ފެބްރުއަރީ މަހު އެކަނި ވެސް ކުޑަކުދިންނަށް އަނިޔާ ކުރުމުގެ 284 މައްސަލަ
30 މާރިޗު 2023 | ބުރާސްފަތި 12:14އެންމެ ގިނައިން ރިޕޯޓުކޮށްފައި ވަނީ އިހުމާލުގެ މައްސަލަ
ކުޑަކުދިންނަށް ކުރާ އަނިޔާއާއި ގުޅޭ ޕޯސްޓަރެއް
ފެބްރުއަރީ މަހު އެކަނި ވެސް ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 284 މައްސަލަ ހުށަހަޅާފައިވާ ކަމަށް ޖެންޑާ މިނިސްޓްރީން ބުނެފިއެވެ.
ޖެންޑާ މިނިސްޓްރީން އާންމުކުރި ތަފާސްހިސާބުތަކުން ދައްކާގޮތުން، އެންމެ ގިނައިން ރިޕޯޓުކޮށްފައި ވަނީ އިހުމާލުގެ މައްސަލައެވެ. އެގޮތުން މިބާވަތުގެ 42 މައްސަލައެއް ފެބްރުއަރީ 2023 ގައި ހުށަހަޅާފައިވެއެވެ.
މީގެ އިތުރުން ޖިންސީ ހާނިއްކައިގެ 27 މައްސަލަ، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 27 މައްސަލަ، ޖިސްމާނީ ހާނިއްކައިގެ 25 މައްސަލަ، ނަފްސާނީ ހާނިއްކައިގެ 21 މައްސަލަ، އެހެން ކުދިންގެ ފަރާތުން ގަނާ ލިބުމުގެ 3 މައްސަލަ، އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާ ލިބުމުގެ 1 މައްސަލަ، ބިރުދެއްކުމުގެ ގޮތުން ކުރެވޭ ކަންކަން ނުވަތަ ބްލެކްމެއިލް ކުރުމުގެ 1 މައްސަލަ އަދި ކުޑަކުދިންގެ ބަދުއަޚްލާގީ އަމަލު ހިންގާ ވީޑިއޯތައް ދެއްކުމުގެ 1 މައްސަލަ ހިމެނެއެވެ.
ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 45 މައްސަލަ އެއް ފެބްރުއަރީ މަހު ހުށަހަޅާފައިވާއިރު، މިފަދަ މައްސަލަތަކުގެ ތެރެއިން އެންމެ ގިނައިން ހިމެނެނީ ޖިސްމާނީ އަނިޔާ ކުރުމުގެ މައްސަލަތަކެވެ. އެގޮތުން މިބާވަތުގެ 23 މައްސަލައެއް ވަނީ ހުށަހެޅިފައެވެ. އަދި ނަފްސާނީ އަނިޔާކުރުމާއި އަނގަބަހުން ކުރެވޭ އަނިޔާގެ 13 މައްސަލައަކާއި، ބިރުދެއްކުމުގެ ގޮތުން ކުރެވޭ ކަންކަމާއިގުޅޭ 4 މައްސަލަ، ޖިންސީ ހާނިއްކަ ކުރުމުގެ 3 މައްސަލަ، ގަދަކަމުން ޖިންސީ ގޯނާކުރުމުގެ 1 މައްސަލަ އަދި މާލީ އިޤްތިޞާދީ ފުދުންތެރިކަން ފޯރުކޮށްދިނުމުގައި ހުރަސްއެޅުމުގެ 1 މައްސަލަ ފެބްރުއަރީ މަހު މިނިސްޓްރީ އަށް ވަނީ ހުށަހަޅާފައެވެ.
