ދެމައިންގެ ނަމޫނާ ލޯބި: މުބާރާތުން ވަކިވަމުން ވެސް ސުމާ ހިނިތުންވެލީ މަންމައަށް ކުރިއަށް ދެވޭތީ!

ރަންތާޖު ޤުރުއާން މުބާރާތުގެ ފުރަތަމަ އެލިމިނޭޝަން ބުރު ކުރިއަށް ދިޔައިރު މުބާރާތުގައި ވާދަކުރާ ދެ މައިން ކަމަށްވާ އާސިމާ އާދަމް އާއި ސުމާ ހުސައިން ތިބީ ކައިރި ކައިރީގައެވެ. އެއީ މި މުބާރާތަށް އެކުގައި ފޮނި ހުވަފެންތަކަކާއެކު ބައިވެރިވި ދެ މައިންނެވެ. ދަރިފުޅަށް ގުރުއާން އުނގަންނައިދޭން ފެށި ހިސާބުން ގުރުއާނުގެ ތެރެއަށް ވަދެވި އާސިމާ ވެސް ގުރުއާން އުނގެނުނީ ދަރިފުޅު ސުމާއާއެކުގައެވެ.

ރަންތާޖު ޤުރުއާން މުބާރާތުން ހުކުރު ދުވަހުގެ ރޭ ފަސް ބައިވެރިއަކު ކަޓައިގެން ދިޔައެވެ. ފަހަރަކު ބައިވެރިއަކު ކަޓައިގެން ގޮސް، ސްޓޭޖް މަތީގައި ތިން ބައިވެރިންނަށް ވެއްޖެއެވެ. އޭރު މުބާރާތުން ވަކިވާ ހަތަރު ބައިވެރިއަކު ވަނީ އިއުލާންކޮށްފައެވެ. ބާކީ މުބާރާތުން ކަޓަން އޮތީ އެންމެ ބައިވެެރިއެެކެވެ.

އެންމެ ފަހުން ސްޓޭޖްމަތީގައި ތިބި ތިން ބައިވެރިންގެ ތެރޭގައި ސުމާ އާއި އާސިމާ ހިމެނެއެވެ. އެ ވަގުތުގައި، އެ ދެމައިންގެ ހިތަށް އަރައި ފައިބަމުންދިޔަ އިހުސާސްތަކަކީ ބުނެދެވޭނެ އިހުސާސްތަކެއް ނޫނެވެ.

އެކަމަކު، މުބާރާތް ފެށުމުގެ ކުރިން ވެސް މި ދެ މައިން ބުނި ވާހަކައެއް އެބައޮތެވެ. އޭރު ވެސް ސުމާ ބުނީ ބޭނުންވަނީ މަންމަ ކާމިޔާބުވުން ކަމަށެވެ. އާސިމާ ބުނީ ބޭނުންވަނީ ދަރިފުޅު ކާމިޔާބުވުން ކަމަށެވެ. މިއީ މި ދެމައިންގެ ނަމޫނާ ލޯބީގެ ރަމްޒެވެ.

އެންމެން ނޭވާ ހިފަހައްޓައިލައިގެން ތިބި އެ ވަގުތުގައި މުބާރާތުގެ ޕްރެޒެންޓަރު ސުމާއާ ކޮށްލީ ސުވާލެކެވެ. އެ ދެމައިން ކުރެ ކޮންމެވެސް އެކަކު މުބާރާތުގައި މަޑުކުރަން ފުރުސަތު ލިބޭނަމަ އެ ފުރުސަތު ދޭނީ ކާކަށްތޯއެވެ.

"މަންމަ ހުންނަން ބޭނުމީ،" ސުމާ ބުނެލިއެވެ.

ސުމާގެ ޖަވާބު ކުރެވެ. އެކަމަކު ސުމާ އެ ބުނީ ވަރަށް ބައިވަރު ވާހަކައެވެ. އެ ބުނެދިން ދެ ތިން ބަހަކީ އަސަރުގަދަ ދެތިން ބަހެވެ. އެ ކުރު ޖަވާބުން ވެސް ސުމާގެ ހިތުގައި އޭނާގެ މަންމައަށް އޮތް ލޯބި ހާމަވެއެވެ.

ކަން ދިމާ ކުރި ގޮތުން 16 ވަނަ ބައިވެރިޔާގެ ގޮތުގައި މުބާރާތާ އަލްވަދާއު ކިޔަން ޖެހުނީ ސުމާއަށެވެ.

އެކަމަކު މުބާރާތުން ވަކިވެގެން ދަމުން ވެސް ހިނިތުންވެލައިފައި ސުމާ ދިނީ އޭނާގެ މަންމައަށް މެސެޖެކެވެ. އެއީ ހިތްވަރުގެ މެސެޖެކެވެ. މުބާރާތުން ވަކިވިޔަސް، މަންމައަށް ޓަކައި މަންމަގެ އަތުގައި ހިފާ ގާތުގައި ހުރިކަން އަންގައިދޭ މެސެޖެކެވެ. އޭނާ އެދެނީ މަންމަގެ ކާމިޔާބީއަށް ކަން އަންގައިދޭ މެސެޖެކެވެ.

ދަރިފުޅު ވަކިވެގެން ދިއުމުން އާސިމާ ދެރަވިއެވެ. އެ ކަން އޭނާގެ އަޑުން އެކަނި ވެސް ހާމަވެއެވެ. މުބާރާތް ފެށުމުގެ ކުރިން ދިން އިންޓަވިއުއެއްގައި ވެސް އާސިމާ ބުނީ މުބާރާތް ނިމިގެންދާއިރު ވެސް ބޭނުންވަނީ ދަރިފުޅަށް ކާމިޔާބީ ލިބެންކަމަށެވެ.

ސުމާ މުބާރާތުން ވަކިވުމުން އާސިމާ ބުނީ އެއީ އޭނާ އުންމީދުކުރި ކަމެއް ނޫން ކަމަށެވެ.

މުބާރާތުން ވަކިވިޔަސް، ސުމާގެ އުންމީދުތައް އަދިވެސް ރަންތާޖު ޤުރުއާން މުބާރާތަކުން ކަސިޔާރެއް ނުވެއެވެ. އޭނާގެ އުންމީދުތައް އަދިވެސް މި މުބާރާތަށް ޓަަކައި ބޮޑެވެ. އެއީ އޭނާގެ ލޯބިވާ މަންމައަށް މުބާރާތުގައި ރަންވަނަ ލިބުން އެދި ސުމާ ކުރާ ފޮނި އުންމީދެވެ.