ނާގެލްސްމަން ވަކިކުރުން: ބަޔާނަށް 70 މިލިއަން ޔޫރޯގެ ގެއްލުމެއް

ބަޔާން މިއުނިކްގެ ކޯޗުކަމުން މީގެ ދެ ދުވަސް ކުރިން ވަނީ ޒުވާން ކޯޗު ހޫލިއަން ނާގެލްސްމަން ވަކޮށްފަ އެވެ. ގައުމީ ޓީމުތަކުގެ މެޗުތަކަށް ކުލަބު ފުޓްބޯޅައިގެ މެޗުތައް މަދުކަނޑާލި ވަގުތު ޗުއްޓީގައި ހުއްޓާ ގެނެސް އޭނާ މަގާމުން ވަކިކުރީ އާ ކޯޗަކު ވެސް ހޯދުމަށްފަހު އެވެ. މިއީ މީގެ ދޮޅު އަހަރު ކުރިން މަގާމާ ހަވާލުވިއިރު އޭނާ ހީވެސް ނުކުރާ ކަމެކެވެ. ސަބަބަކީ ޓީމު އޮތީ ޖަރުމަނު ލީގާއި ޗެމްޕިއަންސް ލީގު ވެސް ހޯދޭ ހިސާބުގައި ކަމަށްވުމުންނެވެ.

ނަމަވެސް ބަޔާންއިން ބުނަނީ ނާގެލްސްމަން މި ސީޒަނުގައި 10 ޕޮއިންޓް ގެއްލުވާލައިފި ކަމަށާއި ޓީމު ކުރިނާރާ ކަމަށެވެ. މިއާއެކު 35 އަހަރުގެ ކޯޗު ހުރީ ކަންކަން އޮމާންކަމާއެކު ނިންމާލާ ގޮތަކަށްނޫނެވެ.

އޭނާ ބަޔާންގައި ހުރީ އަހަރަކު 9 މިލިއަން ޔޫރޯގެ މުސާރައަކަށެވެ. މިހެންވެ ކޮންޓްރެކްޓްގެ ބާކީ އޮތް ބަޔަކަށް ފުލް މުސާރަ ހޯދަން ކޯޗު ވަނީ އެދިފަ އެވެ. އެއީ 27 މިލިއަން ޔޫރޯ އެވެ. އަދި އޭނާއާ އެކު ވަޒީފާ ގެއްލޭ ކޯޗިން ސްޓާފުންގެ މުސާރައާއެކު ނާގެލްސްމަން ވަކިކޮށް އޭނާ އަށް ބަދަލުގެ ގޮތުގައި 70 މިލިއަން ޔޫރޯ ދިނުމަށް ބަޔާންއަށް ވަނީ މަޖުބޫރުވެފަ އެވެ. މިއީ މާލީ ގޮތުން ބޮޑު ގެއްލުމެއް ނަމަވެސް ބަޔާންއިން ތިބީ މި ބަދަލު ދީފައި ވެސް ކޯޗުކަން ތޯމަސް ޓުކެލް އަށް ދިނުމަށެވެ.

އައު ކޯޗު ބުނީ އޭނާ މަގާމާ ހަވާލުވުމުގެ ކުރިން ނާގެލްސްމަންއާ އެއްވެސް ވަރަކަށް މަޝްވަރާނުކުރާ ކަމަށެވެ. އަދި އަމާޒަކީ މި ސީޒަނުގައި ތިން ތަށި ހޯދުން ކަމަށެވެ.