ޖެންޑާ މިނިސްޓްރީން ބުނީ އާއިލީ މައްސަލަތަކާއި ގުޅުންހުރި 33 މައްސަލަ ފެބްރުއަރީ މަހު ހުށަހަޅައިފައިވާ ކަމަށެވެ. މިފަދަ މައްސަލަތަކުގެ ތެރޭގައި ކުދިން ބެލުމުގައި ދިމާވާ ކަންކަމާގުޅޭ 15 މައްސަލަ، ކުދިންނާއި ބައްދަލުކުރުމަށް ހުރި ހުރަސްތަކާގުޅޭ 12 މައްސަލަ، ހަޟާނާތުގެ 4 މައްސަލަ އަދި ދަރިންގެ ޚަރަދު ދިނުމުގައިހުރި ގޮންޖެހުންތަކާ ގުޅޭ 2 މައްސަލަ ހުށަހަޅާފައިވާ ކަމަށެވެ.
އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމާއި ގުޅޭ 8 މައްސަލަ ފެބްރުއަރީ މަހު މިނިސްޓްރީއަށް ރިޕޯޓުކޮށް އެޓެންޑްކޮށްފައިވާކަން ފާހަގަކޮށް ޖެންޑާ މިނިސްޓްރީން ބުނީ ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން 24 މައްސަލަ ފެބްރުއަރީ މަހު މިނިސްޓްރީއަށް ހުށަހަޅާފައިވާ ކަމަށެވެ. އޭގެ ތެރޭގައި ނުކުޅެދުންތެރިކަން ހުންނަ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅައިފައިވާ 20 މައްސަލައާއި އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅައިފައިވާ 4 މައްސަލަ ހިމެނޭ ކަމަށް މިނިސްޓްރީން ބުނެއެވެ.
މީގެ އިތުރުން މިނިސްޓްރީން ބުނީ އިޖުތިމާއީ އެހީތެރިކަން ފޯރުކޮށްދިނުމާއި ދުޅަހެޔޮކަން ކަށަވަރުކުރުމަށް ބޯހިޔާވަހިކަން ފޯރުކޮށްދިނުމުގެ ކުޅަދާނަކަން ނެތުމުގެ މައްސަލައެއް ފެބްރުއަރީ މަހު ހުށަހަޅާފައިވާ ކަމަށެވެ.
ތަފާސްހިސާބުތައް ދައްކާގޮތުން ފެބްރުއަރީ މަހުގެ ތެރޭގައި ކުޑަކުދިންގެ އަހުލާގާއި ގުޅުން ހުރި 20 މައްސަލައެއް ހުށަހަޅާފައިވެއެވެ. އެގޮތުން ސްކޫލަށް ދާން ބޭނުން ނުވުމުގެ 7 މައްސަލަ، ގެއިން ނިކުމެގެން ދިއުމުގެ 4 މައްސަލަ، ރުޅިއިސްކުރުން އަދި ރުޅިގަދަވެ އުޅުމުގެ 3 މައްސަލަ، ސުލޫކީ 2 މައްސަލަ، އެހެން ކުދިންނަށް ގަނާ ކުރުމުގެ 2 މައްސަލަ، ކުށުގެ ވެއްޓަށް ހުށަހެޅިދާނެފަދަ އަމަލުތައް ހިންގުމުގެ 1 މައްސަލަ ހުށަހަޅާފައިވެއެވެ.
ކުޑަކުދިންގެ ހައްގުތަކާއި ގުޅުންހުރި 2 މައްސަލައެއް ފެބްރުއަރީ މަހު މިނިސްޓްރީއަށް ވަނީ ހުށަހަޅާފައެވެ. މި މައްސަލަތަކުގެ ތެރެއިން ކުދިން ސްކޫލަށް ނުފޮނުވުމުގެ 1 މައްސަލައާއި އައި.ޑީ ކާޑު އަދި އުފަންދުވަހުގެ ސެޓްފިކެޓް ފޯރުކޮށް ނުދިނުމުގެ 1 މައްސަލަ ހުށަހަޅާފައިވެއެވެ.
ފެބްރުއަރީ މަހުގައި ދައުލަތަށް އަލަށް 3 ކުއްޖެއް ނެގިފައިވާއިރު، ފެބްރުއަރީ މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމުލަ އަދަދަކީ 186 އެވެ.
