ކުރީގެ ރައީސް މުޙައްމަދު ނަޝީދު އާއި ދަ ޑިމޮކްރަޓްސް ޕާޓީ އަށް ނިސްބަތްވާ މެމްބަރުން، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)އާ އަލުން ގުޅުމަށް ނިންމި ނިންމުމަށް އެ ޕާޓީ އިން މަރުޙަބާ ކިޔައިފި އެވެ.

ދާދި ފަހުން ދަ ޑިމޮކްރަޓްސް އިން ވަނީ އެ ޕާޓީގެ ނެޝަނަލް އެސެމްބްލީގެ ބައްދަލުވުމެއް ބާއްވައި، އެ ޕާޓީގެ މެމްބަރުން އަލުން އެމްޑީޕީއާ ގުޅުމަށް އިޤުރާރުވެފަ އެވެ. އަދި އެ ޕާޓީ އިން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ.

އެ ނިންމުމާ ގުޅިގެން ބުދަ ދުވަހުގެ ރޭ އެމްޑީޕީ އިން ވަނީ އެ ޕާޓީގެ ޤައުމީ މަޖިލީހުގެ ކުއްލި ޖަލްސާއެއް ބާއްވައިފަ އެވެ. އެއީ ރައީސް ނަޝީދު އާއި ޑިމޮކްރަޓްސް ޕާޓީގެ މެމްބަރުން އަލުން އެމްޑީޕީއާ ގުޅުމަށް ނިންމި ނިންމުމާ މެދު، އެ ޕާޓީ އިން ގޮތެއް ނިންމުމަށެވެ.

ޤައުމީ މަޖިލީހުގެ ޖަލްސާ އަށް ފަހު އެމްޑީޕީ އިން ނެރުނު ބަޔާނެއްގައި ބުނެފައި ވަނީ، އެމްޑީޕީއާ އަލުން ގުޅުމަށް ކުރީގެ ރައީސް ނަޝީދު އަދި ޑިމޮކްރަޓްސް ޕާޓީގެ މެމްބަރުން ނިންމި ނިންމުމަށް އެ ޕާޓީ އިން މަރުޙަބާ ކިޔާ ކަމަށެވެ.

އެ ބަޔާނުގައި ބުނެފައި ވަނީ އެމްޑީޕީ އަކީ، ދިވެހި ޤައުމަށްޓަކައި ހަގީގީ މަސައްކަތެއް ކުރަން ބޭނުންވާ ކޮންމެ ބަޔަކަށް ވެސް ހުޅުވާލެފައިވާ ޕާޓީ އެކެވެ. އަދި ކުރީގެ ރައީސް ނަޝީދު އާއި، އެމަނިކުފާނާ އެކު އަލަން އެމްޑީޕީއާ ގުޅޭ މެމްބަރުންނާ އެކު، އެ ޕާޓީގެ މަސައްކަތްތައް ބާރަށް ކުރިއަށް ދާނެ ކަމަށް ވެސް ބުނެފައިވެ އެވެ.

މީގެ އިތުރުން އެ ބަޔާނުގައި އެމްޑީޕީ އިން ބުނެފައި ވަނީ، ސަރުކާރުގެ އަމަލުތައް ފާލުން ނެއްޓި އަދި އެތައް ބައެއްގެ ބުރަ މަސައްކަތުން ހޯދި ޑިމޮކްރަސީ ނުރައްކަލެއްގެ ތެރޭގައި އޮތް މި ދަނޑިވަޅަކީ މުހިންމު އިސްލާހީ މަސައްކަތްތަކެއް ކުރަން ޖެހިފައިވާ ދަނޑިވަޅެއް ކަމަށެވެ. އަދި އެމްޑީޕީއާ ގުޅޭ ކޮންމެ މެމްބަރަކީ ވެސް، ޤައުމުގެ ހައްގުގައި ވަކާލާތު ކުރަން ފަސް ނުޖެހޭނެ މެމްބަރުން ކަމަށް އެ ޕާޓީ އިން ބުނެފައިވެ އެވެ.

ބަޔާން ނިންމާލަމުން އެމްޑީޕީ އިން ބުނެފައި ވަނީ، ސަރުކާރު ޖަވާބުދާރީ ކުރުވައި ޤާނޫނު އަސާސީ އިން ޔަގީންކޮށްދޭ ހައްގުތައް ކަށަވަރު ކޮށްދިނުމުގައި އެ ޕާޓީ އަބަދު ވެސް ދެމި އޮންނާނެ ކަމަށެވެ.

އެމްޑީޕީގެ އެތެރޭގައި ޚިޔާލު ތަފާތުވުން އުފެދުނީ 2023 ވަނަ އަހަރުގެ ރިޔާސީ އިންތިޚާބުގެ ޕްރައިމަރީގައި ރައީސް ނަޝީދުގެ މައްޗަށް، ކުރީގެ ރައީސް އިބްރާހީމް މުޙައްމަދު ޞާލިޙު ކުރި ހޯއްދެވި ހިސާބުންނެވެ. އެކަމުގެ ތެރޭގައި ޕާޓީގެ ތެރޭގައި އުފެދުނު ޚިޔާލު ތަފާތުވުންތަކުގެ ތެރެއިން، ރައީސް ނަޝީދު އާއި އެމަނިކުފާނުގެ އަރިސް މެމްބަރުން ވަނީ އެމްޑީޕީ އިން ވަކިވެފަ އެވެ.

އެއަށް ފަހު ދަ ޑިމޮކްރަޓްސްގެ ނަމުގައި ސިޔާސީ ޕާޓީއެއް އުފައްދައި، ރިޔާސީ އިންތިޚާބުގައި ވެސް އެ ޕާޓީ އިން ވަނީ ވަކިން ވާދަކޮށްފަ އެވެ.