ޓުޗެލްގެ އިރުޝާދުގެ ދަށުން ބަޔާންގެ ފަރިތަކުރުންތައް ފަށައިފި
29 މާރިޗު 2023 | ބުދަ 03:11ޓުޗެލްގެ އިރުޝާދުގެ ދަށުން ބަޔާން އިން ކުޅޭނެ ފުރަތަމަ މެޗަކީ ޑޯޓްމަންޑާ ދެކޮޅަށް ކުޅޭ މެޗު
ބަޔާން އިން އަންގާރަ ދުވަހު ކުރިއަށް ގެންދިޔަ ފަރިތަކުރުމުގައި ޓުޗެލް
އައު ކޯޗު ތޯމަސް ޓުޗެލްގެ އިރުޝާދުގެ ދަށުން ޖަރުމަނުގެ ޗެމްޕިއަން ބަޔާން މިއުނިކްގެ ފަރިތަކުރުންތައް ފަށައިފި އެވެ.
ބަޔާންގެ ކޯޗުކަމަށް ޓުޗެލް ހަމަޖައްސާފައިި ވަނީ މިދިޔަ ހަފްތާ ބަންދުގަ އެވެ. އެއީ އިންޓަނޭޝަނަލް ބްރޭކަށް ކުލަބް ފުޓުބޯޅައިގެ ކުޅުން މެދު ކަނޑާލާފައި ވަނިކޮށް، އެ ޓީމުގެ ކޯޗުކަމުގައި ހުރި ހޫލިއަން ނާގަލްސްމަން ވަކިކުރުމަށްފަހު އެވެ. ޓުޗެލްގެ އިރުޝާދުގެ ދަށުން ބަޔާން އިން ވަނީ އަންގާރަ ދުވަހު އެ ޓީމުގެ ފުރަތަމަ ފަރިތަކުރުން ކުރިއަށް ގެންގޮސްފަ އެވެ. ޓުޗެލްގެ އިރުޝާދުގެ ދަށުން ބަޔާން އިން ކުޅޭނެ އެންމެ ފުރަތަމަ މެޗަކީ އިންޓަނޭޝަނަލް ބްރޭކަށް ފަހު ޖަރުމަނު ލީގުގައި ބްރޫޝިއާ ޑޯޓްމަންޑާ ދެކޮޅަށެވެ. އެ މެޗަށް ކުރިމަތިލާއިރު، ބަޔާން އޮތީ ވެސް ޖަރުމަނު ލީގުގެ ދެ ވަނައިގަ އެވެ. އެއް ޕޮއިންޓުގެ ފަރަގަކާއެކު އެއް ވަނައިގައި އޮތީ ވެސް ޑޯޓްމަންޑެވެ. އޭގެ ފަހުން އަންނަ މަހުގެ 11 ވަނަ ދުވަހު ބަޔާން އިން ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ނުކުންނާނީ އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓަރ ސިޓީއާ ދެކޮޅަށެވެ.
ޓުޗެލް ބުނީ ބަޔާނާއެކު ފަރިތަކުރުންތައް ފަށައިގެން ބޭނުންވަނީ ޓީމުގައި ހުރި ކަންކަން ދެނެގަންނަން ކަމަށާއި، ކުރިއަށް އޮތް މެޗަށް ނުކުންނާނީ އެކަންކަމަށް ބެލުމަށްފަހު ކަމަށެވެ. ޓުޗެލް ބުނީ، ކުރިން ވެސް އޭނާ ބުނި ފަދައިން ބަޔާންގައި އޮތީ ވަރަށް ވަރުގަދަ ސްކޮޑެއް ކަމަށާއި، ފަރިތަކުުރުމުގައި ކުޅުންތެރިންގެ ފަރާތުން ވެސް އެކަން ފެނުނު ކަމަށެވެ. މީގެ އިތުރުން އޭނާ ބުނީ ފޯކަސް ހުރީ ސީޒަންގައި ކާމިޔާބު ކުރެވެން ހުރި ހުރިހާ ތައްޓެއް ކާމިޔާބު ކުރުމަށް ކަމަށެވެ.
ބަޔާންގައި ޖަރުމަނު ލީގުގައި ޓުޗެލް އިރުޝާދު ދޭނެ ހަތަރު ވަނަ ކުލަބެވެ. މީގެ ކުރިން އޭނާ ވަނީ އެ ލީގުގެ އޮގްސްބާގް، މައިންޒް އަދި ޑޯޓްމަންޑަށް އިރުޝާދު ދީފަ އެވެ. ޓުޗެލް އެންމެ ފަހުން ހުރީ ޕްރިމިއާ ލީހުގެ ޗެލްސީގެ ކޯޗުކަމުގަ އެވެ. އެ ޓީމާއެކު ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ކާމިޔާބުކޮށްފައި ވަނިކޮށް އެ މަގާމުން ޓުޗެލް ވަކިކުރީ ޗެލްސީގެ އައު އޯނަރުންނެވެ.
