ދަތިކުރުމުގެ ފިޔަވަޅުތަކަށް ހައްލެއް ހޯދަން ޤަތަރުން ބައިނަލްއަޤްވާމީ ކޯޓަށް

ސަޢޫދީ ޢަރަބިއްޔާއިން އިސްވެ އޮވެ ގަލްފްގެ ޤައުމުތަކުން ޤަތަރާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ހައްލު ހޯދުމަށް ބައިނަލްއަޤްވާމީ ކޯޓުތަކަށާއި އދގެ އިދާރާތަކަށް ދިޔުމަށް ޤަތަރުން ނިންމައިފިއެވެ.

ޤަތަރުގެ ވެރިރަށް ދޯހާގައި ބުދަ ދުވަހު އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޤަތަރުގެ ޚާރިޖިއްޔާގެ ތަރުޖަމާނު ލުލްވާ އަލްޚަޠަރު ވިދާޅުވީ ޤަތަރަށް މިމައްސަލައިގައި ގިނަ އޮޕްޝަންތަކެއް އެބަހުރި ކަމަށާއި، އދ އަށާއި ބައިނަލްއަޤްވާމީ ކޯޓުތަކަށް މިމައްސަލަ ގެންދިޔުމުގެ މަސައްކަތް ޤަތަރުން ފަށާފައިވާ ކަމަށެވެ.

ޤަތަރުން މިކަން ހާމަކޮށްފައި މިވަނީ ޤަތަރާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އެޤައުމުގެ ރައްޔިތުންނަށް އެކަމުގެ ނޭދެވޭ އަސަރުކުރާ ކަމަށް އދގެ ރިޕޯޓަކުން ފާހަގަކުރުމާއި ވިދިގެންނެވެ.

2017ވަނަ އަހަރުގެ ނޮވެމްބަރު މަހުގެ ފަހުކޮޅު އދގެ އިންސާނީ ހައްޤުތަކާއި ބެހޭ ހައިކޮމިޝަނަރުގެ އޮފީހުގެ ވަފުދެއް ޤަތަރަށް ޒިޔާރަތްކޮށް، އެޤައުމުގެ ކަމާއި ބެހޭ އިދާރާތަކާއި ބައްދަލުކުރިއެވެ. އަދި މި ބައްދަލުކުރުމަށް ފަހު، ސަޢޫދީއިން އިސްވެ އޮވެ ޤަތަރާއި ދެކޮޅަށް އަޅާފައިވާ ފިޔަވަޅުތަކުގެ ސަބަބުން ޤަތަރުގެ ރައްޔިތުންނަށް އެކަމުގެ ދަތިތަކާއި ދިމާވާކަމަށާއި، އެކަމުގެ ސަބަބުން ހައްޤުތައް ގެއްލޭކަމަށް ބުނެ، ރިޕޯޓެއް ނެރެފައިވެއެވެ.

ޤަތަރުގެ ޚާރިޖިއްޔާއިން ބުނީ އދގެ ރިޕޯޓަކީ ވަކި ފަރާތަކަށް ނުޖެހޭ، ބައިނަލްއަޤްވާމީ ވިސްނުމަކުން ނެރެފައިވާ ރިޕޯޓެއް ކަމަށެވެ.

ޤަތަރާއި ދެކޮޅަށް ދަތިކުރުމުގެ ފިޔަވަޅު އަޅާފައިވަނީ ސަޢޫދީ އިސްވެ އޮވެ، ބަޙްރައިނާއި، ޔޫއޭއީ އާއި މިސްރުންނެވެ.

އެޤައުމުތަކުން ސަޢޫދީއާއި އޮންނަ ގުޅުން ކަނޑާލައި، ޤަތަރުން ޓެރަރިޒަމަށް ވާގިވެެރިވާ ކަމަށް ތުހުމަތުކުރިއެވެ. ޤަތަރުން ދަނީ މިތުހުމަތުތައް ދޮގުކުރަމުންނެވެ.