ޕާކިސްތާނުގައި ދިން ޙަމަލާއެއްގައި 7 މީހަކު މަރުވެއްޖެ
17 ޑިސެމްބަރު 2017 | އާދީއްތަ 10:27ޙަމަލާގައި 20 މީހަކަށް އަނިޔާވެފައިވޭ
މީގެ ކުރިން ހަނގުރާމަވެރިން ޙަމަލާދިން ޕާކިސްތާނުގެ ފައްޅިއެއް
ޕާކިސްތާނުގެ ފައްޅިއަކަށް ދިން ޙަމަލާއެއްގައި އަޅުކަން ކުރަން ތިބި ނަޞާރާއިން 7 މީހަކު މަރުވެއްޖެއެވެ.
ހަނގުރާމަވެރިންގެ މައްސަލަ ބޮޑުވެފައިވާ ބަލޮޗިސްތާން ޕްރޮވިންސްގެ ގުއެއްތާގައި ހުންނަ ނަޞާރާ ފައްޅިއަކަށް ދިން މިޙަމަލާގައި 20 މީހަކަށް އެކިވަރުގެ އަނިޔާތައް ލިބިފައިވެއެވެ. ހަމަލާދީފައިވަނީ ހަނގުރާމަވެރިންގެ ދެ މީހަކު ކަމަށް ރިޕޯޓްތައް ބުނެއެވެ. އޭގެ ތެރެއިން އެކަކު އޭނާގެ ހަށިގަނޑުގައި ހަރުކޮށްފައިވާ ގޮވާތަކެތި ގޮއްވާލިނަމަވެސް، ދެވަނަ މީހާއަށް އޭނާގެ ހަށިގަނޑު ގޮއްވާލުމުގެ ކުރިން ފައްޅީގެ ސެކިއުރިޓީ ގާޑަކުވަނީ އޭނާއަށް ޙަމަލާދީ މަރާލާފައެވެ. ޙަމަލާދިން ވަގުތު ފައްޅީގައި 400 އެއްހާ މީހުން ތިބިކަމަށް މައުލޫމާތު ލިބެއެވެ.
ބައި މަދު ނަޞާރާއިންނަކީ ޕާކިސްތާނުގެ އާބާދީގެ އެންމެ 2 އިންސައްތައެވެ. އަދި ހައްދުފަހަނައަޅާފައިވާ މުސްލިމް ޖަމާޢަތްތަކުން ގެންދަނީ ދޭތެރެ ދޭތެރެއިން ނަޞާރާއިންނަށް އަމާޒުކޮށް ގިނަ ޙަމަލާތަކެއް ދެމުންނެވެ. އެގޮތުން 2015ވަނަ އަހަރުގެ މާޗް މަހު ލާހޫރުގައި ދިން ޙަމަލާއެއްގައި 14 ނަޞާރާއިން މަރުވެފައިވާއިރު، 2013ވަނަ އަހަރު ޕިޝާވަރުގެ ފައްޅިއަކަށް ދިން ޙަމަލާއެއްގައި 80 އަށްވުރެ ގިނަ މީހުން ވަނީ މަރުވެފައެވެ.
މި ޙަމަލާ ކުށްވެރިކޮށް ޕާކިސްތާނުގެ ޚާރިޖިއްޔާއިން ވަނީ ބަޔާނެއް ވެސް ނެރެފައެވެ. އަދި މިފަދަ ޙަމަލާތަކުގެ ސަބަބުން ޓެރަރިޒަމް އާއި ދެކޮޅަށް އެ ޤައުމުން ކުރަމުންދާ މަސައްކަތްތަކަށް އެއްވެސް ހުއްޓުމެއް ނާންނާނެ ކަމަށް ވެސް ޚާރިޖިއްޔާއިން ބުނެއެވެ.
