ރަންތާޖު ޤުރުއާން މުބާރާތުން 1 ވަނަ ހޯދި ސާއީއާ އިސްލާމިކް މިނިސްޓަރު ބައްދަލުކުރައްވައިފި
3 މެއި 2023 | ބުދަ 12:58މިނިސްޓަރު ސާއީއަށް ހިތްވަރު ދެއްވާފައިވޭ
މިނިސްޓަރ އޮފް އިސްލާމިކް އެފެއަރޒް، ޑރ. އަހްމަދު ޒާހިރު އަލީ، މުހައްމަދު ސާއީ މުބާރިކާއެކު ބޭއްވެވި ބައްދަލުކުރެއްވުމުގެ ތެރެއިން
ރަންތާޖު ޤުރުއާން މުބާރާތުން 1 ވަނަ ހޯދި މުހައްމަދު ސާއީ މުބާރިކްއާ މިނިސްޓަރ އޮފް އިސްލާމިކް އެފެއަރޒް، ޑރ. އަހްމަދު ޒާހިރު އަލީ ބައްދަލު ކުރައްވައިފިއެވެ.
މި މުބާރާތުގެ ފަޚުރުވެރި 1 ވަނަ ލިބުމާގުޅިގެން މުހައްމަދު ސާއީއާ އިސްލާމިކް މިނިސްޓަރު ބައްދަލުކުރައްވައި ދެއްކެވި ވާހަކަފުޅުގައި، މަރުހަބާ ވިދާޅުވެ ހިތްވަރުދެއްވިއެވެ.
ސާއީ ދެއްކި ވާހަކާގައި، މިފަދަ މުބާރާތެއްގައި ބައިވެރިވެ ފަޚުރުވެރި އެއްވަނަ ލިބުމުގައި މައިންބަފައިންގެ އެހީތެރިކަން (ޚާއްސަކޮށް އޭނާގެ މަންމަގެ އެހީތެރިކަން) ލިބުނުކަން ފާހަގަކުރިއެވެ. އަދި އިތުރަށް ކުރިއަށްދާން ބޭނުންވަނީވެސް ދީނީ ތައުލީމުގެ ރޮނގުންކަމަށްވާތީ، ރާއްޖެއިން ބޭރުން، އިސްލާމީ ގައުމަކުން ކިޔެވުމުގެ ޝައުގުވެރިކަން ހުރިކަން ފާހަގަކުރިއެވެ. އިސްލާމިކް މިނިސްޓަރު ވަނީ އެކަމުގައި މިނިސްޓްރީން ކޮށްދެވެން ހުރި މަސައްކަތްތަކެއް ކުރައްވާނެކަމަށާއި އެކަމުގައި އެހީތެރިވެވަޑައިގަންނަވާނެ ކަމަށް ވިދާޅުވެފައެވެ.
ރަންތާޖު ޤުރުއާން މުބާރާތަކީ އިސްލާމިކް މިނިސްޓްރީއާއި ރާއްޖެ ޓީވީ އަދި މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް ގުޅިގެން ކުރިއަށްގެންދިޔަ މުބާރާތެކެވެ.
މި މުބާރާތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވަނީ، 1444 ވަނަ އަހަރު މިނިސްޓްރީން ރަމަޟާންމަހު ކުރިއަށްގެންދެވުނު ޕްރޮގްރާމްތަކުގެ ތެރެއިން ރަންތާޖު ޤުރުއާން މުބާރާތަކީ ވަރަށް ފުރިހަމައަށް ކުރިއަށްގެންދެވުނު މުބާރާތެއްކަން ފާހަގަކުރައްވާފައެވެ. އަދި އެހާ ފުރިހަމައަށް ކުރިއަށް ގެންދެވުނުކަމަށްޓަކައި، އެއްބާރުލުން ދެއްވި ފަރާތްތަކަށް ޝުކުރުއަދާކުރެއްވިއެވެ. އަދި މުބާރާތުގެ ބައިވެރިންނަށް ގިނަ ފުރުސަތުތަކެއް ފަހިކޮށްދެވުނުކަންވެސް މިނިސްޓަރު ވަނީ މި ރަސްމިއްޔާތުގައި ފާހަގަކުރައްވާފައެވެ.
