އެމްޑީޕީގެ ރައީސް، ރައީސް މުހައްމަދު ނަޝީދު، ޖުމްހޫރީ ޕާޓީއާއެކު މެނިފެސްޓޯއެއް އެކުލަވާލައްވަމުން ގެންދަވާ ކަމަށާއި، އެކަމުގެ މަޝްވަރާތައް ކުރައްވާފައިވާ ކަމަށް، އެމްޑީޕީގެ ކުރީގެ ޗެއަރޕާސަން އަދި ރައީސް ނަޝީދުގެ ފިކުރެއްގެ ދިރުން ހިންގުމުގައި އިސްކޮށް އުޅުއްވާ ހަސަން ލަތީފު ވިދާޅުވެއްޖެއެވެ.

ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރަން ނިންމުމާއެކު، އެމްޑީޕީގެ ރިޔާސީ ޕްރައިމަރީން ބޮޑު ނާކާމިޔާބީއަކާއި ކުރިމަތިވެވަޑައިގެންނެވި އަދި ޕާޓީގެ ރިޔާސީ ކެންޑިޑޭޓާ ދެކޮޅަށް މަސައްކަތް ކުރައްވަމުން ގެންދަވާ ރައީސް ނަޝީދު ވަނީ ޖުމްހޫރީ ޕާޓީގެ ނިންމުމަށް މަރުޙަބާ ވިދާޅުވެފައެވެ. އަދި އެކުގައި މަސައްކަތް ކުރެއްވުމުގެ ޝައުގުވެރިކަން ވެސް ފާޅުކުރެއްވިއެވެ.

ޖުމްހޫރީ ޕާޓީގެ މައި އޮފީހުގައި ރައީސް ނަޝީދުގެ ފަރާތްޕުޅުން ހަސަން ލަތީފުގެ އިތުރުން އެސްޓީއޯގެ މެނޭޖިންގ ޑިރެކްޓަރު ހުސައިން އަމްރުވެސް ބައިވެރިވެވަޑައިގެންނެވިއެވެ. މި ބައްދަލުވުމަށްފަހު ނޫސްވެރިންނާއި ވާހަކަދައްކަވަމުން ހަސަން ލަތީފު ވިދާޅުވީ އެމްޑީޕީގެ ރައީސަކީ ރައީސް ނަޝީދު ކަމަށާއި، އެހެންކަމުން، ރައީސް ނަޝީދުގެ އެދިވަޑައިގަތުމަކަށް އޭނާ އާއި އަމްރު އެމްޑީޕީގެ ފަރާތުން ވާހަކަދައްކަވަން ވަޑައިގެންނެވީ ކަމަށެވެ.

ޖޭޕީއާއި ރައީސް ނަޝީދުގެ ޓީމާ ދެމެދު ދެކެވުނު ވާހަކަތަކުގެ ތެރޭގައި ފުޅާކޮށް މަޝްވަރާކުރެވުނު ކަމަކީ ޖުމްހޫރީ ޕާޓީގެ ލީޑަރު ކުރިމަތިލައްވާއިރު، އެކީގައި މަސައްކަތްކުރެވޭނެ ސިޔާސަތުތަކެއް ކަނޑައެޅުމާއި އެ ސިޔާސަތުތަކުގެ ތަފްސީލުތައް މެނިފެސްޓޯއެއްގެ ގޮތުގައި އެކުލަވާލެވޭނެ ގޮތުގެ ވާހަކަ ކަމަށެވެ. އަދި އަންނަ ހަފްތާގައި ވެސް މި މަސައްކަތް ކުރައްވަން ބައްދަލުކުރައްވާނެ ކަމަށް އޭނާ ވިދާޅުވިއެވެ.

