެވެ.

ބޭރުގެ މީޑިއާތަކުގައި ރިޕޯޓްކޮށްފައިވާ ގޮތުގައި މި ހާދިސާ ހިނގާފައިވަނީ ހުކުރު ދުވަހުއެވެ. އެ ހާދިސާގައި 11 މީހުން މަރުވެފައިވާއިރު، އޭގެ ތެރޭގައި ފަސް އަންހެނުންނާއި ތިން ކުޑަކުދިން ހިމެނޭކަމަށް އެ ގައުމުގެ ފުލުހުން ވަނީ މީޑިއާތަކަށް މައުލޫމާތުދީފައެވެ.

ޕާކިސްތާނު ފުލުހުން ބުނެފައިވާގޮތުގައި މި ހާދިސާ ހިނގީ ކަރާޗީގައި ހުންނަ ފެކްޓްރީ ސައިޓެއްގައެވެ. އެގޮތުން ކާބޯތަކެތީގެ އެހީ ފޯރުކޮށްދޭ ބަޔަކު އެތަކެތި ބަހަންފެށުމުން އެތައް ބަޔަކު އެއްފަހަރާ އެއްވެ އެތަކެތި ނަގަން އުޅުމުން މީހުން ފިތުނީ ކަމަށް ރިޕޯޓުތައް ބުނެއެވެ. މި ހާދިސާގައި ފަސް މީހުން ވަނީ ހޮސްޕިޓަލުގައި އެޑްމިޓްކޮށްފައެވެ.

ކާބޯތަކެތި ފޯރުކޮށްދިން ޖަމްއިއްޔާގެ އިސް ބޭފުޅަކު ރޮއިޓަރސްއަށް ބުނެފައިވަނީ، ކާބޯތަކެއްޗާއެކު ފައިސާވެސް ބަހާކަމަށެވެ. އެއީ ފަގީރުން އުޅޭ ސަރަހައްދަކަށްވާތީ ކުރާ ކަމެއް ކަމަށާއި، އެގޮތަށް ކަންކަން ކުރަމުން އަންނަތާ ދުވަސްކޮޅެއް ވެދާނެކަމަށެވެ. ނަމަވެސް ހުކުރު ދުވަހު އެތައް ހާސް ބަޔަކު އެއްފަހަރާ އެއްވިކަމަށާއި، މީހުން ހަމަޔަކަށްއަޅުވަން މަސައްކަތްކުރިނަމަވެސް އެއްބަޔަކު ވެއްޓި، އެހެން މީހުންގެ ފައި ދަށުވެގެން މަރުވި ކަމަށްވެސް އޭނާ ވަނީ ބުނެފައެވެ.

ރޮއިޓަރސްއިން ބުނެފައިވާގޮތުގައި މިފަދަ އިތުރު ހާދިސާތަކެއްވެސް ފާއިތުވި ހަފުތާތެރޭގައި ޕާކިސްތާނުގައި ވަނީ ހިނގާފައެވެ. އެގޮތުން، އެކި ސައިޓުތަކުގައި ފަސް މީހަކު މިހާތަނަށް އެފަދަ ގޮތަކަށް މަރުވެފައިވާކަމަށް ވަނީ ރިޕޯޓްކޮށްފައެވެ.

ޕާކިސްތާނުގެ އިގްތިސާދު ދަށްވުމުގެ ސަބަބުން އެ ގައުމުގެ ހާލަތު ވަނީ ވަރަށް ބޮޑަށް ދަށްވެފައެވެ. އެގޮތުން ތަކެތީގެ އަގު އިންތިހާއަށް އަރާފައިވާއިރު، ފުށްފަދަ ޒަރޫރީ ތަކެތީގެ އަގު ވަނީ މިދިޔަ އަހަރާ އަޅައިބަލާއިރު 45 އިންސައްތަ އިތުރުވެފައެވެ. އެހެންކަމުން ރޯދައާ ދިމާކޮށް ޕާކިސްތާނު ސަރުކާރުން އަންނަނީ ހިލޭ ފުށް ބަހަމުންނެވެ.