ޕާކިސްތާނުގައި ތެޔޮ ޓޭންކަރު ގޮވި ހާދިސާގައި މަރުވި މީހުންގެ އަދަދު 250 އަށް އަރައިފި

ޕާކިސްތާނުގެ އިރުމަތީ ސަރަހައްދުގައި މިދިއަ މަހުގެ ފަހުކޮޅު ތެޔޮޓޭންކަރެއް ގޮވުމުގެ ހާދިސާގައި ޒަޚަމްވި މީހުންގެ ތެރެއިން އިތުރު މީހުން މަރުވުމާއެކު އެ ހާދިސާއާއި ގުޅިގެ މަރުވި މީހުންގެ އަދަދު 250 އަށް އިތުރު ވެއްޖެ ކަމަށް އެ ގައުމުގެ ސަރުކާރުގެ އޮފިޝަލުން ވިދާޅުވެއްޖެއެވެ.

މި ހާދިސާ ހިނގީ ޖޫން މަހުގެ 25 ވަނަ ދުވަހު ހެނދުނުގެ ވަގުތެއްގައި ކަރާޗީން ލާހޯރަށް ދަތުރު ކުރަމުން ދިޔަ ތެޔޮ ޓޭންކަރު، ޕަންޖާބު ޕްރޮވިންސްގެ ބަހަވަލްޕޫރު ކައިރިން ހައިވޭ އިން ފުރޮޅާލުމުގެ ސަބަބުންނެވެ.

އޭގެ ކުޑަ ވަގުތުކޮޅެއް ފަހުން ޓޭންކަރު ގޮވާފައިވަނީ ޓޭންކުން ލީކުވަމުން ދިޔަ ތެޔޮ ނެގުމަށް އެތައް ބަޔަކު ޖަމާވެފައިވަނިކޮށެވެ.

ފުރޮޅާލި ޓޭންކަރުން ފަންސާސް ހާސް ލީޓަރުގެ ތެޔޮ ބޭރުވި ކަމަށް ރިޕޯޓުތަކުގައި ވެއެވެ.

"ޒަޚަމްވި އެތައް ބަޔަކު މަރުވުމުން ޓޭންކަރުގައި އަލިފާން ރޯވި ހަދިސާގައި މަރުވި މީހުންގެ އަދަދު ވަނީ 205 އަށް އަރާފަ"ބަހަވަލް ޕޫރުގެ އިދާރޫ މުވައްޒަފަކު އޭއެފްޕީގައި ބުނެފައިވެއެވެ.

ބަހަވަލް ޕޫރުގެ ވިކްޓޯރިއާ ހޮސްޕިޓަލުގެ ޑޮކްޓަރެެއް ކަމަށްވާ އާސިމް ބުޚާރީ ހޯމަ ދުވަހު ވިދާޅުވި ގޮތުގައި މަރުވި މީހުންގެ އަދަދު ވަނީ 206 އަށް އަރާފައެވެ. އެއީ ހޯމަ ދުވަހު އިތުރު މީހަކު މަރުވި ކަމަށް ބުނުމުންނެވެ. ނަމަވެސް ސަރުކާރުގެ އިދާރާތަކުން އަދި އެ އަދަދު ކަށަވަރެއް ނުކޮށްދެއެވެ.

ތެޔޮޓޭންކް ގޮވުމުގެ ހާދިސާއާއި ގުޅިގެން މަރުވި މީހުންގެ އަދަދު ކަމަށް އޮފިޝަލުން މިހާތަނަށް ބުނެފައިވަީނީ 153 އެވެ.

އާއްމުން ބުނެފައިވަނީ ހާދިސާގައި ފިހުނު އެތައް ބަޔަކު މަރުވެފައިވަނީ ކައިރި ސަރަހައްދެއްގެ ހޮސްޕިޓަލަކުން އެކަށީގެންވާ ސިއްހީ ފަރުވާ ނުލިބިގެންނެވެ.

އަދި އެތައް ބަޔަކު އިތުރު ފަރުވާ ދިނުމަށް މުލްޓާންއާއި ލާހޯރުގެ ހޮސްޕިޓަލްތަކަށް ގެންގޮސްފައިވާކަމަށް ބުނެއެވެ.

ކާކުކަން ދެނެ ނުގަނެވޭވަރަށް އަނދާފައިވާ 125 މީހަކުވެސް މިހާރު ވަނީ ބޮޑު އެއް ޖަނާޒާގެ ތެރެއިން ވަޅުލާފައެވެ.

އެއްގަމު ދަތުރުފަތުރާ ބެހޭ ފުލުހުންގެ ތަރުޖަމާނު އިމްރާން ޝާހު ވިދާޅުވީ ސަރުކާރުން ހިންގި ތަހުގީގުން ފާހަގަ ކުރެވުނު ގޮތުގައި ފުލުހުންގެ ފަސް މީހެއްގެ މައްޗަށްވަނީ މައުލޫމާތު ސިއްރު ކުރި ކަން ސާބިތުވެފައެެވެ.

އަލިފާން ރޯވި ސަބަބު ކަނޑައެޅިގެން ސާފު ނުވި ނަމަވެސް އަލިފާން ރޯވީ މީހަކު އެއްލާލި ސިނގިރޭޓް ބުރިއަކުން ކަމަށް ޕާކިސްތާނުގެ އޮފިޝަލުންނާ ހަވާލާދީ ބައެއް މީޑިއާ ރިޕޯޓުތައް އަދިވެސް ބުނެއެވެ.