ބާރަށް ކުރިއަށް ގޮސް ސައޫދީ އަންހެން ޓީމު ފީފާ ރޭންކިން އަށް

ފުރަތަމަ ފަހަރަށް ސައޫދޫ އަރަބިއްޔާގެ އަންހެން ގައުމީ ފުޓްބޯޅަ ޓީމު ފީފާ ރޭންކިންގައި ހިމަނައިފި އެވެ.

އެ ގައުމު އޮތީ ދުނިޔޭގެ ރޭންކިންގެ 171 ވަނާގަ އެވެ.

ސައޫދީ ފުޓްބޯޅަ ފެޑަރޭޝަނުގެ އަންހެން ފުޓްބޯޅަ ޑިޕާޓްމަންޓްގެ ސުޕަވައިޒަރ ލާމިއާ ބަހައިން ބުނީ މިއީ ވަރަށް ތާރީހީ ކާމިޔާބީއެއް ކަމަށެވެ.

2021 ވަނަ އަހަރު ސައޫދީ އަންހެން ފުޓްބޯޅަ ޓީމު އުފެއްދިއިރާ އަޅާބަލާއިރު އެ ގައުމުގެ ކޯޗުންނާއި ކުޅުންތެރިންގެ އަދަދު އިތުރުވެ، ޕްރެމިއާ ލީގު ވެސް ވަނީ ފަށައިފަ އެވެ.

މި ގޮތުން ޕްރެމިއާ ލީގާއި ފުރަތަމަ ޑިވިޝަން ފަށާފައިވަނީ ޖުމުލަ 25 ޓީމާއެކުގަ އެވެ. އަދި 17 އަހަރުން ދަށުގެ ކުޅުންތެރިންނަށް ހާއްސަކޮށް ގައުމުގެ އެކި ހިސާބުތަކުގައި ވަނީ ޓްރޭނިން ސްކޫލްތައް ހުޅުވައިފަ އެވެ. 2021 ވަނަ އަހަރު ސައޫދީން އަންހެން ފުޓްބޯޅަ ކުރިއަށް ގެންދަން ނިންމައިރު ތިބީ އެންމެ 119 ކޯޗުންނެވެ. ނަމަވެސަ މިހާރު 1000 ކޯޗުން އެބަތިއްބެވެ. އަދި ސްކޫލް ލީގުގައި 50000 ކުދިން އެބަތިއްބެވެ. އަދި މިވީ ކުރު މުއްދަތެއްގެ ތެރޭގައި 66 އިންސައްތަ ރެފްރީން އިތުރުވެ، 56 އިންސައްތައަށް ކުލަބުތައް ވަނީ އިތުރުވެފަ އެވެ.

އޭނާ ވިދާޅުވީ އުއްމީދަކީ ސައޫދީ އަރަބިއްޔާއިން އަންހެނުންގެ ވޯލްޑްކަޕުގައި ކުޅުން ކަމަށާއި 2026 ވަނަ އަހަރުގެ އަންހެނުންގެ އޭޝިއަން ކަޕް ބޭއްވަން ސައޫދީން ބިޑްކުރީ މިކަމުގެ ފެށުމަށް ކަމަށެވެ.