ހަސަން ލަތީފު ވިދާޅުވީ ކުރެވުނު މަޝްވަރާގައި، ނިންމުނު އެއްކަމަކީ އެކުގައި މަސައްކަތް ކުރާއިރު، މެނިފެސްޓޯއެއް އެކުލަވާލަން މަސައްކަތް ކުރަން ފެށުން ކަމަށެވެ. ދެން ޕާޓީގެ ފަރާތުން އެ މަސައްކަތް ނިންމާ ހުރިހާ ކަމެއް ކުރާނީ އެ ދެ ބޭފުޅުންނެއް ނޫން ކަމަށާއި، ޖުމްހޫރީ ޕާޓީން ވެސް އެ ޕާޓީގެ ލީޑަރާއި މަޝްވަރާކުރައްވާ އެއަށް ގެންނަވާނެ އިސްލާހާއި ބަދަލުތައް ހޯއްދަވާނެ ކަމަށެވެ. އަދި ރައީސް ނަޝީދުގެ ޓީމުން ވެސް ރައީސް ނަޝީދުގެ އަރިހުގައި މަޝްވަރާކުރައްވާނެ ކަަމަށާއި، މީގައި އިތުރަށް ކުރިއަށްދާނެ ގޮތްތަކާއި ގުޅޭގޮތުން ވާހަކަ ދެކެވޭނެ ކަމަށެވެ.

ޖުމްހޫރީ ޕާޓީގެ ނައިބު ލީޑަރު އަމީން އިބްރާހިމް ވިދާޅުވީ ޖޭޕީއާއި އެމްޑީޕީގެ ބޭފުޅުންނާ އެކު ބޭއްވެވި ބައްދަލުވުކުރެއްވުމަކީ ކުރިއަށް އޮތް ރިޔާސީ އިންތިޚާބުގައި ދެ ޕާޓީ ގުޅިގެން މަސައްކަތް ކުރުމަށް އަދި ކުރިއަށް ދިއުމަށް، ކުރަން ހުރި މަސައްކަތްތަކާއި ބެހޭގޮތުން ބޭއްވެވި ބައްދަލުކުރެއްވުމެއް ކަމަށެވެ. މި ބައްދަލުކުރެއްވުމުގައި މައިގަނޑު ގޮތެއްގައި ވާހަކަ ދެއްކެވީ، ދެ ޕާޓީ ގުޅިގެން އެކީގައި މަސައްކަތް ކުރާކަމުގައިވާނަމަ، ރައްޔިތުންނާއި ހަމައަށް ރައްޔިތުންގެ ބޭނުންތަކާއި މަޤްސަދުތައް ހާސިލުކުރުމަށްޓަކައި ގެންނާނެ ސިޔާސަތުތައް އަދި ޕްރޮގްރާމްތަކާއި ބެހޭގޮތުން ޚިޔާލު ބަދަލުކުރުން ކަމަށެވެ.

އެމްޑީޕީގެ ރިޔާސީ ޕްރައިމަރީއަށްފަހު ރައީސް ނަޝީދު ގެންދަވަނީ ފިކުރެއްގެ ދިރުން ނަމުގައި އެމްޑީޕީ ތެރޭގައި ވަކި ފިކުރެއް ދިރުވުމަށް މަސައްކަތް ކުރައްވަމުންނެވެ. އަދި އެމްޑީޕީން ރިޔާސީ ކެންޑިޑޭޓަކު ކަނޑައަޅާފައި ހުރި ނަމަވެސް، އެހެން ޕާޓީތަކާއި މަޝްވަރާ ކުރައްވާ އެހެން ޕާޓީތަކަށް ދަނީ ތާއީދުކުރައްވަމުންނެވެ.

ޖުމްހޫރީ ޕާޓީއަކީ މިހާރު އޮތް ކޯލިޝަންގައި ހިމެނޭ ޕާޓީއެކެވެ. ނަމަވެސް އެމްޑީޕީގެ ރިޔާސީ ކެންޑިޑޭޓެއް ހުންނަވަނިކޮށް އެމްޑީޕީގެ ވަކި ފިކުރެއް ހިންގާ ބަޔަކާއެކު ރިޔާސީ އިންތިޚާބުގައި މަސައްކަތް ކުރަން ނިންމި ނިންމުމާމެދު ޖުމްހޫރީ ޕާޓިން ސާފު ޖަވާބެއް ނުދެއެވެ.