"ރަންތާޖު" ޤުރުއާން މުބާރާތުގެ ގްރޭންޑް ފިނާލޭ މާދަމާ ރޭ 8:30ގައި
29 އެޕްރީލު 2023 | ހޮނިހިރު 12:48މާދަމާ ރޭގެ ޖަލްސާ ޝަރަފުވެރިކޮށްދެއްވާނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރަންތާޖު ގުރުއާން މުބާރާތުގެ ފައިނަލް ފަސް ބައިވެރިން
ޔޫތު މިނިސްޓްރީ އާއި އިސްލާމިކް މިނިސްޓްރީ އަދި ރާއްޖެ ޓީވީ އިން މިއަހަރުގެ ރޯދަ މަހަށް ހާއްސަކޮށްގެން ކުރިއަށްގެންދިޔަ "ރަންތާޖު" ޤުރުއާން މުބާރާތުގެ ނަތީޖާ ފާޅު ކުރުމުގެ ޖަލްސާ މާދަމާރޭ ބާއްވަން ތާވަލު ކޮށްފިއެވެ.
މި ޖަލްސާ މާދަމާ ރޭ 8:30 ގައި ވަގުތުން ރާއްޖެ ޓީވީން ދައްކާނެއެވެ. މި ޖަލްސާގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ދެކަނބަލުންނާއި ނައިބުރައީސް ފައިސަލް ނަސީމް ވެސް ބައިވެރިވެވަޑައިގަންނަވާނެއެވެ.
ރަންތާޖު ޤުރުއާން މުބާރާތުގެ އޮޑިޝަންގައި 111 މީހުން ބައިވެރިވިއިރު މުބާރާތް ފަށާފައިވަނީ އޭގެ ތެެރެއިން އެންމެ މަތިން މާކްސް ހޯދި 20 ބައިވެރިންނާއެކުގައެވެ. އަދި މިދިޔަ ހުކުރު ދުވަހުގެ ރޭ މި 20 ބައިވެރިންގެ ތެރެއިން ފައިނަލަށް ދަތުރުކުރި ފަސް ބައިވެރިން ހޮވައި، ކިޔެވުން ވަނީ ކުރިއަށްގެންގޮސްފައެވެ.
ހުކުރު ދުވަހުގެ ރޭ އޮތް މުބާރާތުގެ ހަވަނަ އެޕިސޯޑުގައި، މުބާރާތުގެ ކުރިއަށް އޮތް ބުރަށް ދަތުރުކުރާ ބައިވެރިންގެ ގޮތުގައި އިއުލާންކޮށްފައި ވަނީ:
މި މުބާރާތަކީ ރާއްޖޭގައި ވެސް މިހާތަނަށް ބާއްވާ އެންމެ އަގު ބޮޑު ޤުރުއާން މުބާރާތެވެ. އެގޮތުން، މި މުބާރާތުން އެއްވަނައަށް ދާ ފަރާތަކަށް 3 ލައްކަ ރުފިޔާ، ދެވަނައަށް ދާ ފަރާތަކަށް 1 ލައްކަ ރުފިޔާ، އަދި ތިންވަނައަށް ދާ ފަރާތަކަށް 75000 ރުފިޔާ ލިބޭނެއެވެ.
16 އަހަރާއި 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މި މުބާރާތަކީ މިހާތަނަށް ރާއްޖޭގައި ބާއްވާ މިފަދަ އެންމެ ބޮޑު މުބާރާތެވެ. މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު،ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.
