ޖަރުމަނުގެ ޗެމްޕިއަން ބަޔާން މިއުނިކްގެ ކޯޗުކަމުގެ މަގާމުން ހޫލިއަން ނާގަލްސްމަން ވަކި ކުރަން ޖެހުނީ ކުލަބުގެ ކުޅުމުގެ ފެންވަރު ދަށްވުމުން ކަމަށް އެ ކުލަބުގެ ސީއޯއޯ އޮލިވާ ޚާން ވިދާޅުވެއްޖެ އެވެ.
ބަޔާންގެ ބޯޑުން މިހާރު ވަނީ ކޯޗުކަމުން ނާގަލްސްމަން ވަކި ކުރުމަށްފަހު އެ މަޤާމަށް ތޯމަސް ޓުޗެލް ހަމަޖެއްސުމަށް ނިންމައިފަ އެވެ. އެކަމާ ގުޅިގެން ވާހަކަ ދައްކަވަމުން އޮލިވާ ޚާން ވިދާޅުވީ، ބަޔާންގައި އޮތް ސްކޮޑޮގެ ފެންވަރު ފެންނަނީ ވަރަށް މަދުން ކަމަށެވެ. އޭނާ ފާހަކަ ކުރެއްވި ގޮތުގައި މިއަހަރުގެ ޖަނަވަރީ މަހުން ފެށިގެން ބަޔާންގެ ކުޅުން ދަށްވެފައިވާ މިންވަރު ފެނުނު ކަމަށާއި، ކާމިޔާބާއި ހަމައަށް ދެވޭކަމުގެ އުންމީދު ގެއްލެމުން އައި ކަމަށެވެ. އޮލިވާ ޚާން ވިދާޅުވީ އެކި އެކި ކަންކަމުގެ ސަބަބުން މި ސީޒަނަށް ބަޔާނުން ކަނޑައެޅި ލަނޑު ދަނޑިތައް ނުރައްކަލުގެ ތެރެއަށް ވެއްޓުނު ކަމަށާއި، ނަމަވެސް އެކަންކަމާއެކު ވެސް ކުރިއަށް ދާން މަސައްކަތް ކުރި ކަމަށެވެ. އެހެން ނަމަވެސް މި ސީޒަނަށް ބޭނުންވާ ކަންކަން ހާސިލްކުރަން އެދޭތީ އެކަމަށް "ރިއެކްޓު" ކުރެއްވީ ކަމަށް ވެސް އޭނާ ވިދާޅުވި އެވެ.
އޮލިވާ ޚާންގެ އިތުރުން ބަޔާންގެ ސްޕޯޓިން ޑިރެކްޑަރު ވިދާޅުވީ، މިއީ އެ މަޤާމުގައި ހުރެ މިހާތަނަށް އޭނާ އަށް ނިންމަން ޖެހުނު އެންމެ އުނދަގޫ ނިންމުން ކަމަށެވެ. މީގެ އިތުރުން އޭނާ ވިދާޅުވީ ނާގަލްސްމަންއާއި އެކު އުފެދިފައިވަނީ އިތުބާރު ކުރެވޭ، ފާޅުކަން ބޮޑު އެކުވެރި ގުޅުމެއް ކަމަށެވެ. ނަމަވެސް އޭނާ ވެސް ވަނީ ބަޔާންގެ ކުޅުން ދަށްވެފައިވާ ކަމަށާއި، ނަތީޖާ ނެރުމުގައި އުނދަގޫތަކެއް ހުރި ކަމަށް ވިދާޅުވެފަ އެވެ. މީގެ އިތުރުން އޭނާ ވަނީ ނާގަލްސްމަން އަށް މުސްތަޤުބަލުގައި އިތުރު ކާމިޔާބަށް އެދޭ ކަމަށް ވެސް ވިދާޅުވެފަ އެވެ.
ބަޔާންގެ ކޯޗު ކަމަށް ނާގަލްސްމަން ހަމަޖައްސާފައި ވަނީ 2021 ވަނަ އަހަރު އެވެ. 2026 ވަނަ އަހަރާ ހަމަ އަށް އެއްބަސްވުން އެކުލަވާލި ނަމަވެސް، ދެ އަހަރު ނުވަނީސް ބަޔާނުން މިވަނީ އެއްބަސް އުވާލަން ނިންމައިފަ އެވެ.
